Edgars Bāliņš: Jaunīši, runojit latgaliski!

Edgars Bāliņš: Jaunīši, runojit latgaliski!

Intervejis autore: Vineta Vilcāne, portals lakuga.lv

Ir taids jūks, ka kotram latvīšam ir baba Latgolā, vajag tikai labi pameklēt. Latgolys baba ir ari komikim, akteram i reperam, plaša profila specialistam Edgaram Bāliņam. Sarunā ar Edgaru par latgalīšu volūdu, serialu “Lielie Muļķi” i grupu “Singapūras satīns”, nu kurys, īspiejams, nuokūtnē sagaideisim dzīsmi latgaliski.

Kaida ir tova saisteiba ar Latgolu?

Muna radne ir nu Rudzātu (red. pīz. Leivuona nūvods). Bierneibā tī pavadeju dīzgon daudz laika.

Maņ cīši, cīši pateik latgalīšu volūda, vysvaira nu vysu volūdu. Raugu piec īspiejis vaira patērēt latgalīšu kulturu, muzyku. Pats īsavuiceju volūdu.

Kai tu īsavuiceji latgalīšu volūdu?

Ir taids Dj Guntix i juo filmys, tuos es kotru asmu nūsaviers pa 100 reižu napuorspeilejūt. Tuos ir munys meiluokuos filmys, jo taids humors ir tikai Latgolā. Es navaru tū nikai raksturuot, bet cytur taida humora nav. I tys maņ cīši patyka i maineja mani kai cylvāku.

Par vuiceišonūs, tu jau pats jiuti, kai pareizi, kai mainuos latvīšu volūda iz latgalīšu, kai pīmāram, vīns patskaņs mainuos iz divskani. Tū var pats īsavuiceit i saprast.

Cik bīži saīt kasdīnā runuot i raksteit latgaliski?

Raksteit es naprūtu, bet parunuot latgaliski saīt tikai tod, kod aizbraucu da latgalīšu, voi sateiku kaidu latgalīti. Grupys bīdrys Kristapeņš (red. pīz. grupys “Singapūras satīns” dalinīks Kristaps Strūbergs) īt nu Latgolys, i ar jū es runoju ari latgaliski, mes pusi iz pusi runojam latgaliski i latvyski. Kod īdzer, tod nadaudz gribīs vaira parunuot latgaliski.

 

 
 
 
 
 
View this post on Instagram
 
 
 
 
 
 
 
 
 

 

Šodien savus šūpļa svētkus svin viens no talantīgākajiem un sirsnīgākajiem cilvēkiem Latvijā – Viļānu maestro a.k.a Sunshine Takeout. Kad toreiz pirms kādiem 7 gadiem mēs viens uz otru kaut ko random uzbļāvām vecrīgas pašā elles viducī, mēs pat nenojautām, līdz kādam hujātam tas aizvedīs. Caur “Ūsu” pagrabu, pritoniem un dzīves zemākajiem punktiem, līdz miksteipiem, albumiem, pārpildītām koncertvietām, čārtu galotnēm, “Lielajiem Muļķiem” un citām mūsu draudzības svinībām. Ļūbeju da kopa molai, bruoļ. Lai tovā sātā vīnmār mīrs i saticeiba, lai tovā pruotā vīnmār īdvasma i sirsneņā ļūbesteiba. ❤️🙏

A post shared by Edgars Bāliņš (@mrbalins) on

Naseņ tu cytā intervejā saceji, ka grybātu sapeļneit daudz naudys, i, kod byusi vacs, atbaļsteit latgalīšu volūdys atteisteibu. Ka tev tei leluo nauda byutu šudiņ, kū tu atbaļsteitu?

Es uzjimtu filmys latgalīšu volūdā, atbaļsteitu muzykantus, kas dzīd latgaliski, Latgolys radejai īdūtu naudeņu, portalam, kas roksta tikai latgaliski. Vysim īdūtu, byutu mecenats. Bet tys byutu tikai tod, kod maņ byutu cīši daudz naudenis, ka maņ byutu pošam sāta, mož treis sātys, pīcys mašynys i tai tuoļuok.

Tu grybātu byut lobais latgalīšu onkuļs Reigā?

Taišni tai.

Par kū tev ir svareigi atbaļsteit latgalīšu volūdu?

Saleidzynūši dreiž, ka nikuo nadareis lītys lobā, jau latvīšu volūda var izmiert, tod latgalīšu volūda jo eipaši.

Es nūteikti nagrybātu, lai taida eista pērle kai latgalīšu volūda pazyud nu cylvāku kasdīnys. Ir svareigi, lai jaunīši, kurim ir taida īspieja, vuicuos latgalīšu volūdu, lai piec tam nūdūd tū nu paudzis paaudzē. Niu ir daudz kairynuojumu nu vysom pusem vuiceitīs angļū volūdu, lītuot angļu izteicīņus, jo tys ir daudz stileiguok. Maņ pošam personeigi stileiguok ruodīs lītuot latgalīšu izteicīņus, tikai munus latgalīšu izteicīņus nasaprass, pīmāram, Francejā i Italejā, cikom angļu saprass.

Par tū es saprūtu, ka jaunīšim ir gryuši saprast, ka latgalīšu volūda ir stileiga, bet tī ir sovs šarms i tū vajag turpynuot.

Nūteikti daudzi maņ napīkreit i uzskota, ka myusu dīnuos pīteik tikai ar angļu volūdu.

Kai, tovupruot, varātu jaunīšu vydā veicynuot gribiešonu vaira vuiceitīs latgalīšu volūdu?

Vajag vaira kulturys latgalīšu volūdā, volūdai ari vajag adaptētīs vysam jaunajam, lai tei nav volūda, kurā runoj tikai babenis i dzedeni. Lai ir interesants saturs, interesanti video latgaliski, koč kas, kas aizraun pošus jaunīšus, stileiguos lītys.

Runojūt par serialu “Lielie muļki”, Latgolā ir taids cīms. Tev pošam ir saguojs pabyut eistajūs Lelajūs Muļķūs?

Naasmu tī bejs. Dūmoju, ka nūteikti garom napabraukšu, kod nuokušu reizi braukšu tymā vierzīnī. Es zynu, ka ir cylvāki, kas speciali brauce da tuos vītys pasavērt, kaidu biļdi sataiseit, atsazeimuot, ka tī bejuši. Es dūmoju, ka tys pogostam īt tikai par lobu.

Pamaneju, ka serialā eipaši nateik īspryngts par detaļom i nūvārstys napiļneibys. Maņ pruotā īt sereja par Juonim, kas filmāta laikā, kod zīd pīninis, i jius tū eipaši naslēpet.

Beja taidys lītys, kur eipaši naīspryngom ar dūmu, kai byus, tai byus. Dūmoju, ka vaira akcents ir iz lobim dialogim i pošom situacejom. Nu pyrmuos sezonys atguodoju, ka mes vosoru filmējom septembrī, ostoni desmit grādi, es šortikūs skraideju i maņ beja cīši solts.

Kai tev ruodīs, deļkam cylvākus ir uzrunuojs serials “Lielie Muļķi”, deļkam pateik i verās?

Es dūmoju, ka daudzi kaidā nu varūņu var atpazeit poši sevi voi draugus. Latvejā nav ari bejs daudz serialu mockumentary stilā (red. pīz. filma ci serials, kas atainoj izdūmuotus nūtykumus dokumentaluos filmys ci seriala stilistikā), varbyut tys pīsaista.

Mani vysod ir interesiejs, cik cīši var ticēt tam, kū standup komiks soka nu skotuvis?

Nimoz navar ticēt! Puse ir izdūmuojumi, lai byutu smīkleigi. Standup var ticēt tikpat daudz, cik teatram, filmom voi politikai. Tei ir muoksla i vyss tī ir izdūmuots. Bet juoatguodoj, ka caur jūkim bīži teik pasaceita vysleluokuo patīseiba.

Voi tev ir bejuse situaceja, ka ir saguojs cīst nu pasceituo jūka?

Nav tai bejs, ir bejuši gadejumi, ka skateituojs pīsaceļ kuojuos i aizīt prūjom. Nu lai īt, ka jam napateik. Ir bejs, ka cylvāki daīt kluotyn i piec izruodis prosa, parkū tu pasaceji tai, parkū itaids jūks. Es soku – partū, ka tai vajadzēja. Maņ nivīns nav nikuo švaka darejs partū, ka es koč kū asmu pasacejs par jū voi kaidu cytu.

Voi ir kaida tabu tēma, par kuru tu najūkoj?

Es najūkoju par temom, par kurom vyss jau ir izrunuots, īmam iz prīkšu i dūmojam koč kū jaunu. Raugu najūkuot par stereotipim voi par veirīšu i sīvīšu atškireibom. Tys maņ ruodīs paguojušuo godu symta temats, vyss niu īt vaira iz vīnleidzeibu.

Voi standup komikim ir koč kaida miseja?

Nui, nūteikti ir. Caur jūkim var ari pastuosteit koč kaidu lelu patīseibu. Vysaugstuokuo standup muoksla ir likt cylvākim gon smītīs, gon likt aizadūmuot i pamaineit koč kū sovā kasdīnā, vīdūkli par kaidu temu.

“Singapūras satīna” dzīšmu leksika ir dīzgon skorba, koč kaidā auditorejā varātu byut ari cenzejama. Voi pošam i grupys bīdrim nav kauns voi naierteibys sajiuta par tekstim?

Mm…  (dūmoj) Nā, es dūmoju, ka nav kauna sajiutys. Mes taidys sajiutys napazeistam vyspuor. Myusim naīlyka šyupulī taidu sajiutu kai kauns. Dažreiz myusim ir kauns par cytim cylvākim, kai jī uzavad.

Voi “Singapūras satīnam” varātu koč kod byut dzīsme latgaliski?

Es dūmoju, ka byus. Mes jau asam dūmuojuši par tū i mieginuojuši. Mes ar Kristapu uztaiseisim, pasauksim vēļ kaidu, kas prūt latgaliski. Es asmu iz deviņdemsit pīcim procentim drūss, ka taida dzīsme byus.

Es nazynu, par kū byus dzīsme, voi tī byus par tū, ka mozs beja puika Jezups, niu lels izaudzs, dzeivoj Reigā i staigoj pa klubenim. Mož taida dzīsme byus, navar zynuot.

Es par tevi zynu tikai tik daudz, cik asmu redziejuse publiskajā telpā, tu ruodīs nu vīnys pusis kuorteigs, pīkluojeigs cylvāks, tod ir “Singapūras satīns” – taidi kai huligani, kas ruodīs piļneigs pretstots. Voi tys Edgars, kas ir itamā intervejā, ir tys pats Edgars, kas izkuop iz skotuvis kai “Singapūras satīna” dalinīks?

Partū myusim vysim ir Satīnā sovi sagvuordi, jo tod, kod mes izkuopam iz skotuvis, mes vysi asam cyti cylvāki. Es personeigi nūteikti. Vyss tys, kū es soku caur Satīnu ir pavysam cyts Edgars, tys, kū es runoju caur standup, otkol ir cyts Edgars, dzeivē vēļ ir cyts Edgars. Satīnā es atdūdu cytys emocejis. Tī ir koč kaids īdūmeigs, bravureigs, leceigs, stileigs čaļs, kurs bļaustuos par koč kaidom dzelom, a sātā otkon siežu i klausūs “Pērkonu”, Viktoru Coju i tamleidzeigu muzyku, i patīseibā losu dzeju i doru koč kū cytu. Maņ pateik byut daudzpuseigam.

Tu esi portala “Delfi” socialūs teiklu profilu satura redaktors. Kai socialī medeji ītekmej jaunīšus?

Vysi socialī teikli cīši ītekmej. Jaunīši daudz mudruok var redzēt, kai izavad, runoj i kū dora cyti jaunīši. Jaunīšim eipaši pateik īsatekmēt nu cytu jaunīšu. Jī kopej, tāloj, leidzynojās sovim elkim voi jaunīšim, kas ir stileigi.

Es saceitu, ka socialī teikli ir vīna nu golvonūs lītu, kas veidoj niu jaunīti. Mama, tētes, sabīdreiba, kultura i socialī teikli, tys ir vīns nu golvonūs elementu.

Voi tys jaunīšim īt par lobu, īspieja redzēt jūs elkus, cytus jaunīšus?

Tys var byut gon labi, gon švaki. Var pazaudēt sovu asameibu, ka īsatekmej nu cytu, bet varbyut, ka taidā veidā kaids atrūn sovu pareizū ceļu i palīk veiksmeigs, palīk par lobu cylvāku. Tys otkol ir atkareigs nu cylvāka poša.

Es dreižuok saceitu, ka tys ir labi, na švaki. Koč gon, ir ari daudz švaku pīmāru, ja izavēlej napareizūs elkus, kurim sekuot i leidzynuotīs. Vaicuojums, voi tys ir labi voi švaki, ka “Singapūras satīns” ir jaunīšu elks.

Labi, es vaicoju. Voi tys ir labi voi švaki?

Ja jimtu vārā tikai tū, kaidi mes asam iz skotuvis i kū mes dzīžam, īspiejams, mes byutu švaks pīmārs. Ka jaunīši sekoj myusim socialajūs teiklūs i redz, ar kū mes patīseibā nūsadorbojam kasdīnā i kaidi cylvāki mes asam, tod ir cyta aina. Uzskotu, ka mes jaunīšim asam cīši lobs paraugs. Myusu grupā ir gon tāvs ar div dālim, gon cylvāki, kas aizstuov dzeivinīku tīseibys, brauc da jaunīšu i stuosta par dažaidom temom. Ir cylvāki, kas sturodoj reklamā i sasnādz augstus mierķus.

Nivīns nu myusu grupys nav ni nūsadziers, ni nūsanarkuojs, ni pazuds. Nivīns ari nabyus, jo mes asam apvīneiba, kas vīns ūtram i cylvākim apleik paleidz. Vysim vielejam tikai lobu i izadūšonu.

Medeju atbolsta fonda īguļdejums nu Latvejis vaļsts budžeta leidzekļu. Par roksta saturu atbiļd portals lakuga.lv.

Print Friendly, PDF & Email

Nūtikšonu kalendars