Roksta autors: portals lakuga.lv

Duets “Paprika”, kurymā dorbojās Rita Gabrusāne-Bogdanova i Kristīne Seņkāne, ar sovu jaunuokū dzīsmi “Nūlīc čemodanu” nupat īsuoc daleibu konkursā “Latvijas sirdsdziesma”. Dzīsmei uzfilmāts ari videoklips.

Dueta jaunuokuos dzīsmis “Nūlīc čemodanu” vuordu autore ir Kristīne Seņkāne, sovukuort muzykys – Rita Gabrusāne-Bogdanova. “Rita parosti myusu dzīsmem roksta melodeju, tod syuta maņ i es dūmoju, kū ar tū dareit tuoļuok. Vuordi parosti atīt poši nu seve i ir par tū, kas tymā breidī maņ ir aktuals, kas ir pruotā. Tai beja ari ar itū dzīsmi. Vokorā dunguoju melodeju i dūmuoju, voi tai vajadzātu byut nūpītnai dzīsmei, voi vaira nanūpītnai. I maņ koč kai pruotā īguoja vuordi “Nūlīc sovu čemodanu”, tod nuokušī vuordi, i tai roduos dzīsme,” par dzīsmis topšonys procesu stuosta Kristīne.

Par dzīsmis viestejumu tuos vuordu autore soka: “Ar itū dzīsmi aicynojam vaira padūmuot par atpyutu, atsasēst i nūlikt molā “čemodanu”, padūmuot, iz kurīni ej i parkū ej tī. Čemodans simbolizej ari myusu kotra nagativū pīredzi – problemys, apvainuojumus, naizdareitūs dorbut itt., kū vysu laiku nosojam sev leidza. Es aicynuotu itū “čemodanu” nūlikt nūst, atsasēst i izvērtēt, voi tys vyss teišom ir juovalk leidza.”

Nupat dueta dzīsme suokuse daleibu šlagermuzykys konkursā “Latvijas sirdsdziesma”, par latgaliskū dzīsmi varēs bolsuot vairuokys nedelis. Tū var izdareit ITE.

Vaicojūt par dueta tuoluokajim planim, Kristīne nūruoda, ka gribīs veiksmeigi pīsadaleit “Latvijas sirdsdziesma”. Ar itū daleibu teik carāts vaira popularizēt ari puorejuos dueta “Paprika” dzīsmis, kai ari planūs asūt izveiduot jaunu koncertprogramu i raksteit jaunys dzīsmis. Kristīne pībylst, ka grybātu ari kaidu dzīsmi, kurai byutu duetam natipisks skaniejums.

“Ceram, ka myusu dzīsmis aizīs tautā i dzeivuos uorpus Youtube.com, ka cylvāki tuos klauseisīs balleitēs, ka īsapatiks leidzeigi kai “Zīlīte”, “Dzērvenīte”. Myusim ari beja lela prīca i lapnums, ka myusu dzīsmi “Soltī vieji” īkļuove latgalīšu dzīšmu kruojumā “Muna dzīšmu gruomota”,” soka Kristīne Seņkāne.