Rokstu sagataveja: portals lakuga.lv

Dagdys Turisma centrs iz “Google Maps” bāzis izveiduojs karti, kurymā apkūpuota informaceja par vysim Latgolys dīvnonimim. Kartē atzeimuotys 240 dažaidu konfeseju bazneicys.

Ideja par Latgolys bazneicu kartis izveidi roduos Dagdys Turisma centra vadeituojam Juram Viļumam. Ik svātdīni jis kūpā ar saimi iz mišu devēs iz kaidu nu Latgolys bazneicu, tok bejs gryuši saplānuot braucīni, jo nabejs puorskotoma reika, kas ļautu saprast, cik tuoli bazneicys atsarūn nu jūs dzeivisvītys i cik tyvai ci tuoli tuos ir vīna pi ūtrys.

Interaktivajā kartē ītvartys 240 Latgolys bazneicys – katuoļu, staraveru, pareizticeigūs i luteraņu. Kotrys konfesejis dīvnomi atzeimuoti sovā kruosā, kab karte byutu lobuok puorskotoma. Kotrai bazneicai ir dalykta ari biļde, kontaktinformaceja i dīvkolpuojumu laiki katuoļu bazneicuos. Tī jimti nu Latvejis Romys katuoļu Bazneicys informacejis centra sātyslopys katolis.lv.

Sakraluo turisma ceineituojim karte paleidz Latgolu apsavērt, kai vīnu vasalumu, nadolūt tū mozuokūs ci leluokūs atseviškūs nūvodūs, tei ļaun turistim īpazeit vys jaunus dīvnomus tyvuokā i tuoļuokā apleicīnē i ari izpieteit Latgolu pošūs attuoluokajūs nūstyurūs, tai par karti saceits Dagdys Turisma centra kontā Facebook.

Dagdys Turisma centrs Latgolys bazneicu apmaklātuojus aicynoj daleitīs ar īspaidim socialajūs teiklūs, kai ari syuteit preciziejumus i īsacejumus kartis uzlobuošonai.