Školānus aicynoj pīsadaleit Robertam Mūkam veļteitā konkursā
Rokstu sagataveja: portals lakuga.lv
Izsludynuots dzejnīkam i religeju pietnīkam Robertam Mūkam veļteits jaunradis dorbu konkurss. Tymā aicynoj pīsadaleit Latvejis vyspuorizgleitojūšūs školu i arūdškolu 2.–12. klasis audziekņus.
R. Mūkam veļteitais jaunradis dorbu konkurss itūgod nūteik jau 15. reizi i tū organizej Gaļānu Kulturviesturis bīdreiba sadarbeibā ar Rībeņu nūvoda dūmi, Roberta Mūka muzeju i Gaļānu pamatškolu. Konkursa mierkis ir školānu dūmu, izjiutu i puordzeivuojumu atkluosme jaunradis dorbūs.
Kai konkursa tema itūgod izvālāti R. Mūka raksteitī vuordi “Paskaties uz sevi no augšas un tad no apakšas. Ko tu tur redzi?”. Dalinīku aizdavums ir pīraksteit sevkura žanra jaunradis dorbu atbylstūši temai, izavielejūt sovu viersrokstu. Dorba apjūmam juobyun leidz div A4 formata lopom datorsalykumā. Konkursa dorbus gaideis leidz 2020. gods 13. oktobram. Lobuokūs dorbu autori tiks aicynuoti iz apbolvuošonys pasuokumu 13. novembrī Gaļānu pamatškolā. Konkursa nūlykums daīmams ITE.
Zynuotnīks Roberts Mūks, eistajā vuordā Roberts Avens, dzims 1923. goda 14. janvārī Rēzeknis apriņčī, Vydsmuižys (Gaļānu) pogostā. Ūtruo pasauļa kara nūtykumu deļ devēs trymdā i Latvejā iz pastuoveigu dzeivi atsagrīze tikai deveņdasmytajūs godūs. Myužeibā R. Mūks aizguoja 2006. goda 4. janvarī i tyka paglobuots Gaļānu kopūs. Sova myuža leluokū daļu veļtejs filozofejai i religeju pietnīceibai, rakstejs ari dzeju.
