Izstuodē var izzynuot Raiņa i Aspazejis bibliotekys nūslāpumus

Izstuodē var izzynuot Raiņa i Aspazejis bibliotekys nūslāpumus

Rokstu sagataveja: portals lakuga.lv

Leidz 31. oktobram Raiņa muzejs “Jasmuiža” aicynoj iz izstuodi “Negaidīti priekšmeti Raiņa un Aspazijas bibliotēkā”. Izstuode ir kai stuosts par lītom, kas atrostys storp gruomotu lopom obeju dzejnīku personeigajā bibliotekā. Gruomotuos atrostūs lītu ekspoziceju papyldynuos gleznuotuojis Ievys Jurjānis radeitī muokslys dorbi.

Raiņa i Aspazejis sātā Reigā var apsavērt obeju unikalū personeigū biblioteku. Tū veidoj vaira kai 6000 gruomotu 17 volūduos. Tuos aptver vairuokys literaturys i dzeivis jūmys – viesturi, geografeju, filozofeju, folkloru, literaturys i muokslys teoreju, jurisprudenci, latvīšu i cytu tautu dailliteraturu, dobyszynuotnis i cytys. Kolekcejā atrūnamys ari vairuokys gazetys i žurnali.

Tok atseviškys bibliotekys gruomotys ir interesantys ar tū, ka globoj nagaideitus atkluojumus – tūs lopuos ir īlykti prīkšmati, kas vysbīžuok nimoz nav saisteiti ar gruomotys saturu. Izstuode dūd īspieju apsavērt gruomotuos atrostūs prīkšmatus i nu napīrosta skotu punkta izzynuot Raiņa i Aspazejis bibliotekys nūslāpumus. Gruomotuos atrostūs lītu ekspoziceju papyldynuos gleznuotuojis, ilustratoris, operys i teatra scenografis, kostimu i filmu muokslineicys Ievys Jurjānis radeitī muokslys dorbi – gruomotu portreti, spylgtys vizejis, kas ilustrej izstuodis dorbus.

Mozajim izstuodis apmaklātuojim byus ari salīkamys biļžu meiklis ar putnu attālim i dzeju, kai ari īspieja izceļt piļsātu.

Izstuode jau ir bejuse Raiņa i Aspazejis sātā Reigā i jūs vasarneicā Jiurmolā, tagad tei atbraukuse iz Latgolu – Preiļu nūvodā asūšū Raiņa muzeju “Jasmuiža”.

Izstuodē izmontuoti Rakstnīceibys i muzykys muzeja kruojuma materiali. Izstuodi veiduojuse Ieva Jurjāne, Gints Mālderis i Dora Pauzere.

Print Friendly, PDF & Email