Izsludynuots Nikodema Rancāna konkurss

Izsludynuots Nikodema Rancāna konkurss

Rokstu sagataveja: portals lakuga.lv

Jau sastū godu nūteik Nikodema Rancāna vuordā nūsauktais konkurss Latgolys pedagogim. Itymā godā eipaši teik aicynuoti dasasaceit školuotuoji, kas ryupejās par latgaliskuos vidis radeišonu i latgaliskūs vierteibu saglobuošonu i styprynuošonu, kai ari par latgalīšu volūdys i literaturys, Latgolys kulturviesturis i nūvoda vuiceibys īdzeivynuošonu, portalu lakuga.lv informej pasuokuma organizatori.

Vysi nominanti pamatā tiks vārtāti trejuos grupuos: pyrmsškolys izgleiteibys īstuožu, školu i augstškolu pedagogi. Kai ari teik aicynuoti dasasaceit jaunī vuiceibspāki ar dorba stažu mozuoku par treis godim i školuotuoji, kas vuica kaidu praktisku omotu.

Konkursa mierkis – ir styprynuot pedagoga profesejis prestižu i atpazeistameibu sabīdreibā, gūdynojūt izcylu veikumu pedagogiskajā darbeibā i veicynojūt latgaliskuos kulturys tradiceju īaudzynuošonu jaunajā paaudzē.

Apsveicama ir jaunu metožu i pīeju, strategeju, metodiskūs dorbu izstruode, nūruoda bolvys organizatori. Vysuos nominacejuos pretendentim tiks daškierti papyldu punkti pi izviertiešonys, ka vuiceibu process teik organizāts ari latgalīšu volūdā. Itymā godā bolvys konkursā ir īvīsts jaunynuojums, jamūt vārā beidzamuo laika aktualitatis, vysuos nominacejuos pretendentim juoparuoda ari modernūs tehnologeju praktisku dalītuojumu vuiceibu dorbā – pošu spākim ci ar konkursa reikuotuoju atbolstu byus juosagatavej ari eisa video stuņde.

Nikodema Rancāna konkursa bolvu ir īdybynuojuse Latgalīšu kulturys bīdreiba (LKB) i konkursa reikuošonu realizej kūpā ar sadarbeibys partnerim. Ar konkursa nūlykumu i tam dalyktū dasacejuma anketu var īsapazeit LKB škārsteikla lopā latgalisubidreiba.mozello.lv, kai ari Latgalīšu kulturys ziņu portalā lakuga.lv. Konkursa nūlykums ITE.

Da 13. oktobra teik gaideiti dasacejumi, tod žureja tūs izviertēs i, kam tys byus vajadzeigs, projekta “DIGITALĪ LATGALĪŠI” ītvorā tiks snāgts atbolsts kvalitativa video materiala sagataveišonai. Ite juoaatzeimej, ka pīmynātū projektu atbolsta Latgolys kulturys programa, kuru reikoj Latgolys Regiona atteisteibys agentura sadarbeibā ar Vaļsts kulturkapitala fondu i a/s “Latvijas Valsts meži”.

Izcylais katuoļu goreidznīks i pedagogs Nikodems Rancāns (1870–1933) ir Latgolys pyrmuos atmūdys darbinīks ar īspaideigu davumu Latgolys kulturā i izgleiteibā. Bolvys padūšonys svineiguo ceremoneja kotru godu teik reikuota kaidā nu Latgolys pašvaļdeibom. Īprīškejūs godūs bolvys padūšonys ceremoneja ir nūtykuse Rēzeknē, Ludzā, Viļānūs, Preiļūs. Itūgod nūslāguma pasuokums tiks reikuots 29. novembrī Rēzeknis nūvoda Nautrānu pogosta Rogovkā.

Seikuoka informaceja pa tuoļruni 26393531 ci rokstūt iz epostu latgalisubidreiba@gmail.com

Print Friendly, PDF & Email

Nūtikšonu kalendars

Apr
16
Pīk
14:00 Profesoris Lidejis Leikumys lekc... @ Tīšsaitē
Profesoris Lidejis Leikumys lekc... @ Tīšsaitē
Apr 16 @ 14:00
Profesoris Lidejis Leikumys lekceja "Sibīrijas latgalieši un viņu valoda" @ Tīšsaitē
Kruoslovys nūvoda centraluo biblioteka aicynoj iz Latvejis Universitatis profesoris i viesturneicys Lidejis Leikumys lekceju par Sibira latgalīšim – “Sibīrijas latgalieši un viņu valoda”.
Apr
19
Pyr
16:00 Imanta Magones atceris pasuokums @ Tīšsaitē
Imanta Magones atceris pasuokums @ Tīšsaitē
Apr 19 @ 16:00
Imanta Magones atceris pasuokums @ Tīšsaitē
Bolvu Centraluo biblioteka 19. aprelī aicynoj iz horeografa Imanta Magones atceris pasuokumu.