Indīts Sarvmitra: Veseleibai i lobsajiutai ir juobyun prioritatei

Indīts Sarvmitra: Veseleibai i lobsajiutai ir juobyun prioritatei

Intervejis autore: Sintija Augustova, portals lakuga.lv

Sarvmitra ir indīts, kas jau vaira kai deveņus mienešus dzeivoj Rēzeknē, pasnīdz jogu i sovim klientim pīduovoj vairuokys masažys gon pošsajiutys uzlobuošonai, gon ari traumu uorstiešonai. Portals lakuga.lv aicynuoja Sarvmitru iz sarunu, kab izzynuotu par juo dzeivis pīredzi Latgolā i nūvāruojumim.

Kod tu atbrauci iz Latveju?

Paguojušuo gods decembrī. Ar organizaceju “Green Meridian”, kurā struodoju, ir nūslāgts leigums iz pīcim godim, tok cīši īspiejams, ka palikšu Latvejā dzeivuot. Pyrma tuo, kai atbrauču iz šejīni, beju ari Vuocejā, Nīderlandē, Singapurā i Malaizejā.

Parkū par sovu piļsātu izavielieji taišni Rēzekni?

Organizaceja, kurā es struodoju, ir dybynuota Rēzeknē. Tei ir ari saleidzynūši moza piļsāta i es, taipat kai kūks, grybu suokt nu mozumeņa, nu sieklenis, i piec tam augt, veiduot zorus. Par savu izejis punktu izavielieju Rēzekni. Dūmoju ari par struoduošonu Daugovpilī, Reigā, varbyut ari kaidā cytā vaļstī.

Karteņa: Sarvmitra personeigais arhivs

Kai tev pateik cylvāki Latvejā?

Cylvāki ir cīši lobi, draudzeigi i atvārti. Mani jī atbolsta. Daži runoj krīvyski, cyti latvyski. Maņ ir gryutai struoduot, deļtam ka es navaru īsavuiceit divejis volūdys reizē. Aizbraucu iz laukim, i tī cylvāki runoj vēļ latgaliski! (Smejās.) I tod maņ ir cīši gryutai saprast, kū jī grib.

Voi ir gryuši vuiceitīs latvīšu volūdu?

Nui! (Smejās.) Mani cīši mulsynoj garumzeimis, deļ tam ka nazynu, kai tuos izrunuot.

Vīgluok beja vuiceitīs angļu volūdu?

Nui. Angļu volūdā ir vīnkuoršs alfabets. Bet latvīšu volūdys alfabets ar vysom garumzeimem ir sarežgeits.

Kū tu vari pasaceit latvyski?

Varu ar sevi īpazeistynuot – mani sauc Sarvmitra, asmu jogys specialists, asmu nu Indejis. Muoku sasavasaluot, skaiteit leidz desmit.

Tu esi jogys instruktors i pīduovoj vysaidu tipu masažys. Tev jau ir saguojs dabuot sovu pastuoveigū klientu lūku?

Nui. Maņ jau ir vairuok par symts klientim.

Voi beja gryutai pīsaisteit klientus?

Nui, beja cīši gryutai. Cylvāku skaits Latvejā sasamazynoj cīši uotri, deļ tam ceņteigi struodoju. I stuostu par sevi cylvākim (Sarvmitra ir gastejs Latvejis Radejis Latgolys studejis jaunīšu raidejumā “5 breinumi” – aut. pīz.), stuostu, ka veseleiba ir svareiga, ka ar vysaidom procedurom var mazynuot suopis i uzlobuot dzeivis kvalitati. Es grybu cylvākim paleidzēt. Kod klienti poši jiut, ka veseleiba nu proceduru suoc uzalobuot, jī mani īsoka ari cytim. 

Tev klientim bīži juostuosta i juoskaidroj, kai masažys atsaškir vīna nu ūtrys?

Par daudzom masažom klienti jau zyna, deļtam ka tuos ir vysai izplateitys. Bet ir ari eipašuos masažys, kas ir dūmuotys traumu dzīdeišonai, suopju mazynuošonai, par tuom zyna mozuok. Ir vēļ masaža, kurā izmontoj eipašu eļļu, kū es pats sovā sātā gataveju. Savuocu tū nu kūkim, pučem i siekleņom.

Vysi klienti runoj angliski?

Nā, bet masažys laikā myusim nav juosasarunoj. Es ar rūku varu paruodēt, lai jī pasagrīž iz mugorys, iz vādara. Es nadaudz prūtu ari latvyski, deļ tam varu saprast, kū jī grib.

Voi jau esi raudziejs kaidus tradicionalūs latvīšu iedīņus?

Nui. Asmu ieds žuoveitu zivi, buļbu blīnus, piparkiukys i daudz, daudz maizis. Maņ garšoj.

Kai tev pateik Latvejis doba?

Cīši pateik. Tei ir cīši šmuka, deļtam maņ ari pateik Latveja. Maņ pateik vērtīs iz mežu i zuoli.

Karteņa: Sarvmitra personeigais arhivs

Tu pasnīdz jogu ari Reigā. Kai ir struoduot golvyspiļsātā?

Maņ napateik. (Smejās.) Maņ napateik satiksme. Es ari Indejā dzeivuoju piļsātā, kurā beja daudz cylvāku, i tys maņ ari napateik. Deļtam es lobuok dzeivoju mozuokuos piļsātuos.

Latvīši vyspuor ir lūkoni?

Daži ir, bet cyti ari nav. Bet tys ir normali. Kū vaira tū dora, tū lobuok saīt. Cyti īt iz papyldu jogys nūdarbeibom, es ceņšūs jim paleidzēt piec lobuokuos sirdsapzinis.

Saceji, ka atbrauci iz Latveju zīmā. Beja gryutai pīrast pi snīga i soltuma?

Eistineibā, nā. Indejā ir taids pats soltums, tikai bez snīga. Deļtam snīgs maņ beja koč kas jauns. Nikod nabeju redziejs, kai tys kreit nu dabasu. Paspieju zīmā ari sasleidēt ar mašynu. (Smejās.) Tei maņ beja pyrmuo pīredze. Pyrmū reizi redzieju ari tū, kai Latvejā gatavoj konservus zīmai.

Beji raudzejs ari izceļt snīgaveiru?

Nā, koč i gribieju.

Parkū nasaguoja tū izdareit?

Es iz teni atbrauču kai reize ap Zīmyssvātku laiku. Nabeja laika. Itūgod, cik zynu, ari snīga nabeja tik daudz.

Voi beji nazkū dzierdejs par Latveju, kod dzeivuoji Indejā?

Nā. (Smejās.) Bet es skaiteju gruomotys par viesturi, i par tū zynuoju, ka Latveja beja Padūmu savīneibā. Tū pošu zynuoju ari par Igauneju i Leitovu. Zynuoju vēļ, ka ir Baltejis jiura.

Voi tev ir kaids padūms latvīšim?

Cylvākim byutu vaira juodūmoj par sovu kermini, juosajiut tys fiziski i juostruodoj pi formys uzlobuošonys. Asmu nūvāruojs, ka tuo vītā, lai dzartu sulys voi pīnu, cylvāki aizīt ballētīs i naudu iztierej alkoholam. Ka ir sovys gūvs voi kozys – vēļ lobuok. Veseleibai i lobsajiutai juobyun prioritatei. Kod tys ir sakuortuots, cylvāks var dareit vys vaira. Bez loba kermiņa nikuo navar dareit. Juosakust, juonūsadorboj ar jogu i veseleigai juoād.

Print Friendly, PDF & Email