Rokstu sagataveja: portals lakuga.lv

Nacionaluo kulturys montuojuma puorvaļde ir apstyprynuojuse Sakraluo montuojuma finansiešonys programu 2020. godam. Vaļsts finansiejumu sajāmuši vairuoki Latgolys dīvnomi atjaunuošonys dorbu veikšonai i restauracejis projektu sagataveišonai, līcynoj puorvaļdis sātyslopā publicātuo informaceja.

Sakraluo montuojuma finansiešonys programa ir izstruoduota ar mierki nūdrūsynuot vaļsts aizsargojamu kulturys pīminekļu statusā asūšu kulta celtņu, tymā skaitā Latvejis dīvnomu, i religiskūs ritualu prīkšmatu, kai nacionali nūzeimeigys kulturys montuojuma dalis saglobuošonu nuokušajom paaudzem. Finansiejumam var dasasaceit religiskys savīneibys ci naatkareigys organizacejis, kuru eipašumā ir sakraluo montuojuma kulturys pīminekli. Finansiejumu var sajimt objektu restauracejai, konservacejai ci restauracejis dokumentacejis izstruodei.

Itūgod sajimts rekordlels dasacejumu skaits, līcynoj puorvaļdis sātyslopā publicātuo informaceja. Kūpumā dasaceiti dorbi 108 objektūs par 4,43 miljonim eiro. Programys ītvorūs finansiejums daškierts 23 objektim 500 tyukstušu eiro apmārā.

Sakraluo montuojuma programys 2020. godam ītvorūs finansiejumu sajāmuši itaidi Latgolys dīvnomi – Aleksandra Nevska pareizticeigūs bazneica Daugovpilī restrauracejis projekta izstruodei, Ismeru vacticeibnīku kūpīnys lyugšonu noms restrauracejis projekta izstruodei, Kampišku vacticeibnīku kūpīnys lyugšonu noms lūgu restauracejai, Leiksnys katuoļu bazneica jumta remonta pabeigšonai, Nīderkūnu vacticeibnīku lyugšonu noms ikonys “Dīvmuote” restauracejai, Pušys katuoļu bazneica lūgu restauracejai, Sarkaņu zvonu tūrņs-kapleica restauracejai i Veiksnys pareizticeigūs bazneica restauracejis projekta izstruodei.