Radeitys jaunys latgalīšu uzleimis aplikacejom “WhatsApp” i “Telegram”

Radeitys jaunys latgalīšu uzleimis aplikacejom “WhatsApp” i “Telegram”

Roksta autors: portals lakuga.lv

Latgalīšu portals lakuga.lv papyldynuojs aplikaceju “WhatsApp” i “Telegram” latgaliskūs uzleimu kluostu, īkļaunūt jaunus kasdīnys saziņā lītuotus vuordus i frazis. Digitaluos uzleimis radeitys ar mierki ceļt latgalīšu volūdys prestižu i veicynuot tuos lītuojumu.

2019. gods nūgalē “Latgalīšu kulturys ziņu portals lakuga.lv” prezentēja aplikaceju “Latgalian stickers”/ “Latgalīšu uzleimis”, pīduovojūt sazinis aplikacejā “WhatsApp” integrēt viertini latgalisku vuordu i fražu i izmontuot tuos syuteišonai sarakstēs ar rodim, draugim i kolegom. Vāluok uzleimis tyka pīduovuotys ari aplikacejis “Telegram” lītuotuojim.

Svynūt 27. apreli kai Latgolys kongresa dīnu, portals lakuga.lv papyldynuojs uzleimu kluostu ar jaunim latgalīšu vuordim i frazem, par pīmāru, “Lai lūbās!”, “Lyudzu!”, “Veseļojīs!”, “#nameiz”, “Troks voi nu Rogovkys?”, “Cīšs apskuovīņs!” i c. Kūpumā aplikacejā daīmamys 42 uzleimis.

Uzleimu izveidē portals lakuga.lv sasadorbuoja ar dizaineri Inesi Krivmani i programātuoju Juoni Rancānu. Tūs izveidi finansiali atbaļsteja ASV dzeivojūšais latgalīts, uzjiemiejs i Latvejis gūda konsuls Teksasys štatā Pīters Aloizs Ragaušs.

Digitaluos uzleimis radeitys latgalīšu volūdys prestiža ceļšonai i lītuojuma pīauguma veicynuošonai.

“Asmu gandareits i prīceigs, ka uzleimis ir givušs atsauceibu, i ceru, ka papyldynuotuo verseja aplikacejis lītuotuojim patiks,” soka P. Aloizs Ragaušs.

Lītuotnei “WhatsApp” dūmuotuo aplikaceja “Latgalian stickers”/ “Latgalīšu uzleimis” bezmoksys daīmama Android operātuojsistemys mobilūs īreiču lītuotuojim. iPhone lītuotuojim cikom aplikaceja nav daīmama, jo nu uzjāmuma “Apple” natyka sajimts akcepts tuos īvīsšonai. Idejis autori itūšaļt struodoj pi cytu rysynuojumu, lai uzleimis byutu daīmamys ari iPhone eipašnīkim. Cikom iPhone lītuotuoji “WhatsApp” sajimtuos latgalīšu uzleimis nu Android sistemu lītuotuoju var saglobuot kai “Favorīti/Favourite” (juoizspīž iz uzleimis i juosekoj tuoļuok nūruodeitojim darbeibom) i izmontuot syuteišonai.

Sovukuort lītuotnis “Telegram” izmontuotuoji bez īrūbežuojumu uzleimis var lītuot gon sovūs Android, gon iOS tuolruņūs.

Uzleimis “WhatsApp” lītuotuojim Android telefonūs

https://play.google.com/store/apps/details?id=com.ltg.stickers

Uzleimis “Telegram” lītuotuojim Android i iOS telefonūs

https://t.me/addstickers/LatgalianStickers

Jau asūšajim uzleimu lītuotuojim papyldynuotuo verseja byus daīmama, apstyprynojūt aplikacejis atjaunynuojumus. “WhatsApp” lītuotuojim piec atjaunynuojumu veikšonys juoatver uzleimu aplikaceja i juonūspīž “Add to WhatsApp”.

“Latgalīšu kulturys ziņu portals lakuga.lv” ir pasaulī vīneigais tikai latgalīšu rokstu volūdā saturu rodūšs medejs. Tymā var skaiteit par Latgolys i latgaliskuos kulturys aktualitatem, intervejis ar sabīdreibā zynomim cylvākim, kai ari atrast vierteigus materialus latgalīšu volūdys zynuošonu uzlobuošonai. Portalu lakuga.lv uztur bīdreiba “Latgolys Studentu centrs”. Portalu i bīdreibys itūšaļt atbolsta Vaļsts kulturkapitala fonds.

Print Friendly, PDF & Email