Gribi atrast sovu aizaraušonu? Dasasoki spēlei!

Gribi atrast sovu aizaraušonu? Dasasoki spēlei!

Rokstu sagataveja: portals lakuga.lv

Nu 7. da 21. majam sadarbeibā ar British Council puorstuovnīceibu Latvejā i vuiceibu centru “Cilvēkam” teik organizāta bezmoksys tīšsaistis vuiceibys “Atrodi savu aizraušanos” Latgolys īdzeivuotuojim. Tūs mierkis ir paleidzēt izzynuot sevi i elasteiguok pīsamāruot dorba tierga puormaiņom, informej vuiceibu centra puorstuove Dženifera Ruisa.

Sevkuram Latgolys īdzeivuotuojam nu 18 godu ir unikala īspieja bez moksys nu 7. da 21. majam apgiut metodis, kas paleidzēs izzynuot sevi i ļaus elasteiguok pīsamāruot dorba tierga puormaiņom, kab nuokūtnē atrostu sev pīmāruotuokū dorbu, nūzari voi vierzīni dzeivē. Dalinīki aizdavumus varēs piļdeit sev ārtā laikā i vītā, golvonais, lai ir daeinams dators voi telefons ar internata daslāgumu.

“Krize, kas izaveiduojuse Covid-19 deļ, ir skuoruse sevkuru, it eipaši dorba jūmā, par tū ir cīši svareigi cylvākim itymā laikā paleidzēt saprast, kurp vierzeitīs tuoļuok piec krizis beigu. Tīšsaistis spēlis vuiceibu programa ir veiduota tai, lai tei byutu nūdereiga i pīmāruota sevkuram, gon tim, kuri krizis deļ ir zaudiejuši dorbu i ir naziņā par tū, kaidā dorba jūmā fokusētīs nuokūtnē, gon ari tim, kuri asūšajā dorbā nasajiut kai eistajā vītā voi ir jauna dorba mekliejumūs, taipoš ari pedagogim, kuri struodoj ar dažaidom auditorejom i piec vuiceibu spēlis varēs daleitīs ar apgiutajom metodem, kai ari cytim cylvākim,” tai par spēli soka tuos veiduotuojs Zuarguss Zarmass nu vuiceibu centra “Cilvēkam”. Jis nūruoda, ka projekts byus vysvaira pīmāruots bez dorba palykušim cylvākim, kuri itūšaļt nazyna, kurā vierzīnī dūtīs tuoļuok; jaunīšim, kuri navar izlemt, kur studēt, par kū vuiceitīs; jau struodojūšajim, kuri dorbā eisti nasajiut sovā vītā voi rutinys deļ grib kū maineit; jaunajim mamom, kas grib puormainis dorba ritmā piec bārna kūpšonys atvalinuojuma; vītejūs kūpīnu puorstuovim i pedagogim, kuri varēs ar apgiutojom metodem daleitīs sovā lūkā; uzjiemeigajim, kas sepinej par sovys uzjiemiejdarbeibys suokšonu, bet svuorstuos ci eisti nazyna, ar kū suokt.

Projekta ītvorūs vuiceibys nūtiks diveju nedeļu garumā tīšsaistis spēlis veidā, kurā dalinīki piļdeis aizdavumus i kruos punktus. Spēlis nūslāgumā dalinīki sajims bolvys. Lektors Zuarguss Zarmass stuosta: “Poša spēle nūtiks itai: 14 dīnys spēlis dalinīki eipašā spēlis platformā sajims vīnu voi div aizdavumus par tū, kai izzynuot sevi, meklēt sovu eistū aizaraušonu, dorbu voi nūzari, kai ari par spieju pīsalāguot i veiksmeigai tikt golā ar izaicynuojumim dorba tiergā. Kotrys dīnys aizdavumu piļdeišona var aizjimt nu 10 minotu da stuņdei, atkareibā nu tuo, cik daudz kotrys dalinīks gribēs īsaguļdeit. Spelē tiks veicynuota dalinīku sovstarpejuo komunikaceja, atbolsts i kontaktu veiduošona, kuo rezultatā var veiduotīs veiksmeigi projekti nuokūtnē.” Vītu skaits spēlē ir īrūbežuots.

Dasacejuma anketa latvīšu literarajā volūdā ite.

Vuiceibu spēle “Atrodi savu aizraušanos” Latgolā teik veiksmeigi organizāta jau vairuokus godus i tymā ir pīsadalejuši vaira nakai 200 dalinīku.