Roksta autore: Kristīne Pokratniece

Jau dreizumā pi latgalīšu literaturys skaiteituoju nūnuoks literata i literaturzynuotnīka Valentina Lukaševiča dzejis kruojums „Pādi navā svāti”. Tei ir nūslādzūšuo tetralogejis „Ceļš” daļa, kurymā, kai atzeist pats autors, jis ir ceļuotuojs, kurš pasarunoj ar garom braucūšajim voi pīturā sādūšajim, daudz vāroj, a cytu reizi vīnkuorši paskrīn garom.

Par gruomotys redaktori izvālāta Ilze Sperga. Jei pasadola sovuos sajiutuos par kruojumu: „Aprauti vuordi, šaļtim ruodīs — par eisu i nazkas palyka napasaceits, niu juodasoka maņ pošai, skaiteituojam. Taida ite boltuo gruomota, kurā autors ar vīglim trīpīnim i puors vuordim zeimej malnboltys ilustracejis, a maņ pošai juodalīk kruosys, kab vyss atsadzeivuotu. A varbyut tī ir aforismi. A varbyut stuosti par dzeivi i ceļu. A varbyut paņteni deļ apsveikuma kartenis. Skaitu i radzu, kū grybātu ītaguot. Ka itei nabyutu gruomota, bet īroksts feisbukā.”

Autora dzimšonys dīnā skaiteituojim ir īspieja īsavērt i īsajust pavysam nadaudz kruojuma nūskaņā.

***

Iz tovys mugorys
Var saraksteit
6 dzejūļus.
Pyrmū par tū,
Kai izvylku nu okys
4 spaņus,
I atsadziers nabeju.
Pīktū
Par pyrmūdīnis reitā
Saplāstū kruškeņu.

Iz
Mozeņuos dzymum-
zeimeitis
Spreidi viers ceļgola…
Romanu.
Par
Motā īkuortu
Stykla
Laimeiti viejā.

***

Tovā gruomotā
Es varātu
Byut gruomotzeime.
Voi uodys, taida
Ar vysaidom zeimem.
Voi stričeits,
Dzaltons ci bryuns.
Voi izkaļteita
Žyužierņa lopa.

Maņ jau patyktu
Puoteru gruomotā.
Var i
Kulinarejis recepšu.

***

Pa vīnai prīdei
Kotram laikam saīs.
Bet olūtu
Vysim napītiks.
Izdzeivuos tī,
Kas īsavuiceis
Dzert
Nu muokūnim.

***

Kai začs pa šoseju
Skrīn munūs dzejūļūs
Vuordi.

***

Vyss lobais pīdzymst
Nu klusuma.
Vairuok kai pamastā sātā
Klusuma ir dzejūļūs.
Kuri kai cārmyuškys ūgys
Karinej, kod navā lopu.

***

Iz munu dzimšonys dīnu
Pyrmī skuobātī kuopusti saīt.

Ilmārs. Juoņs.

Vīnu reizi tai truopejuos,
Ka i pyrmais snīgs
Atguoja mani apsveikt.
Lelajā ustobā
Opolais golds,
Kuru rozstyume
Itaidūs gadīņūs.

Beistūs nu atmiņom.
Maņ pat nazatic,
Ka tai i beja.

Gruomotys izdeviejs SIA „Cymuss”, projekta vadeituoja Kristīne Pokratniece. Gruomota teik gatavuota, pasasokūt Latgolys regiona atteisteibys agenturys, A/S “Latvejis vaļsts meži” i Vaļsts kulturkapitala fonda atbolstam.