Ar albumu “Dziesmas no Aulejas” grupa “Tautumeitas” atsgrīž pi pyrmsuokumu

Ar albumu “Dziesmas no Aulejas” grupa “Tautumeitas” atsgrīž pi pyrmsuokumu

Roksa autors: portals lakuga.lv

Grupa “Tautumeitas”, kas plašuokai sabīdreibai pazeistama ar postfolklorys dzīsmem, janvarī izdavuse albumu “Dziesmas no Aulejas”, kurymā apkūpuotys autentiskys Aulejis pusis dzīsmis. Albums vinila platis i kompaktdiska formatā izdūts gon Latvejā, gon Vuocejā. Sovā ziņā albums ir grupys atsagrīzšona pi pyrmuokumu – grupa “Tautumeitas” roduos, kab izpiļdeitu Aulejis pusis tradicionalū muzyku.

Aulejis tradicionaluo muzyka saistuos ar etnografiskuo ansambļa “Aulejas sievas” darbeibu, kas ir vīns nu vacuokūs ansambļu Latvejā. Ituos pusis dzīduošonys tradiceja sovulaik īinteresēja Asnati Rancāni, kura byudama J. Vītola Latvejis muzykys akademejis studente, izavēlēja sovu bakalaura dorbu raksteit par temu “Aulejas laika bolsu stilistika”. Kab pabeigtu akademeju, beja juosnādz ari eksamena koncerts, i Asnate izlēme koncertā uzastuot ar Aulejis dzīsmem i izpieteitū paruodeit praksē. Ar itū koncertu ari suocēs grupa “Tautumeitas”.

“Es uzrunuoju meitinis dzīduot ar mani kūpā eksamenā. Tei beja pyrmuo programa, kuru cīteigi i ilgi vuicejomēs. Nūdzīduojom koncerteksamenu i saprotom, ka myusim ir juoturpynoj dzīduot kūpā. Suocem radeit myusu muzyku. Sovā ziņā Aulejis dzīsmis ir “Tautumeitu” suokums, saknis. Patīseibā tys, kū mums vysvaira pateik dzīduot,” soka Asnate.

Jaunajā albumā “Dziesmas no Aulejas” īkļautys koncerteksamenā izskaniejušuos dzīsmis, Latvejā mozuok zynomys dzīmis i dzīsmis, kas atspīgelej Aulejis pusis dzīduošonys stilu. “Auleja ir unikala ar sovim daudzajim bolsim, cytur Latvejā nav tik daudz bolsu. Ir na tikai pavasara i rudiņa bolss, tolkys bolss, kuozu bolss, bet ari Juma bolss, lopu bolss, Ūgu bolss, cīši daudzi i dažaidi,” stuosta Asnate.

Klauseituojus varātu mulsynuot albuma “Dziesmas no Aulejas” atškireigī vuoceni vinila platei i kompaktdiskam. Grupys “Tautumeitas” dalineica Asnate Rancāne stuosta, ka laikā, kod tyka veiduots kompaktdisks, vēļ nabejs biļžu, kas radzamys iz vinila platis. Iz diska vuoka radzamys amsambļa “Aulejas sievas” dalineicys, bet iz platis – pošys tautumeitys. Albumu var klauseitīs muzykys platformā Spotify.com.

Niu grupa gatavejās koncertam i daleibai festivalā “folkBALTICA”, kas majā nūtiks Vuocejā, tymā “Tautumeitas” izpiļdeis Aulejis dzīsmis. Rudinī planavuots koncertūs prezentēt jaunuo albuma programu.