Kaida ir situaceja ar bārnu literaturu latgaliski?

Kaida ir situaceja ar bārnu literaturu latgaliski?

Roksta autore: Vineta Vilcāne, portals lakuga.lv

Dzymtuos volūdys saglobuošonā lela nūzeime ir tekstu skaiteišonai, i gruomotys ījam eipašu lūmu. Portals lakuga.lv vaicoj vacuokim, gruomotu autorim i biblioteku nūzaris specialistim, kai jī viertej latgalīšu bārnu gruomotu pīduovuojumu i kai mudynuot bārnus vaira skaiteit latgaliski.

Vaira juodūmoj par gruomotu izskotu i sižetu

Kasgods teik izdūtys ap 10 gruomotys latgaliski, precizu skaitu pasceit navar, jo gruomotys latgalīšu rokstu volūdā atseviški nauzskaita. Nu latgaliskūs gruomotys viņ dažys ir deļ bārnu, storp tom gon originaldorbi latgalīšu volūdā, gon nu latvīšu literaruos volūdys puorlyktuos iz latgalīšu rokstu volūdu i tulkuotuos gruomotys. Uzrunuotī vacuoki, bārnu gruomotu autori i biblioteku nūzaris specialisti atzeist, ka ir par moz bārnu gruomotu latgaliski i byutu juodūmoj par pīduovuojuma palelynuošonu. Latvejis Nacionaluos bibliotekys (LNB) Bārnu literaturys centra golvonuo bibliotekare Ilze Marga atzeimoj, ka iz kūpejuo bārnu gruomotu fona latgaliskuos gruomotys nav pamanomys.

Tūmār viņ fakts, ka gruomota dūmuota deļ bārnu, nanūsoka, ka tei bārnim ir ari saistūša. Div bārnu mama Helēna Viļuma atzeimoj, ka latgalīšu bārnu gruomotom tryukst smuku ilustraceju: “Latgalīšu gruomotuos ir bārnu pošu zeimiejumi, kas cytus bārnus eisti nauzrunoj, voi nu vīnkuorša datorgrafika, kas ir primitiva. Bārnim varbyut ari pateik vīnkuorši zeimiejumi, bet maņ kai pīaugušajam ruodīs, ka tys nikaidā veidā naboguotynoj bārnu iztēli.” Kai lobuokūs pīmārus ar lobu dizainu i saturu Helēna izceļ Kārļa Skalbis “Kačeiša patmalis”, izgleitojūšuos gruomotys “Gostūs pi Boņuka” i “Skreineite”, Ontona Slišāna dzejūli “Agrys reits”.

Nasaverūt iz mozū bārnu gruomoty pīduovuojumu latgaliski, Viļumu saimē atrosts rysynuojums. “Sevkura literatura var byut latgaliski, muns veirs vacuokajam dālam skaita vysu tikai latgaliski, voi tei byutu gruomota angļu, krīvu volūdā, voi žurnals “Ir”, jis tekstu puorlīk latgaliski. Nav juopuordzeivoj par tū, ka ir moz gruomotu, jo vyss, kas pateik vacuokim voi bārnim, var tikt puorlykts latgaliski. Jam byutu jūceigi, ka tāvs suoktu gruomotys skaiteit latvīšu literarajā volūdā, ja runoj latgaliski.”

Piec dzejneicys Inetys Atpilis-Juganis dūmu latgalīšu autori beistās raksteit deļ bārnu, i tryukstūt ari motivacejis. Ineta, kura sarakstejuse divejis bārnu dzejis gruomotys latgaliski, nūruoda, ka raksteit deļ bārnu ir daudz gryušuok nakai deļ pīaugušūs. Jei valk paralelis ar školuotuoja dorbu: “Ka es byutu školuotuojs, maņ lobuok patyktu struoduot ar vydsškolnīkim nakai ar mozajim bārnim, jo ar mozajim bārni ir gryušuok. Rokstūt dzeju deļ pīaugušūs, es varu byut jebkas, es varu raksteit jebkū, munys dūmys var liduot jebkur, maņ nav baist. Rokstūt bārnu dzeju, tūmār ir juoizatāloj, kai bārns tū saprass, juodūmoj par adresatu, lai jī saprostu, lai problematika byutu saprūtama jūs vacuma pūsmam. Ka runoj par pusaudžim, ir gondreiž naīspiejami koč kū uzraksteit deļ jūs. Tys byutu miļzeigs izaicynuojums, eisti nikuo moderna pusaudžim latgaliski itūšalt nav.”

Ineta soka, ka poša nabyutu mama, vysdreižuok naraksteitu bārnu dzeju latgaliski: “Varbyut ari rostūs idejis, bet es tuos naateisteitu. Dorbojūtīs kūpā ar sovim bārnim, idejis atīt nu dzeivis, nu tuo, kū mes dorom, redzim. Kaida dūma manī aizaker i es jū atteistu tuoļuok.”

Meldra Gailāne, kura sarakstejuse stuostu gruomotu “Meikuleņš īpazeist omotus”, atzeist, ka jai latgaliski raksteit nav vīgli. Suokūtnieji itei gruomota bejuse saraksteita latvīšu literarajā volūdā. “Filologejis studeju ītvorūs beja praseiba koč kū puorlikt latgaliski. Kab tuoli nameklēt, puorlyku sovus stuostus latgaliski,” par gruomotys latgaliskuos versejis topšonu stuosta Meldra. “Kai byutu vysu iz reizi pīraksteit latgaliski, es nazynu. Lai ari runoju latgaliski, dūmoju vaira es tūmār latvyski, i tys gon jau traucātu raksteit iz reizi latgaliski. Bārnim eistyn ir gryuši raksteit, deļtam ka jī iz reizi sajuss naeistumu. Bārnim rokstūt ir juobyun patīsam, vysupyrma jau pret sevi.”

Vīns nu veidu, kai bārnūs radeit leluoku vēļmi skaiteit latgaliski, byutu iz latgalīšu volūdu tulkuot kvalitativys uorzemu autoru gruomotys, kurys lobpruot bārni skaita cytuos vaļstīs, i iz latgalīšu volūdu puorlikt latvīšu autoru gruomotys.

Mama Helena uzskota, ka bārnim latgaliski patyktu skaiteit ari gruomotys par animacejis filmu varūnim, i tys byutu lobs turpynuojums ekranūs radzātajam.

Juoatzeimoj, ka latgaliski daīmamys ari dažys interaktivys bārnu gruomotys. Vīna nu tūs ir latgalīšu tautys dzīšmu gruomota “Zalta puče”, kurai kluotyn dalikts CD.

Bibliotekuos nav pīprasejuma piec bārnu gruomotu latgaliski

Preiļu golvonuos bibliotekys bārnu literaturys nūdalis vadeituoja Vilhelmīne Jakimova atzeist, ka jūs bibliotekā nav lels pīprasejums piec bārnu gruomotu latgaliski, bibliotekys plauktūs ari ir viņ dažys. Mozū interesi jei skaidroj ar tū, ka kūpumā Preiļu nūvods viesturiski nav bejs tik latgalisks kai cyti sābru nūvodi.

Piļneigi vysys izdūtuos bārnu gruomotys latgaliski ir daīmamys LNB, jo bibliotekai piec lykuma ir juosajam kotrys Latvejā izdūtuos gruomotys obligatais eksemplars.

Bibliotekare I. Marga atzeist, ka ari Latvejis golvonajā bibliotekā nav pīprasejuma piec bārnu gruomotu latgaliski, i puorsvorā gruomotys latgalīšu volūdā mozūs laseituoju rūkuos teikūt najauši.

“Naatguodoju, ka kaids maņ kai struoduojūšam bibliotekaram Bārnu literaturys centrā byutu vaicuojs, lai paleidzu sameklēt gruomotu latgalīšu volūdā. Pa munam, tuos teik pajimtys pavysam najauši interesis piec, ar vēļmi puorbaudeit, voi var puorskaiteit i saprast. Ari es taida poša īmesļa deļ asmu škūrstejuse ituos gruomotys. “Kačeiša patmalis” stuovēja jaunumu plauktā vysārtuok daīmamajā i pamonamuokajā vītā. Dažkuort maneju, ka bārni eksemplaru latgalīšu volūdā pacyluoja, bet ruodejuos, ka pat nasaprota, kaidā volūdā tei ir raksteita. Izjāmums beja, kod bibliotekā organizējom Latgalīšu dīnu. Tod gon vairuoki apmaklātuoji mierķtīceigi vaicuoja piec gruomotu latgalīšu volūdā, bet tymā dīnā nivīnam eisti nabeja laika skaiteit – beja juobauda pasuokumi i juosviņ svātki,” sovā pīredzē doluos bibliotekare Ilze.

Meldrys Gailānis, kai mamys i ari kai Rēzeknis piļsātys bārnu bibliotekys bibliotekaris, nūvāruojumi līcynoj, ka bārnus vysvaira interesej jaunuos gruomotys, tuos, kas ir neseņ izdūtys i gruomotu serejis. “Mozuokim bārnim gruomotu izvēle vaira atkareiga nu vacuoku īskotu. Ir bejs tai, ka īsoku breineigu bārnu gruomotu, a maņ pasoka, ka itei gruomota naderēs, gruomota bārnam napatiks, a ūtramā dīnā iz biblioteku atīt pats bārns i pajem tīši īteiktū gruomotu,” stuosta Meldra. Leidzeigi ari ar latgalīšu gruomotom, vacuokim pošim ir juoizruoda interese par tom i juoskaita bārnim prīškā.

Interese suocās saimē

Bibliotekare V. Jakimova nūvāruojuse, ka Preiļu bibliotekā par gruomotom latgaliski vaira interesejās bārni, kuru saimēs runoj latgaliski. Taidys pošys atzinis pauž ari uzrunuotī vacuoki.

Bārnu interesi par gruomotom ītekmej kūpejuos saimis gruomotu skaiteišonys tradicejis, tymā skaitā interese par latgalīšu literaturu. Portala lakuga.lv laseituoju veiktuos aptaujis dati paruoda, ka leluokais vairums respondentu godā puorskaita tikai vīnu ci divys gruomotys latgaliski.

LNB Bārnu literaturys centra golvonuo bibliotekare I. Marga latgalīšu situaceju saleidzynoj ar latvīšu diasporys saimu situaceju, kur lelai daļai vacuoku ir cīši juonūsapyulej, kab saglobuotu bārnūs vēlmi na tikai skaiteit, bet pat runuot latviski.

Bibliotekaris Ilzis īskotūs latgaliski skaiteit motivātu, ka koč kas eipašs byutu daīmams tikai latgaliski. “Tai sovulaik suoču skaiteit gruomotys krīvu volūdā, jo latviski tuos vēļ nabeja tulkuotys. Dūmoju, ka jaunīšim tei varātu byut motivaceja. Ar mozuokim bārnim ir sovaižuok, tur teišom cīši daudz kas ir atkareigs nu vacuoku nūstuojis. Pīļaunu, ka muni kolegys Latgolā par tū dūmoj i organizej dažaidus pasuokumus, kurūs akcentej latgalīšu volūdu, i cīši ceru, ka tei ari ir golvonuo motivaceja bārnim pīvērst viereibu gruomotom latgalīšu volūdā.”

Preiļu golvonuos bibliotekys bibliotekare V. Jakimova uzsver, ka bibliotekaram ir lela lūma interesis par konkretom gruomotom radeišonai bārnūs. Jei ari atzeimoj, ja kaida latgalīšu gruomota teik pareklamāta vaira, tod tū ari vaira puorskaita.

Medeju atbolsta fonda īguļdejums nu Latvejis vaļsts budžeta leidzekļu. Par roksta saturu atbiļd portals lakuga.lv.

Print Friendly, PDF & Email

Nūtikšonu kalendars