Grupa “Inde Indive” izdavuse debejis albumu “II”
Rokstu sagataveja: portals lakuga.lv
Latgalīšu grupa “Inde Indive” pīduovoj klauseituoju viertiejumam debejis albumu “II”, kurymā īkļautys četrys kompozicejis.
“Inde Indive” sovu darbeibu suoce 2005. Godā, kūpeigus spākus apvīnojūt Edgaram Vylcānam, Ugim Vylcānam, Aleksandram Vēveram i Jurgim Jakovelam. Grupa pīsadaleja Latgolys jaunuos muzykys atmūdā sūpluok taidom grupom, kai “Bez PVN”, “Dabasu Durovys”, “Green Novice” i c. Sastuovam nūsamainūt, par grupys bundzinīku palyka Valdis Metlāns (Green Novice), basgitarista lūmu uzajēme Kārlis Josts (vāluok jis spēlēja “The Sound Poets”, “Laika Suns” i projektā “Nepāriet dalībnieks”). Aktiva grupys daleiba apseika 2014. godā.
Albumā “II” īkļautuos četrys kompozicejis tyka īraksteitys 2012./2013. godā, bet tūs skanis apstruode pabeigta itūgod. Albuma muzykalū saturu veidoj melanholiski tymsi, apjūmeiga garuma skondorbi, kas ītārpti alternativuo roka, postroka i postmetala skaniejumā.
