Koncertu cyklā “Mūzika Latgales dievnamos” – pyušaminstrumenti kūpā ar varganem

Koncertu cyklā “Mūzika Latgales dievnamos” – pyušaminstrumenti kūpā ar varganem

Rokstu sagataveja: portals lakuga.lv

Metala pyušaminstrumentu kvintets BRASS.EDU i Latgolys varganiste Guna Kise aicynoj iz bezmoksys koncertu ciklu “Mūzika Latgales dievnamos”, kurūs klauseituojim byus īspieja izbaudeit eipaši itim koncertim aranžātus skaņdorbus – baroka, renesansis i 20. godu symta muzyku, kai ari originaldorbus varganem.

Koncerti dūmuoti Latgolys nūvodu īdzeivuotuojim, gostim, škoļnīkim, tok eipaši iz koncertu aicynuoti vītejuos draudzis cylvāki i regularī bazneicys apmaklātuoji.

Paradzāti treis koncerti – 26. septembrī 18.00 stuņdēs Malnovys Rūžukrūņa Dīvmuotis Rūmys katuoļu bazneicā, 27. septembrī 11.00 stuņdēs Nautrānu Vyssvātuos Jaunavys Marijis bezvaineiguos ījimšonys Rūmys katuoļu bazneicā i 13.00 stuņdēs Rēzeknis Vyssvātuokuos Jezus Sirds Rūmys katuoļu katedralē.

“Koncertu cikla ideja ir īdzeivynuot metalpyušaminstrumentu i vargaņu muzykys koncertus Latgolys dīvnomūs, akcentejūt varganem rakstureigū skanejumu i snīdzūt klauseituojim na tikai muzikalu baudejumu, bet ari viesturisku īskotu par Latgolys nūvodu vargaņu izceļsmi, atteistibu i byuvi, kas ir cīšu nūzeimeigi Latgolys kulturvidis daudzveideibys saglobuošonā i atteisteibā,” tai vīns nu koncertu organizatorim i kvinteta BRASS.EDU muziķu Juoņs Retenais. “Asam puorlīcynuoti, ka itī prīkšnasumi saguoduos naaizmierstamys sajiutys gon klauseituojum, gon izpiļdeituojim.”

Varganiste Guna Kise varganis spēli apgivuse Juoņa Ivanova Rēzeknis muzykys vydškolā. Piec tam studiejuse ari Jāzepa Vītola Latvejis Muzykys akademejā, Nīderlandē i Dānejā. Taipoš Guna Kise ir sajāmuse ari vairuokus apbolvuojumus. Vīns nu tūs – Nikodema Rancāna bolva izcyluokajim Latgolys regiona školuotuojim nominacejā “Par mūsdienīgu un radošu pieeju skolēnu darba tikuma audzināšanai un amatu apmācībai”.

Metalpyušaminstrumentu kvintets BRASS.EDU ir pīcu profesionalu muziķu ansamblis. Tys izveiduots 2017. godā i kūpš tuo laika aktivi koncertej i voda meistarklasis Latvejis muzykys školuos i muzykys vydškoluos.

Pasuokuma nūrise tiks organizāta, īvārojūt vaļstī nūsaceituos epidemiologiskuos drūseibys praseibys. 

Koncertu cyklys “Mūzika Latgales dievnamos” reikuots ar Latvejis Kulturkapitala fonda i “Latvejis Vaļsts mežu” atbolstu.

Print Friendly, PDF & Email

Nūtikšonu kalendars