Rokstu sagataveja: portals lakuga.lv

Kab veicynuot literarū procesu Latgolā, dūdūt vareibu latgalīšu rokstu volūdā voi latvīšu literarajā volūdā rokstūšim autorim satikt leluoku auditoreju, bīdreiba “Latgolys Studentu centrs” organizej konkursu „Latgolys prozys skaitejumi 2020”, portalu lakuga.lv informej konkursa koordinatore Ilze Sperga. Konkursā aicynuoti pīsadaleit vysa vacuma Latgolys kulturtelpai pīdareigi autori, kurī roksta prozu. Lobuokajim autorim byus vareiba pīsadaleit storptautyskajā literaturys festivalā „Prozas lasījumi 2020”.

Literarūs prozys tekstu konkurss „Latgolys prozys skaitejumi 2020” nūtiks divejuos – nakluotīnis i kluotīnis – kuortuos. Nakluotīnis kuortā autori aicynuoti īsyuteit sovus prozys tekstus, kū konkursa organizatori nūdūs žurejai anonimai viertiešonai. Kluotīnis kuorta nūtiks ituo goda 14. novembrī Lūznovys muižā, kod autori skaiteis sovus prozys tekstus, žureja viertēs skaitejumu i div lobuokajim pīškiers vareibu pīsadaleit storptautyskuo literaturys festivala „Prozas lasījumi 2020” pasuocīņūs, kas decembra suokumā nūtiks Reigā.

Autori aicynuoti īsyuteit pošu radeitūs i da tuo napublicietūs tekstus latgalīšu rokstu volūdā voi latvīšu literarajā volūdā. Dorbi tiks vārtāti, vysu vaira izceļūt na teksta volūdu, bet literaruo teksta kvalitati i pīdareibu Latgolys kulturtelpai.

Konkursa „Latgolys prozys skaitejumi 2020” dorbus viertēs literaturzynuotneica Maija Burima, dzejneica Anna Rancāne i rakstneica Laima Kota.

Pīsacejumi leidz 2020. goda 15. oktobram nūsyutami bīdreibai “Latgolys Studentu centrs”, e-posts ilze@lgsc.lv. Pīsacejumā juobyut teksta elektroniskajai versejai, ziņom par sevi (vuords, pavuorde, dzimšonys dati, nūsadorbuošona, eisa rodūšuo biografeja) i kontaktinformaceja (telepona numers, e-posts). Konkursa nūlykums ITE.

Autorus, kurūs aicynuos daleibai „Latgolys prozys skaitejumūs 2020”, informēs personeigi i jūs vuordus novembra suokumā izziņuos bīdreibys “Latgolys Studentu centrs” sātyslopā lgsc.lv i Latgalīšu kuturys ziņu portalā lakuga.lv.

Bīdreiba “Latgolys Studentu centrs” (LgSC) ir navaļstiska organizaceja, kas apvīnoj cylvākus, kam ir svareigi saglobuot i atteisteit Latgolys i latgaliskū kulturtelpu, latgalīšu volūdu. Bīdreiba vysod ir raudzejuse vysu pyrma atbaļsteit jaunūs latgalīšu autorus i izdūt kvalitativu literaturu, viereibu vaira dagrīžūt jaunīšu auditorejai.

Festivals “Prozas lasījumi” nūteik nu 1995. goda, jū organizej Latvejis Rakstnīku savīneiba. Laika gaitā „Prozas lasījumi” nu nalela pasuocīņa Andreja Upīša dzimšonys dīnys pīmiņai izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki. Itūgod pyrmū reizi festivalā pīsadaleis ari lobuokī Latgolys autori.