Rokstu sagataveja: portals lakuga.lv

Pyrmuo leluokuo publikaceja Ingridai Tāraudai latgaliski beja jaunūs autoru kūpkruojumā “Pagrauda” (1999) , debejis gruomota – “Vīgla byušonys ironeja” (2000). Ingrida voda latvīšu autoru klubu Irejā “Baltie vārti” i cytys latvīšu sabīdryskys aktivitatis, vuicuos sadzeivuot ar itū laiku dīnrokstūs iinngrida.wordpress.com, turpynoj izdūt gruomotys. 2019. godā pi laseituoju datyka jau pīktais juos dzejūļu kruojums “Pajautys”. Tei ir ļaušonuos myužeigi sīviškeigajai plyusšonys stihejai, pīfiksejūt nūtikšonys i laika vibracejis sajiutuos.

***

..a pa tū laiku akmini sazīdēja upis
puorpoluoja i celi aizauga symtu
dzierksteļu pasaceļšona nu
dagūšys sirds kod
horizonti sasatyka pa tū laiku

***

violets pazylgons
kolnu viersyunēs snīgs
japuoņu vīšņu zīdlopys muoksla iz sīnys
atspulgoj reits apskuovi napalaid nūstyn
nu dzeivis sapynu tientenis sapyn sapyn

***

sylta tumneiga nakts ar sarunom
par reita ausmai davārti redzīni
veina pilīni cīšuok ap koklu piersti
ka nūsmakt nav lobuok trejkruosu
kača deveituo dzeiveiba aizskrīn puori ceļam

***

gaideišu speiguošu kruzuļuošu
ar leita lasem saplyuduse
puori plyustūša aizaveidama
ap tevi aiz bezelpā atkluodama
ka tu esi tys lākts i rīts

***

itam vokoram sorkonu
ūgu čajs aizdūmuoti celi
i myglys vuolūs vacuos
sātys i okys nasasauksi leidza
rosai nu reitim nūrosuļoj
kas beja svareigs kai elpa

***

boltys i dzaltonys i zylys i nūsmuordoj azaru viļņūs stori
šaļti speidynoj breineibys noktirnis
ar leita laseitem nūlasinej da zemis
kur munam byudam puori dīvgūsneņa meklej sovus ceļus
vosora juļa beiguos iraida
pylnim pereklim

***

Tymsnejuo
Samylzušuo
Nu puorvareitem
Spāka i mysuša
Bezspāka
Sirds
Klusom sytās
I putyns
Sprūstā
A nadaskarūt
Pasorgoj mani
Nu leitim

***

Otkon speideigi kruosainais laiks ar breinumim kas tevi gaida
Atlaid mani pa snīgim krapškuos tys munūs pādūs
Vysumam syuteituos viestulis aizačārušys veitula zorūs
Laimeigi laimeigi lidoj putyni puori munam ceļam
Atkuortuosim gon