Latgalīšu rokstu volūdys 10 vīnkuorši lykumi

Latgalīšu rokstu volūdys 10 vīnkuorši lykumi

Roksta autors: portals lakuga.lv

Kai dreižuok i efektivuok apgiut raksteišonu latgaliski? Kai napīļaut tipiskys klaidys? Pīduovojam suokt īvāruot vīnkuoršys, populari izskaidruotys 10 pareizraksteibys normys. Sataisit špikeri i rokstit pareizi!

1. Burtu i, e prīškā nikod nav meikstynuojuma:

na ņiu, a niu

na ņedeļa, a nedeļa

na ļeļe, a lele (lelle)

na ļela ļīpa, a lela līpa

2. Lītvuorda nominativa golūtnis patskaņs palīk ari lokativā (kur?):

na Latvejī, a Latvejā

na sejī, a sejā

na klasī, a klasē (klasēs)

 na prīdī, a prīdē (prīdēs)

piļs (pilis), pilī (pilīs)

sirds (sirdis), sirdī (sirdīs)

3. Darbeibys vuordūs piec j navar byut e:

na guoje, a guoja

na skrēje, a skrēja

na runuoje, a runuoja

na skaiteje, a skaiteja

4. Latgalīšu vuordi nikod nasasuoc i nasabeidz ar y:

na yudiņs, a iudiņs

na Yugulova, a Iugulova

na vasaly, a vasali

na kolny, a kolni

5. Piec g i k vysod roksta i:

na gyut, a giut

na škyut, a škiut

na puiškyns, a puiškins

6. Šk nikod nameikstynoj:

na Šķaune, a Škaune

na šķaudeit, a škaudeit

7. Itūs vuordus latgaliski roksta bez š golūtnē:

na garš, a gars

na karš, a kars

na kurš, a kurs

na varš, a vars

na suojš, a suojs

na viejš, a viejs

na vuojš, a vuojs

na kumeļš, a kumeļs

8. Itūs eipašeibys vuordus latgaliski roksta ar o:

na dzaltans, a dzaltons

na voskans, a voskons

na garans, a garons

na slovans, slovyns, a slovons

na mārans, a mārons

na ramdans, rondans, a rondons

9. Itūs vītnīkvuordus roksta itai:

na as, asj, a es

na mjas, a mes

na jys, a jis

na mjaņ, a maņ

na tjav, tjau a tev

10. Itūs darbeibys vuordus roksta itai:

na jir, jer, a ir

na bjivt, bivt, bjiut, a byut

Medeju atbolsta fonda īguļdejums nu Latvejis vaļsts budžeta leidzekļu. Par roksta saturu atbiļd portals lakuga.lv.

Print Friendly, PDF & Email

Nūtikšonu kalendars