Daina, kas Tev vainas? Konkursa „Latgolys prozys skaitejumi 2020” finala dorbi

Daina, kas Tev vainas? Konkursa „Latgolys prozys skaitejumi 2020” finala dorbi

Roksta autore: Ilze Sperga, bīdreiba “LgSC”

Prozys tekstu konkursam „Latgolys prozys skaitejumi 2020” beja div kuortys, pyrmajā žureja anonimai viertēja tekstus, ūtrajā – autoru skaitejumus kamerys prīškā. Pandemeja i juos radeitī īrūbežuojumi sasatikt kluotīnē i reikuot pasuokumus plašam ļaužu lūkam itūreiz ir davuse gryudīni sataiseit lobuokūs ituo goda konkursa dorbu video. Konkursa organizatori tur nūceju, ka tys byus īgivums kotram, kas skaita, vuica cytus voi tikai vuicuos skaiteit latgaliski.

Konkursa lobuokūs autoru vydā ir Evika Muizniece, jei skaiteja sovu stuostu “Daina, kas Tev vainas?” i izapeļneja atzineibu par dzeivū skaitejumu i labi veiduotim dialogim. Kai atzeist žurejis lūcekle Anna Rancāne, itys stuosts i juo autoreiba beja jai nagaideits puorsteigums: “Klausiešūs vēļ i vēļ, uzlobuoja maņ pandemejis nūskaņuojumu.”

Latgolys regiona autoru prozys tekstu konkurss itūgod tyka izsludynuots pyrmū reizi. Autori tyka aicynuoti konkursā īsyuteit da tuo napublicietūs tekstus latgalīšu rokstu volūdā voi latvīšu literarajā volūdā. Konkursa „Latgolys prozys skaitejumi 2020” dorbus viertēja literaturzynuotneica i Austrumlatvejis literaruos akademejis vadeituoja Maija Burima, rakstneica Laima Kota, dzejneica Anna Rancāne i  literaturzynuotneica i dzejneica Iveta Ratinīka.

Dorbu viertiešona konkursā nūtyka div kuortuos. Pyrmajā kuortā žureja aizkluotai viertēja vysus īsyuteitūs tekstus, izalosūt lobuokūs daleibai ūtrajā kuortā. Pandemejis īrūbežuojumu deļ ūtruo kuorta nanūtyka kluotīnē, kai suokumā beja īcarāts, bet autori sovus tekstus skaiteja kamerys prīškā Rēzeknē. Žureja nūsavēre tekstu skaitejumus video i izavielēja uzvarātuoju.  Konkursa uzvarātuoja Annele Slišāne pīsadola storptautyskajā literaturys festivalā “Prozas lasījumi 2020”, kas itūgod nūteik tīšsaistē, sātyslopa prozaslasijumi.lv.

Konkursu „Latgolys prozys skaitejumi 2020” organizēja bīdreiba “LgSC”. Bīdreiba apvīnoj cylvākus, kam ir svareigi saglobuot i atteisteit Latgolys  latgaliskū kulturtelpu i latgalīšu volūdu, i vysod ir raudzejuse atbaļsteit latgalīšu autorus i izdūt kvalitativu literaturu, viereibu dagrīžūt jaunīšu auditorejai.

Konkursa video sataiseiti ar Vaļsts Kulturkapitala fonda finansialu atbolstu projektā “Digitālā Latgale portālā lakuga.lv”.

Pīduovojam puorskaiteit eisu Ilzis Spergys sarunu ar Eviku Muiznieci.

Tu leidz šam esi zynoma kai dzejneica Karonhisake.

Da, tok tys pseidonims jau laikam ari dreiž byus juomaina.

Deļkuo proza? Voi roksti prozu i cytūs žanrūs ari kasdīnā i voi Tev ir vēļ kaidi prozys teksti?

Eistineibā prozu suoku raksteit, kod pyrms divejim godim izdūmuoju padzeivuot “gasterbaitera” dzeivi Nīderlandē i dorbu kulturā i medejūs nūmaineju iz vīsneicu teireišonu Amsterdamā. Kū golva tukšuoka nu vysaidu atbiļdeibu sadalis muļkeibu, tū vairuok vītys raksteišonai. Da, ir ari cyti teksti, bet tī pagaidom deļ mane.

Deļkuo izliemi pīsadaleit “Latgolys prozys skaitejumūs”?

Izliemu pīsadaleit partū, ka īsnāgtais dorbs par Dainas tanti beja eistyn troka situaceja, par kuru, ka napasasmītu itaidā veidā, daītu rauduot dīnys treis. Teksts saguoja vīgli skaitoms, i, prūtams, gribiejuos pabreidynuot cytus tautīšus par taidom Dainom.

Pastuosti par Tovu projektu Facebook, kod Adventā zeimej i roksti. Voi tam byus turpynuojums?

Projekts Facebook ar zeimiejumim. Zeimēt atsuoku 2020. goda suokumā, poša ejūt cauri radejumu ciklam “Latvieša labjūtas kods”. Vīmār ir patics tū dareit, piec školys, pīmiņu, ka gribieju dzeivi saisteit ar muokslu, tok apstuokli, saceisim tai, naļuova. I pa itū godu tūs skiču sasakruojs tik daudzi, ka, cikom dūmoju, kū ar jom dareit tuoļuok, poša deļ seve gribieju pasavērt, kai juos izaver škārsteiklā / iz ekrana. Daļu skiču asmu realiziejusi kai izšyvumus iz apgierbu, bet tys beja tik taids pyrmais eksperiments.

Evikys Muizniecis zeimiejums.

Print Friendly, PDF & Email

Nūtikšonu kalendars

Apr
14
Tre
12:00 Gundegys Rancānis gleznu izstuod... @ Latgolys Kulturviesturis muzejs
Gundegys Rancānis gleznu izstuod... @ Latgolys Kulturviesturis muzejs
Apr 14 @ 12:00 – May 8 @ 18:00
Gundegys Rancānis gleznu izstuode "Klātesot" @ Latgolys Kulturviesturis muzejs
Nu 14. apreļa da 8. maja Latgolys Kulturviesturis muzeja lūgu vitrinuos ir īspieja apsavērt muokslineicys Gundegys Rancānis gleznu izstuodi “Klātesot”. Karteņa: rezekne.lv