Roksta autors: portals lakuga.lv

5. februarī 92 godu vacumā myužeibā aizguojs žurnalists, muokslys zynuotnīks, kulturviesturnīks, filozofejis habilitātais doktors profesors PĪTERS ZEILE.

Jis sevi vysod skaitejs par Latgolys kulturviesturis entuziastu i ceņtīs giut sevī vysu ar tū saisteitū. 2006. godā izguoja juo apjomeiguokais dorbs “Latgales kultūras vēsture. No ledus laikmeta līdz mūsdienām”– 800 puslopu bīza gruomota – 12 godus gara i naatlaideiga pietnīceibys dorba rezultats. Jis ir ari apjūmeiguos monografejis “Latgales glezniecība” (2009) autors.

Sūpluok apjūmeigim dorbim topuši ari tematiski šauruoki pietejumi, kai “Vertikāles. Osvalds Zvejsalnieks no Zvejsalām” (2004), “Meistars no Ušpeļu dzimtas” (2007) par keramiki Pīteri Ušpeli, “Konstantīns Raudive” (2009), „Rainis un Latgale” (2012) “Dzīves patiesībai un skaistumam” (1967), „Estētiskā doma Latvijā (līdz 1940. gadam)” (1976), „Personība un vērtības” (1979), „Titānisms, pseidotitānisms un māksla” (1995) i c. Kai profesors Latvejis Muokslys akademejā lasejs estetikys viesturi, estetikys i muokslys kritikys, teorejis i metodologejis kursus, Latgolys kulturys viesturis kursu tūreizejā Rēzeknis augstškolā.

Par raksteišonys prīcu pats profesors ir sacejs tai: “Maņ pošam šaļtim gryuši nūdaleit, kur es asu raksteituojs žurnalists, kur asu kulturviesturnīks. Runuot par abstraktu ideņtitati navar. Maņ kai Muokslys akademejis pasnīdziejam maizis dorbā raksteišona it kai saīt blokuslīta. Bet, gūdeigi sokūt, tei vysod beja sirdslīta.”

Izvadeišona sastdiņ, 8. februarī, 12 stuņdēs nu Reigys 1. Meža kopu kapleicys.