Roksta autors: portals lakuga.lv

25. aprelī 18.00 stuņdēs Latgolys viestnīceibā GORS aicynoj iz Annys Rancānis jubilejai veļteitu koncertuzvadumu, kas veiduots kai Latgolys dzejneicys personeibu i regiona kulturys sovpateibu atkluojūša pastaiga aba ekskurseja, viestej Latvejis symtgadis i “Gora” sātyslopys.

Rāzna, Rogovka, Slutiški, Daugovpiļs, Ludza, Kruoslova, Pīdruja, Rēzekne – kotrai nu pīstuošonys vītu ir byutiska lūma Annys dzeivē i Latgolys kūpainā, sevkurai vītai īt leidza emocionals i poetisks viestejums dzejis, prozys i muzykys volūdā.

Uzvadumā pīsadaleis Latvejis Radejis kors, aktrise Baiba Broka, etno dzīduotuoja Biruta Ozoliņa. Uzvaduma radūšuo grupa – Sigvards Kļava, Anna Rancāne, Vīsturs Kairišs, Ieva Jurjāne i cyti.

Anna Rancāne par koncertuzvaduma nūsaukumu i koncepceju soka: “Kod mes, radūšuo grupa, dūmuojom, par kū vyspuor ir itys stuosts, Sigvards Kļava i Ilona Rupaine pīduovuoja ideju par ceļuojumu pa Latgolu. Latgolys vītys kai izstuodis gleznys, tu ej nu vīnys gleznys pi ūtrys i verīs. Tod vajadzēja dūmuot kūpeju nūsaukumu tom gleznom. Latgolys obrozi – eisti lobs nav, maņ beja variants, ka tuos varātu byut Latgolys freskys. Vīsturam Kairišam tys patyka vyslobuok, bet jis puorveiduoja jū vīnskaitlī.”

Režsisors Vīsturs Kairišs papyldynoj: “Vīnskaitlī, partū ka gon Anna ir itei freska, gon tod jei teik personificāta, īmīsuota Latgolā. Obrozs ir ikona, a freska ir daudz plašuoks jiedzīņs. Koč ari latgaliski napastuov puorlykums vuordam “freska”, tys tūmār ir storptautysks. I navajadzātu itam nūsaukumam tulkuojumu baļtiski, tys vysim saprūtams, skaists i poetisks.”