Septeni padūmi, kai mudruok i lobuok īsavuiceit latgalīšu volūdu

Septeni padūmi, kai mudruok i lobuok īsavuiceit latgalīšu volūdu

Roksta autors: Vineta Vilcāne, portals lakuga.lv

Latgalīšu volūda ap 164 tyukstušom cylvāku ir kasdīnys sazinis volūda. 2011. gods tautys skaiteišona paruodeja, ka latgalīšu volūdu kasdīnā lītoj 8,8% Latvejis īdzeivuotuoju. Gryuši sprīst, voi i par cik pa itim godim volūdys runuotuoju skaits sasamazynuojs. Īspiejams, tik dreiži tū nimoz ari naizadūs nūskaidruot, jo 2021. gods tautys skaiteišonā tiks izmontuota administrativajūs  datu olūtūs daīmamuo informaceja, piļneibā atsasokūt nu īdzeivuotuou aptaujis škārsteiklā i jūs dzeivisvītā. Nivīnā datubāzē nateik uzkruoti dati par latgalīšu volūdys lītuotuoju skaitu.

Latgalīšu volūdys runuotuoju i raksteituoju pulkam ik pa laikam pīsavīnoj jauni ļauds. Portals lakuga.lv apkūpuojs septeņus padūmus, kas var paleidzēt mudruok i ari lobuok apgiut gon runuotū latgalīšu volūdu, gon latgalīšu rokstu volūdu.

1. Izlem, voi tu gribi apgiut runuotū voi rokstu volūdu

Suocūt apgiut latgalīšu volūdu, tev pyrma juoizlemj, kuru volūdys formu tu gribi apgiut – runuotū ci rokstu volūdu, bet varbyut ari obejis. Atškireibā nu latvīšu literaruos volūdys, kuru esim vuicejušīs školā, latgalīšu runuotuo i raksteituo volūda vairumā gadīņu atsaškir, pīmaram, sarunā ar kaidu dzierdiesi vuordus “sasatiktīs”, “paļdīs”, sovukuort kaidā gazetys rokstā skaiteisi “sasatikt” i “paļdis”. Tys partū, ka latgalīšu rokstu volūda teik normāta, t. i., iz tū atsatīc oficiali apstyprynuoti gramatikys nūsacejumi, pi kuru juopīsatur, sovukuor runuotajai volūdai nav tik styngru nūsacejumu i tuos lītuotuojs sovā izteiksmis veidā ir daudz breivuoks. Sarunvolūdā pasaruoda izlūkšņu eipatneibys, kas na vysod atsaspīgeļoj latgalīšu rokstu volūdā.

Volūdys apgiviejus “atškireiguos” latgalīšu volūdys var mulsynuot, i tim, kuri da šam ar latgalīšu volūdu bejušs iz “Jius”, volūdys apgivis procesu var padareit drupeit sarežgeituoku aiz tuo, ka dzierdātais piļneibā nasakreit ar skaiteitū.

Ka tu breivi runoj latgaliski i tova prioritate ir prast raksteit latgaliski bez klaidu, fokusejīs iz gramatiku. Sev nūdereigus materialus atrassi lakuga.lv sadalis “Volūda” apakšsadaļā “Raksteiba”.

Sovukuort, ka mutvuordu saziņa latgaliski tev ir svareiguoka, raugi vaira byut vidē, kur runoj latgaliski, papyldynoj sovu vuordu kruojumu, bet tymā pošā laikā nasakautrej raksteit latgaliski, i tys nikas, ka tekstā byus klaidys.

2. Suoc ar eisu tekstu skaiteišonu

Naatkareigi nu tuo, voi tova prioritate ir īsavuiceit runuot latgaliski voi ari uzlobuot rokstu volūdu, svareigi ir skaiteit tekstus latgaliski. Tys paleidzēs lobuok izjust volūdu i ari papyldynuos vuordu kruojumu.

Pat, ka kasdīnā runoj latgaliski, roksta puorskaiteišona latgalīšu volūdā var byut izaicynuojums. Partū suoc ar eisu tekstu skaiteišonu, jo tod pītiks spāka vysam tekstam i nasarass sajiuta, ka teksts ir par sarežgeitu. Īspiejams, tev vajadzēs vairuokys nedelis, kab pīrostu pi skaiteišonys latgaliski. Raugi tū dareit regulari, i piec laika latgaliski variesi skaiteit tikpat breivi kai latvīšu literarajā volūdā.

Kai ari, lai skaiteišonys process byutu efektivuoks, izavēlej tekstus par temom, kas tev ir interesantys.

3. Lyudz apkuortejim ar tevi runuot latgaliski

Latgalīšu volūdu mudruok variesi apgiut, ka tū dzierdiesi kasdīnā. Nareši, kod draugu voi rodu kompanejā ir kaids, kurs naprūt latgaliski, puorejī puorsaslādz iz kūpvolūdu – latvīšu literarū volūdu. Ka tev godās itaida situaceja, palyudz sarunys bīdrim turpynuot runuot latgaliski.

Ka latgalīšu volūdu kasdīnā ir gryuši dzierdēt, raugi atrast kaidu draugu voi kolegu, kuram latgalīšu volūda ir dzymtuo, i praktizēt ar jū eisys sarunys par dažaidom kasdīnys temom.

Vairuoki eksperti svešvolūdu apgivei īsoka īt iz randenim ar kaidu, kuram konkretuo svešvolūda ir dzymtuo. Tū var raudzeit dareit ari vuicūtīs latgalīšu volūdu. Bez tuo, ka attīceibys izadūs, latgalīšu volūda var palikt par jiusu saimis volūdu.

Ka īsapazeisti ar kaidu jaunu cylvāku i zini, kas jis runoj latgaliski, suoc iz reizis ar jū komunicēt latgaliski, pat, ka naesi drūss par sovu latgalīšu volūdu. Ja suoksit ar konkretū cylvāku runuot latvīšu literarajā volūdā, piečuok byus gryuši puorīt iz latgalīšu volūdu.

4. Klausīs audio i verīs video latgaliski

Īspiejams, na kotru dīnu tev byus vareiba ar kaidu pasarunuot latgaliski, kab sevi uzturātu formā, klausīs dažaidus audio latgaliski, ari latgalīšu muzyku, kai ari verīs video. Škārsteiklā ir daīmams gona daudz televizejis sižetu i raidejumu latgaliski, taipoš raiedejumus i sižetus latgalīšu volūdā pīduovoj vairuokys radejis stacejis.

Pyrms kaida laika tyka izveiduotys video serejis latgalīšu volūdys apvuiceibai, ari tuos tev byus nūdereigys.

5. Pīroksti sev interesantus vuordus

Kab justūs drūsuok, runojūt i rokstūt latgaliski, ik dīnu raugi papyldynuot sovu vuordu kruojumu. Ka kaidā sarunā, video, audio voi tekstā moni da šam sev nazynomu vuordu, pīfiksej tū. Tu vari ari izveiduot sovu vuordineicu ar vuordim, kas tev ruodīs interesanti i kurus tu grybātu lītuot. Ka vuorda nūzeime da gola nav izprūtama, raugi tū nūskaidruot, kab cytu reizi varātu vuordu lītuot atbylstūša kontekstā i tys palyktu tovā leksikā.

6. Raugi īgaumēt atslāgys vuordus i frāzis

Ka latgalīšu sarunvolūdys apgivē esi īsuociejs, īgaumej bīžuok izmontuotūs vuordus i frāzis i izmontoj jūs atbylstūšuos situacejuos. Ka vys vēļ kautrejīs runuot latgaliski, vari suokt ar dažaidom pīkluojeibys frazem – kai “Lobs reits!”, “Lyudzu!”, “Paļdis” i tt., bet puorejū sarunu turpynuot sev ārtā volūdā. Taidā veidā tu apkuortejim dūsi signalu, ka tev ir interese par latgalīšu volūdu i pozitiva attīksme pret jū. Tod ari tovi potencialī sarunys bīdri jussīs komfortabluok ar tevi runuot latgaliski, koč tu jim vēļ atbiļdiesi cytā volūdā.

7. Nasakautrej raksteit latgaliski

Ka esi apsajiems uzlobuot latgalīšu rokstu volūdu, ir svareigi praktizēt raksteišonu. Tikai taidā veidā tu variesi nūstyprynuot sovys zynuošonys. Vysvaira tev paleidzēs, ka kaids latgalīšu volūdys eksperts puorbaudeis tovus tekstus i nūruodeis iz klaidom. Izanalizej tuos, raugi īgaumēt, kur tu parosti kliudīs i kaids gramatikys lykums tī dorbojās, i nuokušajā reizē ituos klaidys napīļaut.

Ka tev nav īspiejis sovus latgaliskūs tekstus īdūt kaidam puorbaudeit, tik un tai roksti latgaliski. Nasabeist tū dareit ari publiski, par speiti tam, ka kaids nūruoda iz tovom klaidom. Ari latgalīšim ir sova “volūdys policeja”. Raugi pīzeimis nauztvert personiski, izanalizej i, ka atzeisti tuos par saturiski vierteigom, raugi aizruodejumus jimt vārā.

Ari tod, ka tovs mierkis ir apgiut tikai runuotū latgalīšu volūdu, nasakautrej raksteit latgaliski. Leidzeigi kai runojūt, vari suokt ar bīžuok izmontuotajim vuordim i frāzem.

Medeju atbolsta fonda īguļdejums nu Latvejis vaļsts budžeta leidzekļu. Par roksta saturu atbiļd portals lakuga.lv.

Print Friendly, PDF & Email