Kristīne Rancāne: “Asmu vīnmār ceinejusīs par taisneibu”

Kristīne Rancāne: “Asmu vīnmār ceinejusīs par taisneibu”

Intervejis autore: Sintija Augustova, portals lakuga.lv

Kristīne Rancāne kasdīnā struodoj par kosmetologi, vizažisti, sapūš leigovys i breivajā laikā veidoj saturu sovā YouTube kanalā “NoKrist”. Kristīne ir dasadalejuse vairuokūs skaistuma konkursūs, tymā skaitā ari “Mis un Misters Rēzekne 2013”, kurā uzvarēja. Sarunā par socialajim teiklim, karjeru kosmetologejā i nūpītnom, sociali atbiļdeigom temom.

Kai klivi par kosmetologi?

Es vīnmār asmu zynuojuse, ka grybu struoduot kosmetologejā. Maņ pateik struoduot itamā jūmā, tok es najiutu taidu draivu, deļtam mekleju kluot kū radūšu, tys maņ ir tyvuoks par medicinu.

Kas vysvaira tev pateik kosmetologis dorbā?

Maņ pateik atrast problemu, nūvērst tuos cālūni.

Gondreiž kai detektivi.

(Smejās) Nui. Kosmetologejis koledžā īdūd dīzgon minimalu zynuošonu bāzi, nu koledžys izīmi kai zaļs ogūrceits (smejās). Kluot juosavuica vysaidūs kursūs, lai varātu saprast, parkū ir pumpa, grumbeņa, sausa uoda, kai taidai uodai paleidzēt. Es losu ari sastuovus sovu klientu kosmetikai, bīži radzu, ka jī izmontoj sovam uodys tipam naatbylstūšus leidzeikļus i tai paslyktynoj tuos stuovūkli. Taišni kasdīnys kūpšona ir daudz svareiguoka par kosmetologa apmekliejumu.

Škārsteiklā ir daudz vysaidu mītu par sejis kūpšonu, kosmetiku, apguoz treis, tovupruot, popularuokūs!

Ka sātyslopā ir leidzekļa sastuovdaļu izkluosts, ir pastuosteits, kam ir dūmuota kotra sastuovdaļa, es īsaceitu apdūmuot leidzekļa pierkšonu. Pīmāram, zeimūla “Madara” sātyslopā beja apraksteita kotra sastuovdaļa, bet tys ir tikai vīnys pusis vīdūklis. Es dažom sastuovdaļom napīkrytu, uzraksteju jim i papraseju, kur jī tyka pi taidys informacejis. Es gribieju īsadzilinuot itymā vaicuojumā, bet tai i nasagaideju atbiļdi. 

Leluokuo aplameiba, kū beju atroduse škārsteiklā – AHA skuobis ir kaiteigys, deļtam ka tuos nūjam uodys kuortu. Tys jau ir eistais īmeslis jūs izmontuošonai kosmetologejā. Vēļ runoj, ka nu AHA skuobem rūnās pigmentaceja. AHA skuobis pigmentaceju veidoj taidā gadejumā, kod cylvāks īt sauļuotūs, deļtam ka navar uorstēit i būjuot uodu vīnlaiceigi.

Trešuo aplameiba, solareji ir veseleigi, deļtam ka dūd D vitaminu i rūnās veseleigs īdagums. Nav taidys lītys kai veseleigs īdagums! Latvīšim D vitamins ir zams, ar tū ir juosasamīrynoj, lobuok kluot uzturam lītuot D vitamina preparatus, na ceptīs solarejūs voi vosorys saulē. Latvīši nazyna māra. Ka jī brauc iz azaru, tod brauc i guļ tik ilgi, cikom sorkoni i apdaguši.

Kai tev līkās, Latgolā ir pīprasejums piec kosmetologa pakolpuojumim?

Nūteikti ir. Sīvītis vysur grib byut skaistys i kūptys.

Veirīši ari staigoj iz procedurom?

Nui, i par itū vajag runuot. Asmu dzierdejuse vuordus – oi, nadūd, Dīvs, kaids izzynuos, ka guoju pi kosmetologis voi čali nasaprass. Parkū nu tuo vajag kaunētīs? Tys ir smīkleigi. Sīvītem cīši pateik kūpti veirīši.

Karteņa: Ieva Zeltiņa

Tu dorbojīs ari socialajūs teiklūs, kai saīt atteisteit sovu brendu škārsteiklā?

Tys ir naatlaideigs dorbs. Maņ napateik uzabuost cylvākim, saceit, o, maņ izguoja jauns video, apsaverit. Bet ir juokuop sev puori. Cylvākim par sevi ir juoatguodynoj. Kai drusceņu saīt ībremzēt, tai cylvāki puorsaslādz ir cytu kanalu. Myusdīnuos vyss nūteik cīši uotri.

 Es vīnmār asmu gribiejuse runuot par taidom temom, par kurom Latvejā eisti narunoj – par rasismu, par navīnleidzeibu. Asmu vīnmār ceinejusīs par taisneibu. Voi nu latvīši kaunejās, vai naradz problemu. Es taišni grybu problemu izceļt. Asmu sasaskuoruse ar komentarim nu draugu, paziņu, ka Latvejā rasisma nav. Tai soka tod, kod sūpluok nasēd afroamerikaņs voi indīts.

Grybu savuokt sekuotuojus, kuri mani pazeist, piec tam ar jim runuot par nūpītnom temom. Grybu izveiduot interveju ar vieža pacienti. Sataiseit fotoseseju, īprīcynuot, lai jei pasadola ar sovu pīredzi. Jamūt vārā, ka maņ ir ari medmuosys izgleiteiba, mani itei tema cīši interesej.

Tei sovā ziņā ari mentalitate, padūmiskuo audzynuošona, ka cylvāki nagrib runuot par problemom, kas ir juorysynoj.

Nui, bet pasauļs apleik mainuos. Latvejā cylvākim taipat daīs ar tū sasaskart. Piec tam pošim byus naārtai, ka jī nabyus pīsamāruojuši tendencem.

Vīnā nu interveju pediatre dīzgon atkluoti pastuosteja, ka Latvejā ir bejuši gadejumi, kod vacuoki pīkaun zeidaiņus. I tod tu dūmoj: Latvejā? Nu nā, navar byut. Taišni deļtam ir juorunoj. Na par veļti cylvākim ir volūda i spieja runuot.

Kaidu laiceņu atpakaļ struoduoju “Sorkonajā Krystā” tepat Rēzeknē, i guoju iz bārnu patversmi. Kod cylvāki dūmoj, ka pi myusu vyss ir jauki i meili – tai nav. Ir daudz vīntuļu bārnu, kurim ļūti vajag audzynuošonu i mīlesteibu, ir daudz nalobvieleigu saimu. 

Saceji, ka tev napateik uzabuost sovim sekuotuojim, kai tu panuoc atgrīzeniskū saiti ar sovu auditoreju?

Es jim suocu aizdūt vaicuojumus. Ka aizdūt vaicuojumus, cylvāki suoc ari atbiļdēt. Naseņ filmējom “Fotogrāfu cīņas”, atgrīzeniskuo saite beja fantastiska. Instagramā ir vysleluokais skatejumu skaits, i tī ir vysvīgluok dabuot tū atgrīzeniskū saiti.

Varbyut esi pamanejuse atškireibys storp tim sekuotuojim, kas ir nu Latgolys, i tim, kas ir uorpus Latgolys?

Eistineibā mani vysvaira verās Reigā, deļtam ka pīci godi dzievuoju golvyspiļsātā, tī maņ vairuok paziņu. Komentej tyvuokī cylvāki. Tī, kas nav nu Latgolys, vysbīžuok īsoka ari vysaidys idejis. Tī, kas īt nu Latgolys, ratai pīroksta. Es dūmoju, ar laiku i Latgolys auditoreja paliks aktivuoka.

Kai tev roduos ideja izveiduot YouTube kanalu?

Es grybu nazkū stabilu, kas varātu sekuot maņ vysur leidza, nazkū, kas ir radūšs i apvīnoj vysus munus talantus. Nu suokuma filmieju tikai sevi, runuoju poša ar sevi, bet tys beja cīši garlaiceigai. Saprotu, ka juoaicynoj interesanti cylvāki.   

Kai tu izavielīs sīvītis fotosesejom?

Uorejam izskotam vyspuor nav nūzeimis. Mani saista interesantys profesejis, dzeivisstuosti, aizaraušonys. Es vīnmār ļaunu tim, kurus interveju, pyrms publikacejis apsavērt video. Daudzi ari izmontoj itū īspieju i dīvamžāļ īvīš sovys korekcejis.

Kod naviņ iz intervejom sauksi ari veirīšus?

Ītūšaļt dūmoju, kai tū realizēt. Maņ ir div idejis – voi škiut buordu, kas byutu vysai beistamai, deļtam ka namuoku tū dareit (smejās), voi taiseit sejis proceduru i paraleli intervēt.

Voi socialī medeji i influenceri, tovupruot, ir izmainejuši prīkšstotus par skaistumu?

Vīnnūzeimeigi. Daudzi nazyna, cik daudz retušys ir tālu veiduošonā. Daudzi dūmoj, ka video nikuo navar maineit. Vysu var izmaineit! Īspiejams, ka cylvāki, kurim sekojit leidza, dzeivē vyspuor naizaver tai, kai profilā. Daudzom skaistom sīvītem ir kompleksi, deļtam ka juos verās iz perfekti retušētom biļdem i saleidzynoj ar sevi. Tys nūteik jau zamapziņā i tys ir brīsmeigi. Deļtam es sovūs video paruodu ari retušys daļu.

Karteņa: Ieva Zeltiņa

Kū tu varātu īsaceit tim, kas grib suokt sovu karjeru kosmetologejā i atteisteit sovus socialūs teiklus?

Kosmetologa karjerai vajag izgleiteibu, vajag vuiceitīs i daudz praktizēt. Socialajūs teiklūs nav juogaida breinums – ir vīnkuorši juodora. Navajag beitīs nūsūdejuma. Ir juosakoncentrej iz pozitivū, deļtam ka socialūs teiklu vide ir dīzgon nažieleiga. Ir svareigi sekuot trendim i tendencem.

Kaida ir tova attīksme pret latgalīšu volūdu i latgaliskū kulturtelpu?

Latgola ir muna dzimtine. Es mīļoju Latgolu i latgalīšu volūdu. Latgaliski saprūtu, bet nikod poša naasmu runuojuse. Muna baba saceja, ka maņ latgalīšu volūdys navajadzēs, i ar mani runuoja tikai latvyski. Es tam eisti napīkreitu. Ir juosaprūt, ka tys ir viesturis montuojums, tū ir juosorgoj.

Print Friendly, PDF & Email

Nūtikšonu kalendars

Nov
7
Sai
16:00 Catūrtais pasauļa diktats latgal... @ Vyss pasauļs
Catūrtais pasauļa diktats latgal... @ Vyss pasauļs
Nov 7 @ 16:00
Catūrtais pasauļa diktats latgalīšu rokstu volūdā @ Vyss pasauļs
Diktats skanēs 7. novembrī 16 stuņdēs jaunīšu raidejumā “Pīci breinumi” vysuos Latvejis Radejis 5 frekveņcēs, tū varēs klauseitīs ari škārsteikla platformuos pieci.lv i lsm.lv, kai ari Latvejis Radejis Latgolys studejis i portala lakuga.lv kontūs socialajūs[...]