Roksta autors: portals lakuga.lv

Koncertā “Dzīšmu gruomota” tiks izdzīduots i izstuosteits gondreiž 20 vysaidu dzīšmu latgaliski stuostu. Koncerta tīšraide nu Latgolys viestnīceibys GORS suoksīs 7. novembrī 18 stuņdēs.

Koncerts “Dzīšmu gruomota” radeits, īsadvesmojūt nu ituo gods pavasarī izdūtuos latgalīšu dzīšmu gruomotys “Muna dzīšmu gruomota”. Gruomotu izdavuse bīdreiba “LgSC”, kruojumā apkūpuotys 300 dzīsmis latgaliski – i tautysdzīsmis, i autordzīsmis, kurys aptver ap 100 godu ilgu periodu – nu 20. g. s. suoku da pat 2019. gods ūtrai pusei.

Vysys koncertā izpiļdeituos dzīsmis atrūnamys itūgod izdūtajā dzīšmu kruojumā, dažys dzīsmis pīdzeivuos jaunu skaniejumu, dažom tys byus labi zynomais i godim puorbaudeitais.

Koncerta programu papyldynoj video, atkluojūt dzīšmu rasšonuos i skaniešonys stuostus.

Koncertā “Dzīšmu gruomota” pīsadola apvīneibys “Raxtu Raxti” muziki, Artūrs Uškāns, Guntis Rasims, Kristaps Rasims, Arņs Slobožanins, Dainis Skutelis, Andris Baltacis, Guntra Kuzmina-Jukna i Rēzeknis nūvoda vokaluo studeja “Skonai”, Jurs Vucāns, grupa “Latgales dāmu pops”, Jurs Ostrovskis i Kārlis Kazāks.

Koncertu “Dzīšmu gruomota” reikoj Latgolys viestnīceiba GORS sadarbeibā ar bīdreibu “LgSC”. Latgalīšu dzīšmu stuostu veiduošona tūp ar Vaļsts kulturkapitala fonda atbolstu, bet koncerta tīšraide īspiejama, pasasokūt ari Vaļsts kulturkapitala fonda atbaļsteitajam projektam “Digitālā Latgale portālā lakuga.lv”.