Rokstu sagataveja: portals lakuga.lv

Viļakas nūvoda folkloras kūpa “Upīte” izdavuse Zīmeļlatgolas veiru dzīšmu albumu “Padzīdam i…”, kura īrokstā rādā folkloras kūpas dalinīkim pīsadalejuši ari Renārs Kaupers, Kaspars Zlidnis, Jānis Strapcāns, Kristaps Rasims, Guntis Rasims, Katrīna Dimanti i cyti. Albuma prezentaceja paradzātu 20. junī Upītē nūteikūšajā pasuokumā  “π-dzīdam”.

Jaunajā albumā, kas ir jau catūrtais folkloras kūpas albums, vydā ir 17 Zīmeļlatgolas dzīsmes. Tuos sovas dzeives laikā nu Upītes puses teicieju pīrakstejs nūvodpietnīks, dzejnīks, folklorists Ontons Slišāns (1948–2010). 2009. gadā Ontons Upītes Tautas nomā vadeja meistardarbneicu “20. godu symteņa pyrmuos puses vusvaira dzīduotuos veiru dzīsmes Upītes apkuortnie”, kas bejuse kai īrūsme folkloras kūpas vadeituoja Andra Slišāna idejai par itūs dzīšmu īraksteišonu albumā. 14 albuma dzīsmes ir taišni nu ituos meistardarbneicas, bet tuos albuma papyldynuotas vēļ ar trejom Upītes puses dzīsmem. Kai mozi bārni veiru dzīšmu meistardarbneicuos sovulaik pīsadalejuši ari folkloras kūpas dalinīki, Ontona Slišāna mozbārni Kate i Domeniks Slišāni, kuri niu ir dzīšmu 2020. goda apdaru autori.

Albuma īrokstā rādā folkloras kūpas “Upīte” dalinīkim pīsadalejuši i Zīmeļlatgolas dzīsmes īdzīduojuši ari Latvejā labi zynomi muziki – Renārs Kaupers, Kaspars Zlidnis, Jānis Strapcāns, Kristaps Rasims, Guntis Rasims, Katrīna Dimanta, Arnis Slobožanins, taipat īrokstā pīsadalejuši ari Viļakas katuoļu draudzes pravests Guntars Skutels, grupa “Unknown Artist” i cyti.

“Padzīdam i…” vizualū stuostu taisejuši Jēkabs Slišāns i Artūrs Slišāns, dzīšmu īrokstus apstruoduojs Māris Keišs. Albuma izdūšonu atbaļstejuši: Latvejas Republikas Kulturas ministreja, Latvejas Nacionalais kulturas centrs i Vaļsts kulturkapitala fonds.

20. junī Namaterialuos kulturas montuojuma centrs “Upīte” aicynoj iz tradicionalū īrūtuošonu Viļakas nūvodā – pasuokumu “π-dzīdam”, kas reizē byus ari januo albuma “Padzīdam i…” prezentacejas pasuokums. Albuma prezentaceja īcarāta 17.00, bet vokora koncerta programa nu 18.00. Pasuokumā itūgod pīsadaleis folkloras kūpa “Upīte”, grupa “Unknown Artist”, grupa “All Day Long”, kai ari “The Evening Sun” i apvīneiba “Kei-Rei”. Īīšona albuma prezentacejas pasuokumā bezmoksas, vokora koncertā – 1,00 €, nūpārkūt beletu īprīškpuordūšonā bezrindas.lv. Pasuokuma nūrisē byus īvāruoti vysi pošu reizi nūsaceitī puļciešonups īrūbežuojumi i drūseibas nūsacejumi.