Rokstu sagataveja: portals lakuga.lv

11. septembrī Latgolys Kulturviesturis muzejā Rēzeknē nu 9.30 leidz 17.00 stuņdem nūsarysynuos zynuotniski pietnīciskuo konference par Latvejis lītiškuos muokslys aktualim vaicuojumim. Konferencē dasadaleit varēs bez moksys.

Konferencis atkluošonā runuos Latgolys Kulturviesturis muzeja direktore Anastasija Strauta, piečuok varēs dzierdēt muokslys viesturneicys Mg. art. Evijis Vasilevskys stuostu par tū, kai topa gruomota “Evalds Vasilevskis (1953–2018)” par keramiki Evaldu Vasilevski.

Taipoš konferencis programā paradzātys vairuokys lekcejis – “Bazneicu tekstilejis Latgolā i tūs ītekme sadzeivis kulturā”, kū vadeis Dr. hist. Aija Jansone nu Latvejis Universitatis Latvejis viesturis instituta Etnologejis nūdalis, “Juoņa Pujāta (1925–1988) keramikys kolekceja Latgolys Kulturviesturis muzejā”, par kuru stuosteis Evita Kozule i Ināra Krancāne, muzeja kruojuma specialistis, “Namaterialuo kulturys montuojuma saroksts. Aktualitatis.”, kū pasnēgs Gita Lancere, kas ir namaterialuo kulturys montuojuma eksperte.

Dalinīki varēs dzierdēt ari stuostus “Pīminis moneta “Latgolys keramika”” i “Pīminekļa izveide Juoņam Pujātam (1925–1988) Rēzeknē”.

Piec lekcejom paradzāta ekskurseja Latgolys Kulturviesturis muzeja keramikys ekspozicejā i slāgtajā kruojumā, sovukuort zynuotniski pietnīciskuos konferencis beiguos tuos dalinīki brauks iz bedris tipa atkluotys guņs molkys cepļa kurynuošonu Andra Ušpeļa dzeivis i dorba vītā, Rēzeknis nūvodā, Gryškānu pogosta “Moldedžūs”.

Konferenci organizej Latgolys Kulturviesturis muzejs sadarbeibā ar Latvejis Nacionalū kulturys centru.