Popularuokī latgalīšu uzvuordi

Popularuokī latgalīšu uzvuordi

Rokstu sagataveja: portals lakuga.lv

Uzvuords ir naatjamama cylvāka identitatis daļa, i reizem tam ir nūzeime prīškstota radeišonā par konkretū personu. Kod īsapazeistam ar kaidu, kura uzvuorda izskaņa ir -āns/-āne, šaubu nav – juo seņči īt nu Latgolys. Itei sovulaik beja vysizplateituokuo latgalīšu uzvuordu izskaņa.

Latgalīšu uzvuordu pietnīceibā nūzeimeiguokais izdavums ir Ilmāra Meža gruomota “Latviešu uzvārdi arhīvu materiālos: Latgale” (2017), tymā īkļautys zinis ar teju 4000 Latgolys latvīšu uzvuordim. Pietnīks pamatā sovu dorbu baļstejs iz 1935. gods tautys skaiteišonys datim, dūdūt zinis, kaidi, kur i cik daudz uzvuordi beja izplateiti Latgolā. Gruomotā skaidruotys ari uzvuordu nūzeimis. Portals lakuga.lv, bolstūtīs iz gruomotā daīmamū informaceju, apkūpuojs 20. g. s. 30. godūs popularuokūs latgalīšu uzvuordus. I. Mežs, apkūpojūt arhiva materialus, īgiutūs uzvuordus saleidzynuojs ar myusu dīnuos pījimtū uzvuordu raksteibu, i piec īspiejis apvīnuojs vīna uzvuorda dažaidys versejis. Izškirūšs arguments, apvīnojūt vīna uzvuorda variantus ci leidzeigus uzvuordus, beja izplateibys pryncyps. Ka vīnā pogostā ci tivejūs pogostūs beja sastūpamys obejys uzvuorda versejis, tys tyka skaiteits par vīnu uzvuordu, sovukuort, ka leidzeigi uzvuordi beja sastūpami cytā Latgolys apleicīnē, tod tī tyka skaiteiti par atseviškim uzvuordim, roksta I. Mežs. Sovā pietejumā jis fiksiejs latgaliskūs uzvuordu latgaliskū i literarū formu. Gruomotys dati naatspīgeļoj šudiņdīnys situaceju.

Karteņa: portala lakuga.lv grafiks

Ločmels, Ločmeļs/Luočmeļs, Ločmelis (1883)

Itys ir vysizplateituokais latgalīšu uzvuords. Vysbīžuok beja sastūpams četrūs pogostūs – Baļtinovys, Saļņovys, Brīžucīma i Vactiļžys. Mynāts jau 1765. gods revizejis materialūs. Uzvuorda izceļsmi saista ar vuordu luocs.

Strods (1755)

Itys uzvuords beja sastūpams daudzūs pogostūs, vysvaira Murmastīnis pogostā. Strod mynāts 1712. gods revizejis materialūs nu Sakstagola voitistis. Storpkaru periodā zynomuokais cylvāks ar itū uzvuordu beja profesors, filologs, literats i goreidznīks Pīters Strods, kurs veice nūzeimeigu dorbu latgalīšu rokstu volūdys nūsacejumu izstruodē.

Logins (1740)

Itys uzvuords vysvaira beja sastūpams Mednevys pogostā. Mynāts jau 1765. gods revizejis materialūs nu Timšānu (Baļtinovys) voitistis.

Kokins (1577)

Itys uzvuords vysbīžuok beja sastūpams Naujenis pogostā, kai ari Leiksnys, Vabalis, Ambeļu, Kolupa i cytūs Dīnvydlatgolys pogostūs. Kokin mynāts 1765. gods revizejis materialūs nu Vecpiļs pogosta.

Buls, Buļs, Bulis (1392)

Personu skaits ar ituo uzvuorda dažaidajom formom myusu dīnuos tyvojās pusūtram tyukstušam, nūruodeits I. Meža gruomotā. Itys uzvuords beja izplateits Ludzys apleicīnē, vysvaira Cyblys pogostā. Myusu dīnuos itū uzvuordu parosti roksta kai Buls ci Bulis. Osyuna pogostā forma Buls ir jau vysmoz nu 18. g. s. Itam uzvuordam, īspiejams, ir suomugriska ciļme.

Vaivads, Vaivods, Vaivada (1188)

Itys uzvuords eipaši beja izplateits Upmolys pogostā. Mynāts 1765. gods revizejis materialūs  nu Osyuna i Plisūnu voitistis. Itū uzvuordu saista ar lītuvīšu uzvuordu Vaivada, kū sovukuort saista ar lītuvīšu volūdys vuordu, kas nūzeimoj armejis komaņders ci administrativys vīneibys puorvaļdnīks.

Pastars, Pastors (1174)

Itys uzvuords vysizplateituokais beja Saunys i Rībeņu pogostūs. Nūzeimi saista ar lītuvīšu izceļsmis vuordu pastaras, kas nūzeimoj pādejais.

Print Friendly, PDF & Email

Nūtikšonu kalendars

Jan
28
Sai
12:00 Puorguojīņs pa Rēzekni “Piļsāta ... @ Rēzekne
Puorguojīņs pa Rēzekni “Piļsāta ... @ Rēzekne
Jan 28 @ 12:00 – 15:00
28.janvarī gaidoms puorguojīņs pa Rēzekni “Piļsāta pi upis i storp stacejom”. Plānuots apmāram 3 stuņžu laikā nūīt ap 7 kilometrim. Tū suoks pi dzeļžaceļa stacejis “Rēzekne II”, varēs izzynuot, ar kū tei ir seviška. Tuoļuok[...]
21:00 “Muzikālā banka 2022” @ Daugovpiļs Olimpiskais centrs
“Muzikālā banka 2022” @ Daugovpiļs Olimpiskais centrs
Jan 28 @ 21:00 – 23:30
Daugovpiļs Olimpiskajā centrā otkon nūtiks Latvejis Radejis 2 goda vierteiguokūs pop i rokdzīšmu aptaujis “Muzikālā banka 2022” apbolvuošonys ceremoneja. Jau īrostai “Muzikālās Bankas” finala koncertšovs byus dinamiski kruošņs, muzykali vierīneigs i īspaideigs, pīsadolūt aizvadeituo gods Latvejis[...]