Rokstu sagataveja: portals lakuga.lv

Apvīneibai “Latgalīšu Reps” pavysam dreiž izīs jauns albums “Cyta dzela”, i klauseituoju viertiejumam jī nūdūd albyma pyrmū singlu i videoklipu “Shamani”. 21. martā gaidoms ari apvīneibys solo koncerts Rēzeknē, kuram dūts jaunuo albuma nūsaukums.

Par jaunuo albuma “Cyta dzela” nūsaukumu grupys dalinīki soka: “Īmam sūli augšuok, lobuokā kvalitātē i izpiļdejumā. Dzīsme “Shamani” ir kai grāksyudze myusu interpreteacejā, kas līk aizadūmuot i īsadzilinuot tymā, cik teira sirdsapziņa ir kotram nu myusu pret leidzcylvākim i par tū, cik svareigi naaizmierst vīnam ūtru i prast pīdūt.”

Dzīsmis vuordu autori ir Didzis Kozlovs i Ivo Grigalis, muzykys autors – Niklāvs Sekačš (Niklāvz). Audio apstruodi veics Fakts (Jānis Šmediņš) “Prime Time studio”. Pi video montažys struoduojs Jānis Jēkabsons. “Latgalīšu Repa” jaunuokuo dzīsme daīmama ari Spotify, iTunes, Deezer i cytūs straumiešonys servisūs.

Grupys “Latgalīšu Reps” uzvarys guojīņs aizasuoce 2017. godā, tai bejuši vairuoki veiksmeigi hiti – “Skots pa lūgu”, “Es tycu”, “Atver durovys”, “Kūdra deg”, “Trešuo zvaigzne”, bet da šam popularuokajai dzīsmei “Žārej gali” nu pyrmuo solo albuma vītnē “YouTube” ir jau 1,8 miļjoni skatejumu. Apvīneiba sajāmuse ari Latgalīšu kulturys goda bolvu “Boņuks” par veikumu 2017. i 2018. godā. Radejis “Pieci.lv” 2018. gods 7. septembra raidejumā grupa tyka TOP pyrmajā vītā ar dzīsmi “Žārej gali”. Muziki īgivuši atzineibu nu Vaļsts prezidenta Egila Levita i tyka uzaicynuoti uzastuot juo inauguracejis sareikuojumā.

“Latgalīšu Reps” 2019. gods vosorys sezonā ir uzastuojušs taidūs pasuokumūs kai “Summer Sound”, “Ghetto Games” festivalā Ventspilī, festivalā “OGLE”, Ozola jubileja koncertā Siguldā i c.