Rokstu sagataveja: portals lakuga.lv

Nūsaslāguse 2020. gods Kulturys pīminekļu konservacejis i restauracejis programys konkursa 2. kuorta. Tymā atbolstu sajāmuši pīci Latgolys kulturys pīminekli, līcynoj Nacionaluos kulturys montuojuma puorvaļdis sātys lopā publicātuo informaceja.

Kulturys pīminekļu konservacejis i restauracejis programys aizdavums ir sekmēt i atbaļsteit vaļsts aizsorgojamūs kulturys pīminekļu izpieti, konservaceju i naatlīkamu restauraceju, nūdrūsynojūt leidzekļu sadali piec īspiejis plošuokam objektu i pasuokumu kluostam, kab gluobtu leluoku kulturys montuojuma apjūmu Latvejā.

Programys konkursa 2. kuortā finansiejumu sajāmuši pīci Latgolys kulturys pīminekli. Leidzekli daškierti Muokūņkolna vydslaiku piļs apdraudātuokūs myura daļu stuprynuošonai, konservacejai, Landskoronys katuoļu bazneicys myura žūga gluobšonys dorbim, Škeļtovys pareizticeigūs bazneicys jumta saguma, grīstu, dzagu i greidu remontam. Kotram nu itūs objektu finansiejums daškierts 10 tyukstušu eiro apmārā. Devenis tyukstušys eiro daškiertys Arendolis muižys kungu sātys jumta saguma gluobšonys dorbim, bet septenis tyukstušys eiro daškiertys Slutišku sādžys saimisteibys ākys jumta saguma atjaunuošonai nakustamajā eipašumā “Slutišķi 1”.

Ūtrajā kuortā kūpumā tyka sajimti 54 dasacejumi nu vysys Latvejis, finansiejumu daškēre 20 kulturys pīmineklim par kūpejū sumu 173 400 eiro.