Roksta autors: portals lakuga.lv

Catūrtais pasauļa diktats latgalīšu rokstu volūdā itūgod skanēja Latvejis Radejis 5 jaunīšu raidejumā “Pīci breinumi”. Diktatam tyka izraudzeiti četri latgalīšu anekdoti, kurus skaiteja radejis personeiba, pasuokumu vadeituojs i vīnkuoršais latgalīts Lauris Zalāns.

Teksts sastateits, īvārojūt Vaļsts volūdys centra 2007. godā apstyprynuotūs Latgalīšu raksteibys nūsacejumus (daeinami ITE), pīļaunama divskaņa “uo” apzeimuošona ari ar “ō”.

Diktatu organizej Latgalīšu kulturys ziņu portals lakuga.lv sadarbeibā ar Latvejis Radejis Latgolys studeju.

Diktata teksts daeinams zam video.

Muote grib vuoreit studzini i syuta dālu nūskrīt da mīsnīka pasavērt, voi ir cyuku kuojenis. Dāls atskrīn i soka: “Mam, es naredzieju, jam zuoboki beja kuojuos!”

Muote līk gulēt sovu mozū dālu. Dzīd jam mīga dzīsmeņu jau ūtrū stuņdi, bārns kai naguļ, tai naguļ.
Beiguos juos dieleņš naiztur i soka: “Mam, tu cīši šmukai dzīdi, bet es grybu gulēt!”

Andris soka sovam draugam Juram: “Dzierdieji, školuotuoja veseleibys stuņdē stuosteja, ka školānim ir juoguļ ostonis stuņdis.”
Draugs atsoka: “Kai mes varim gulēt ostonis stuņdis, ka stuņžu sarokstā ir tikai septenis?”

Muote vaicoj dālam: “Kuknē iz golda stuovēja diveji torta goboli. Deļkuo niule ir tikai vīns? Tu maņ vari paskaidruot?”
“Varu! Tī beja tymss, i es tuo ūtruo gobola naredzieju,” atsoka dāls.

Diktatu finansiali atbolsta Latvejis Radeja i bīdreiba “LgSC” (projekts “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING” (projekta leigums Nr. 778384)).