Grupa “Unknown Artist” izlaiž pyrmū albumu “New Folder”

Grupa “Unknown Artist” izlaiž pyrmū albumu “New Folder”

Rokstu sagataveja: portals lakuga.lv

Grupa “Unknown Artist” izdavuse debejis albumu ar nūsaukumu “New Folder”. Jaunajā albumā īkļautys 11 dzīsmis, nu kuru 10 izpiļdeitys latgaliski, bet vīna – latvīšu literarajā volūdā.

Grupa “Unknown Artist” dybynuota 2014. godā, i tuos dalinīki īt nu Vileks aba Viļakys nūvoda. Grupā dorbojās četri puiši – Māris Keišs, Nauris Konovalovs, Arnis Bukšs i Raimonds Logins. Eipašu popularitati grupa dobuoja ar kompoziceju “Točkas dzīsme”, albumā īkļauta tuos remiksa verseja.

Par pyrmuo albuma izīšonu grupa sovā Facebook.com kontā roksta: “Itymā albumā ir sešu godu garumā kruoti dzeives stuosti, kas ir izstuostieti ar 11 dažaidim trekim dažaidūs stilūs!” Puiši dzīd par sadzeiviskom i sev aktualom temom – par mopedu, bierneibu, pyrmū pasi, laimātovu, braucīni nu Reigys iz sātu i cytu kū.

Dzīšmu autori ir grupys dalinīki poši, dzīsmis “Pa šauru stidzeni” vuordu autors ir Ontons Slišāns i dzīsme sovulaik rodusīs, pasasokūt festivala “Upītes Uobeļduorzs” īrūsmei.

Print Friendly, PDF & Email