Rokstu sagataveja: portals lakuga.lv

Latgolys viestnīceibā GORS 1. majā nūtiks koncerts “Celīs, bruoļ!”, kurymā izskanēs dzīsmis nu Latgolys kongresa symtgadis albuma “Celīs, bruoļ!” i cytys skaneigys latgalīšu melodejis. Tuos izpiļdeis gon jau labi zynomi, gon ari pavysam jauni, dažaidus muzykys stylus puorstuovūši muokslinīki. Koncerts ir eipašs veļtejums gruomotu raksteituoja Andryva Jūrdža pīmiņai, jam itūgod – 175.

Koncertā “Celīs, bruoļ!” pīsadaleis taidi muziki kai – Juoņs Aišpurs (The Sound Poets), Arņs Slobožanins (Dabasu Durovys), Guntis Rasims i Jurs Vucāns (Bez PVN), Ēriks Zeps i Madara Broliša (Rikši), Juris Ostrovskis (Dvinskas muzykanti), Jana Dudare (Piparmētra), Ingars Gusāns (Sovvaļnīks), Vinsents Kūkojs (Trikmīņs), Ansis Ataols Bērziņš (Maskačkys muzykanti), Ausmeņa Records, Veiru kors “Graidi”. Koncertā varēs dzierdēt gon Atmūdys laika himnys “Pīmiņ, bruoļ!”, “Skaidra volūda”, gon jaunuoku laiku kompozicejis, kai “Īt muna tauta”, “Screen”, “Pusnakts triādis”, “Babeņa”, gon ari taidys latgalīšim tyvys melodejis kai “Tuoli dzeivoj”, “Rūžeņa”, “Jezups” i cytys. Koncertā byus dzieržams ari kaids dzīsmis pyrmatskaņuojums ar Andryva Jūrdža tekstu.

Andryvs Jūrdžs (1845–1925) beja latgalīšu literats i gruomotu raksteituojs latiņu drukys aizlīguma laikā. Īvāruojamuokais Latgolys rūkroksta gruomotnīceibys puorstuovs, enciklopedists, tautsaimnīcisku i vyspuorizgleitojūšu padūmu deviejs. Sarakstejs, puorrakstejs ci iztulkuojs vaira nakai 20 bīzu siejumu, dažu pat 1000 puslopu bīzumā.

Koncerta “Celīs, bruoļ!” beleti nūpierkami bilesuparadize.lv, latgalesgors.lv i GORS kasī.