Izdūts “Tāvu zemes kalendars 2021”

Izdūts “Tāvu zemes kalendars 2021”

Roksta autors: portals lakuga.lv

Latgolys Kulturys centra izdevnīceibā izdūta kasgadejuo kulturviesturiska i literara godagruomota “Tāvu zemes kalendars 2021” 31. (82.), portalu lakuga.lv informēja LKC izdevnīceibā.

Kalendarā, kai vysod, atrūnami roksti par lauksaimisteibys, medicinys, arheologejis, viesturis, kulturviesturis, volūdys, nūvodpietnīceibys vaicuojumim, kai ari literatura, kritika i publicistika. Kai īrosts, sovys atminis par saimis viesturi publicej Latgolys īvārojamuokūs dzymtu puorstuovi, godagruomota pīmiņ ari īprīkšejuo goda aizguojiejus.

Itūreiz poši interesantuokī redzīs Latgolys viesturei veļteitī roksti, pīmāram: arheologa Jura Urtāna par jaunatkluotū Svātaunis (Svātyunis) piļskolnu Baļtinovys nūvoda Zvonu kolnūs, kas puormej dašamejūs prīkšstotus par itenis piļskolnim, par jaunatkluotajim Zylupis nūvoda Zagorsku i Garaņu piļskolnim, dīnysgruomotys īroksti par nūtikšonom Krustpiļs Dzierkaļu piļskolnā; Valentina Edmunda Klešnika arhiva pietejuma „Arhiva dokumenti par Ludzas viesturi” turpynuojums. Sovūs redzīņūs par volūdu dalejušīs Anta Rugāte, Vilis Mileiko, Jūlijs Trōps, Anna Babre, Rūdolfs Linužs. Rubrikā “Kulturvēstures pīminekli” – “Mociba ap kolposzonu Jumprawaj Marijai” i Valerija Seile par latgalīšu lementarim.

Literaturys, kritikys, publicistikys tekstu daļu veidoj jau skaiteituojim pazeistamu autorii, kai Ilze Keiša, Helēna Kulincāne, Magdalena Vjatere, Jūlijs Trōps, Leonards Rakickis, Rūdolfs Linužs, Pīters Meikstums, Jōņs Visuns,  Ernests Vilcāns.

Print Friendly, PDF & Email

Nūtikšonu kalendars