Rokstu sagataveja: portals lakuga.lv

Apvīneiba “Latgalīšu Reps” gatavej sovu ūtrū studejis albumu “CYTA DZELA” i klauseituoju viertiejumam nūdūd jau ūtrū singlu “Jauneiba” nu gaidomuo albuma. Dzīsmei izveiduots ari video.

“Kaidā vacumā ir beigusēs tova jauneiba? Voi jei ir beigusēs? Kū īprīšk tev nūzeimej vuords “jauneiba”? Itaidus vaicuojumus mes bīži aizdūdam poši sev šaļtīs, kod asam jau pavysam cytā dzeivis pūsmā,” portalam lakuga.lv atkluoj vīns nu apvīneibys daleibnīku Didzis Kozlovs.

Jaunajā singlā “Jauneiba” apvīneiba “Latgalīšu Reps” pasacejuse sovu pateiceibu itam tik nūzeimeigajam periodam, atguodojūt spylgtus momentus, kas sovā mārā ir ītekmiejuši apvīneibys daleibnīku turpmuokū dzeivi i liktini.

“Cīneit i nūviertēt kotru sajimtū pīredzi – i ar pozitivū, i ar nagativū nūkruosu, pasaceit paļdis svareigom šaļtim i atsavadeit tod, kod ir atguojs eistais laiks, par tū ir dzīsmis stuosts,” soka Didzis.

Dzīsmis video ir filmāts Āfrikā, kruosainā, austrumnīciski koloritā, dažaideibu pīsuotynuotā Marokā, kur tika uzjimti izreiz div muzykys video – “Šamani” i turpynuojumā “Jauneiba”.

“Nu ituo braucīņa mums byus daudz kū atcerētīs, pyrmkuort, kontrasts it vysā – cīš korstys dīnys i lads soltys naktis; boguoteiba i nabadzeiba; skaistums i nateireiba, cylvāku lobsirdeigums i cylvāku natykums. Daži kadri tyka filmāti slovonajā i vysai naparostā piļsātā ar nūsaukumu Šefšauena, kū reizem sauc ari par “zylū sapynu”, partū ka piļsātys īlys i sātys ir ītārptys vysaidūs zylūs kruosu tūņūs. Natycama, muokslinīcyska nūskaņa i uzmuoceigī narkodileri iz kotra styura, kuri napuortraukti gribēja nūtierguot mums sovys “breinumvīlys”. Ari itaida situaceja atguodynuoja jauneibu, kod apreibynūšys vīlys ir daīmamys iz kotra styura, bet lāmums i atbiļdeiba vysod palīk myusu pošu ziņā.

Video filmiešonys procesā īsapazynom ar sērfinga školuotuoju, kurs sūlejuos paruodeit mums breineigus skotus, kur varātu īfilmēt dažus lobus kadrus, bet, pa ceļam pieški nūsaskaidroj, ka tys ir moksys pakolpuojums i beiguos jis vīnkuorši lyudz finansialu paleidzeibu, stuostūt par tū, ka juo bārni mierst bodā.

Āfrika ir daudzpuseiga kontrastu vaļsts, taišni taida poša ir ari myusu jauneiba – pylna ar galejeibom, napareizim lāmumim, skaistom dzeivis šaļtim i pavuiceibom. Paļdis jauneibai par pīredzi!” atmiņuos par pīdzeivuotū doluos Didzis.

Dzīsme jau ir daīmama Spotify i vysūs puorejūs straumiešonys servisūs.

Dzīsmis autori ir Didzis Kozlovs, Ivo Grigalis.  Audio apstruode: Fakts (Jānis Šmediņš) Prime Time studio. Pie video montažys struoduoja Uppfade (Jānis Jēkabsons).

Apvīneibys “Latgalīšu Reps” jaunumim leidza var sekuot profilā Facebook i Instagram.