Sveicūt Ilgu Šuplinsku dzimšonys dīnā, dažys atminis

Sveicūt Ilgu Šuplinsku dzimšonys dīnā, dažys atminis

Roksta autors: Agris Bitāns

Pyrms dažom dīnom portals lakuga.lv mani uzrunuoja pīraksteit dažys atminis par niulinejū izgleiteibys i zynuotnis ministri i dedzeigū Latgolys i latgalīšu interešu aizstuovi Ilgu Šapulinsku, tai sveicūt jūs opolajā dzimšonys dīnā. Ar prīcu atsasauču.

Dzeive mani ar Ilgu savad taidym kai riņčim. Vyss suocēs Latgolys Studentu centra (LgSC) laikūs deviņdasmytū godu suokuos. Juosaka, ka ir cīši juopīdūmuoj, lai varātu atsacerēt, kurā fakultātē Ilga tymā laikā vuicejuos, bet zynuoju, ka Latvejis Universitatē. Pyrmais, kas izzibsnej atmiņā ir tys, ka Ilga beja aktiva i narunuoja aplynkus. Ka kaut kas napatyka, šuove vaļā. Suokumā varātu liktīs, ka jei ir cīši šerpa, bet vāluok jau varēja saprast, ka taids ir juos raksturs. Itū var redzēt vēļ šudiņ. Tai ar LgSC puišim beja eisa i konkreta saruna. Gara pļuopuošaona i iuduņa līšona Ilgu nainteresēja. Varēja just, ka ar sportu jei beja iz tu, jo fiziska dorba nasabeida. Tū labi varēja radzēt tolkuos, pīmāram, kod leitā beja juosakūp Biežgaļa parks. Piec tam vokorā jei varēja nūskaiteit dzejūli muzejā.

Taipoš jei navarēja byut pasiva situcejis vāruotuoja – navarēja nūsēdēt mīreigai voi LgSC pasuokumūs, voi leluokūs nūtykumūs. Kai pīmāram, Pyrmajā latgalīšu saītā, kod tyka gotavuota rezoluceja, jei pīguoja pi mani ar Aivaru Mackeviču i Ivaru Lītaunīku, vaicuoja, voi asam apmīrynuoti ar pīduovuotū rezolucejis projektu. “Jius ite tai sēdēsit voi koč kū dareisit?” Beja skaidrys, ka pīduovotais projekts jai izavēre puoruok meiksts i plīkons. Kū lai dora, ka myusu – LgSC – īsacejumus najam vārā? Naatcerūs, voi tei beja juos ideja, bet beiguos tyka saraksteita i izsludynuota LgSC rezoluceja.

Ilga itamā ziņā nav mainejusīs – jei navar buyt pa vydam. Jei voi nu dora – voi skaidri pasuoka, ka napīsadola. Lelu politkorektumu nu juos daudz nedzierdiesi. Jai nav rakstureigs mieginuot izpatik voi atstuot lobu īspaidu. Parosti politikim gribīs vysim patik i byut popularim, bet tys nav par Ilgu.

Jai svareigs navys process, bet rezultats. Ka kas napateik, jei tai ari skaidri pasoka. Lītys ir juosauc tai, kai ir, i juorysynuoj problemays, pat, ka tys nav populari. Jai napateik lelī runuotuoji, nu kuru dorbu ir viņ “čuš”. Dorbi ir tī, kas aplīcynuoj, kas tu esi par cylvāku. Itū varēja labi redzāt Latgolys kongresa symtgadis sagatavuošonys laikā. Tī nebeja vyss tik vīglai i vīnkuoršai gon pi organiziešonys, gon pi nūvadeišonys. Beja daudz kritisku situaceju. I juoatzeimej juos drūsme, jo cyts meiluo mīra deļ, byutu bejs gotovs pīsakuopt. Tikai na Ilga! Ilga nanūsabeida, i beja gotova īt leidz golam. Tys kū jei vaicuoja – skaidreibu, voi tu izdareisi, kū sūlieji, i voi gryutā breidī napasadūsi voi napazussi. Beja juobyun skaidram reiceibys planam, kurs beja juoizpylda. Skaidrys, ka vyss nanūteikt piec plana i situaceja mainuos, bet jei nūviertej tūs, kas načeikst i nasuok ar 100 attaisnuojumim, kamdeļ tys voi cyts nasaguoja, bet cik daudz esi izdarejs, kas beja nu teve atkareigs i pa viersu. Tamdeļ jei cīši aktivi reagej iz tim cylvākim, kas mieginoj mozuok dareit, bet pi svātku golda ir pyrmī i sevi līlej. Jei cīši nūviertiej tūs cylvākus, kas tur sovu vuordu, it seviški tod, kod tys nav bejs vīglai. Ari iz Ilgu var pasaļaut. Tys, kū var vēļ atzeimuot, ka kritiskuos situacejuos Ilgai nav sīvītem rakstureiguo emocionaluo reakceja – vaimaniešona, ir problema – jei ir juorysynoj i navys juovaimanej.

Lai Ilgai izadūd kai Latvejis, tai ari Latgolys lobā izdareit pie īspiejis vaira!

Print Friendly, PDF & Email