Raiņa muzejs “Jasmuiža” aicynoj iz cepļa kurynuošonys svātkim

Raiņa muzejs “Jasmuiža” aicynoj iz cepļa kurynuošonys svātkim

Rokstu sagataveja: portals lakuga.lv

Latgolys keramikys vacmeistara Andreja Paulāna darbneicā-ceplī “Jasmuiža” Preiļu nūvoda Aizkaļnē 7. i 8. augustā nūtiks ikgadejais keramikys cepļa kurynuošonys pasuokums. Itūgod byus na tikai keramikys cepļa kurynuošona i attaiseišona, bet ari breivdobys kinys vokors i sasatikšona ar kinys “Piļsāta pi upis” radūšū komandu, portalu lakuga.lv informej Memorialūs muzeju apvīneibys puorstuove Zane Grudule.

Cepli kurynuos Tautys lītišķuos muokslys studejis “Rēzeknes apriņķa pūdnīki” dalinīki. 7. augustā keramiki ar sovim muola traukim pīpiļdeis cepli, kuru, tymā pat dīnā 14.00 stuņdēs ari īkurynuos. Cikom ceplis kurēsīs, vokora gaitā byus īspieja apsarunuot ar pūdnīkim, vāruot cepļa kurynuošonys procesu, vālai vokorā – cepļa lelū līsmu. Cepļa kurynuošonys pasuokumā varēs gasteit leidz pusnaktei.

7. augusta vokorā 20.30 stuņdēs byus sasatikšona ar muokslineicu Ievu Jurjāni. Muzejā “Jasmuiža” itūšaļt var apsavērt izstuodi “Negaidīti priekšmeti Raiņa un Aspazijas bibliotēkā”, kurā var redzēt Ievys Jurjānis ilustracejis.

21.30 stuņdēs apmaklātuojim byus īspieja nūsavērt kinu “Piļsāta pi upis”. Pyrma kinys byus ari sasatikšona ar kinys režisoru Viesturu Kairišu, muokslineicu Ievu Jurjāni i Aņša lūmys atveiduotuoju Dāvi Suharevski. Filmys “Piļsāta pi upis” izruodeišonu i tikšonūs ar tuos rodūšū komandu finansiali atbolsta Latgolys regiona atteisteibys agentura, Vaļsts kulturkapitala fonds i A/S “Latvijas valsts meži”.

8. augustā 11.00 stuņdēs tiks attaiseits keramikys ceplis. Apdadzynuotūs traukus varēs ari nūpierkt.

Pyrma cepļa attaiseišonys apmaklātuoji varēs puorbaudeit sovys zynuošonys viktorinā par Raiņa muzeju, Latgolys keramiku, tuos niansem, viesturi, glazurom. Par pareizom atbiļdem byus ari bolvys. Viktorinu vadeis pūdnīks i TLMS “Rēzeknes apriņķa pūdnīki” vadeituojs Andris Ušpelis.

Par muzykalū nūskaņu pasaryupēs Aizkaļnis sīvīšu vokalais ansamblis.

7. augusta pasuokumūs īeja byus bez moksys, tok 8. augustā īejis moksa keramikys cepļa attaiseišonys pasuokumā i muzejā pīaugušajim byus 2,00 eiro, školānim, studentim i pensionarim – 1,00 eiro.

Print Friendly, PDF & Email

Nūtikšonu kalendars

Aug
16
Ūtr
20:00 Latgalīšu kukne @ tīšsaistē
Latgalīšu kukne @ tīšsaistē
Aug 16 @ 20:00 – 21:30
Latgalīšu kukne @ tīšsaistē
Vaira informacejis: ITE
Aug
18
Cat
20:00 Ūgys koncerts @ "Kaņepes Kultūras centrs"
Ūgys koncerts @ "Kaņepes Kultūras centrs"
Aug 18 @ 20:00 – 22:00
“Kaņepes Kultūras centra” duorzā – Ūgys koncerts. Pi puļts DJ MARTIN BIRCH.   Ūga īvalk klauseituoju Rēzeknis hiphopa kulturys kusteibā. Tei ir īlu muzyka, mīlesteiba i vīnuoteiba storp ituos kulturys pīkūpiejim. Vīneiguo sīvīte, kura repoj[...]