Bodibildinga saceņseibu uzvarātuoja Evita Lozda

Bodibildinga saceņseibu uzvarātuoja Evita Lozda

Roksta autore: Sintija Augustova, portals lakuga.lv

Evita Lozda nu Preiļu ar sportu nūsadorboj jau nu bārna kuojis. Kasdīnā jaunīte struodoj kai trenere, i pavysam naseņ tykuse pi lauru i īgivuse pyrmū vītu bodibildinga saceņseibuos “2020 NAC Latvia Open Cup” kategorejā “Miss Bikini”. Sarunā par saceņseibu knifenim i tū, kai tom sasagataveit.

Ceļš iz uzvoru treis godu garumā

Evita Lozda ir pabeiguse sporta školu, izmieginuojuse vīglatletiku i estetiskū vingruošonu, tok suokuse zust motivaceja i gribiejīs paraudzeit koč kū jaunu. “Tymā šaļtī dzeivuoju Reigā i sporta zalē redzieju meitinis, kas dasadola fitnesa bikini saceņseibuos, maņ tys lykuos smukai i foršai. Dūmuoju – ar kū gon es asmu švakuoka? Laikam ari varu nazkū taidu paraudzeit, varbyut ari nazkū sasnēgt,” par tū, kai aizasuoc ceļš bodibildingā, atmiņuos doluos jaunīte.

Evita jau vairuokus godus struodoj par treneri, sertifikata īgiušonai vuiciejusīs ari Reigā. “Es doru tū, kas maņ pateik, asmu laimeigs cylvāks,” ar smaidu soka Evita.

Jaunītis pyrmuos saceņseibys bodibildingā beja 2017. godā. Pyrmūs div godus jei īgiva caturtū vītu. “Saceņseibuos pyrmuos pīcys vītys skaituos lobys, koč i catūrtuo vīta ari ir loba, maņ gribējēs tikt īškā trejnīkā,” stuosta jaunīte. Evita dasadaleja saceņseibuos Leitovā, piec tam aizbrauce iz pasauļa čempionatu, kur īgiva 11. vītu. Piec tuo Evitai īsastuoja div godu ilga atpyuta nu saceņseibu.

“Itūgod mani otkon uzaicynuoja iz saceņseibom. Padūmuoju – div godi jau ir paguojuši, varātu vēļreiz startēt. Nimoz nabeju gaidejuse tik lobu rezultatu. Maņ tys beja lels puorsteigums, ka beidzūt īgivu pyrmū vītu,” par uzvaru bodibildinga saceņseibuos “2020 NAC Latvia Open Cup” kategorejā “Miss Bikini” prīcojās jaunīte. Evitys ceļš iz uzvaru beja vysmoz treis godus gars.

Piec uzvarys vaira apsveikumu kai dzimšonys dīnā

Apkuortejī faktu, ka Evita pastyprynuotai nūsadorboj ar sportu i dasadola bodibildinga saceņseibuos, uztver vysaiž. “Cik cylvāku, tik i vīdūkļu,” atzeist Evita. “Cīši daudzi atbolsta, cīši daudzi ari apsveic. Smejūs, ka dzimšonys dīnā nasajiemu tik daudz apsveikumu, cik piec uzvarys saceņseibuos,” jautri īsamiņ Evita. Tok ir ari taidi cylvāki, kas par jaunītis nūsadorbuošonu naizasoka pozitivi. “Taidim es parosti absoluti napīvieršu uzmaneibu,” nūteiktai pasoka Evita.

Kategoreju “Miss Bikini”, kurā dasadaleja jaunīte, Evita eisti nauzskota par kulturismu. “Tys vaira ir veseleigs dzeivisveids, aktivitatis, kod esi lobā formā, labi izaver, bet naesi miļzeiga sīvīte ar baigajim muskulim,” sovu nūstuoju skaidroj Evita.

Piec 10 minutom iz skotuvis suop muskuli

Daleiba bodibildinga saceņseibuos prosa daudz dorba ar sevi.  “Nav tik gryuši trenētīs sporta zālē voi īvāruot dietu, cik gyuši ir iz skotuvis uzavest i izruodeit sevi tai, it kai tev tys pasadūd cīši vīglai, koč eistineibā tai nav,” skaidroj jaunīte. Pats gryutuokais breids saceņseibuos asūt poziešona – meitinis stuov ryndā, žureja līk maineit poziceju. Kūpumā asūt četrys pozicejis – prīškejuo, div suonu i aizmugurejuo. “Tymā breidī esi cīši saspryngts. Tuos ir aptuveni 10 minutys iz skotuvis piec tuo, kai nūkuop aizkulisēs, vyss ir slapns, tak svīdri. Maņ piec pozeišonys muskuli suop kai piec lela treneņa,” stuosta Evita. 

Žurejis vīdūklis itaidūs čempionatūs var byut vysai subjektivs. Saceņseibuos viertej kermeņa proporcejis – placus, vydukli, kuojis, i tū, cik proporcionals, atteisteits ir augums. Piec tam viertej tū, kai sevi cylvāks paruoda iz skotuvis. “Tev var byut loba forma, bet ka iz skotuvis švakai pozej, tod nivīns tīsness tevi napamaneis,” uzver Evita. Deļtam saceņseibu dalineicys uzmaneibys pīvieršsonai gierbūtīs smukūs bikini ar speideigim akminim, izmontojūt meikapu, auskarus.

Taipoš juobyun harismai, smaidam, drūsmei i puorlīceibai par tū, kū dora. “Tū, ka tryukst puorlīceibys asūt iz skotuvis, izreiz var redzēt,” nūruoda jaunīte. “Pyrmūs godus maņ ar itū beja problemys, navarieju iz skotuvis atsabreivuot. Ir stress i gryuši “atslēgt”golvu, dabuot nu saceņseibu baudu, kod dūmoj par tū, kai pareizi juostuov, juosaver i juosagrīž,” atzeist jaunīte.

Saceņseibys prosa daudz resursu i pyuļu

Izaruoda, ka nūpeļneit ar daleibu bodibildinga saceņseibuos ir gryuši – ir juoīgulda daudz naudys i laika. “Bikini tārps, kūrpis iz augstim papiežim, grims, poziešonys nūdarbeibys, ceļš, daleiba izmoksoj lelu naudu,” uzskaita Evita. Tok sajiutys, kod rūkā ir kauss i medalis atspākoj lelūs tiereņus. “Adrenalins i emocejis, kū izjiuti uzvarys breidī, ir naaprokstamys. Tuos ir atminis vysai dzeivei,” prīcojās Evita.

Fitnesa i kulturisma pasaulī ir ari komerciali turniri, kurūs ir īspieja ar pyrmū vītu īgiut na tikai kausu i gandariejumu, bet i naudys bolvu. Jaunīte īsoka pīsadaleit saceņseibuos uorzemēs, kas ļaun ar itū sporta veidu ari nūpeļneit. Gatavejūtīs saceņseibom, cīteigai juosatrenej sporta zālē i cīši juosekoj leidza iedīņkartei, uzsver Evita:  “Īrūbežuojumi uzturā naļaun iest produktus, kuri myusim līkās kasdīnā daīmami i pošsaprūtami, pīmāram, zemenis voi uobeli.” Lai īgiutu maksimali lobu formu i varātu kuopt iz skotivis, ir daudz juozīdoj i juotrenej sovs grybysspāks.

Print Friendly, PDF & Email

Nūtikšonu kalendars

May
18
Tre
15:00 Lienītis Slišānis izstuodis “Uzd... @ Latvejis Nacionaluo teatra Jaunuo zale
Lienītis Slišānis izstuodis “Uzd... @ Latvejis Nacionaluo teatra Jaunuo zale
May 18 @ 15:00 – 16:30
Nu 10. maja Latvejis Nacionaluo teatra Jaunajā zalē apsaverama Lienītis Slišānis izstuode “Uzdevums”. Izstuodi īspiejams apmeklēt stuņdi pyrma izruožu suokuma i izruožu laikā. Lienīte Slišāne ir gaismu muokslineica i 2020. goda beiguos sajēme “Spēlmaņu nakts”[...]
16:00 Maja dzīduojumi pi krysta ar etn... @ Mozūs Ratnīku krysts
Maja dzīduojumi pi krysta ar etn... @ Mozūs Ratnīku krysts
May 18 @ 16:00 – 17:30
Majs katuoļu bazneicys kalendarā ir Svātuos Jaunovys Marijis mieness – laiks, kod Vabalē teik izpuškuoti ceļa molys krysti i nūteik maja dzīduojumi. Ari itūgod, saglobojūt vīnu nu namaterialuo kulturys montuojuma tradiceju, pogosta ļauds teik aicynuoti[...]