Kas par latgalīšu volūdu saceits Vaļsts volūdys politikys pamatnūstuodnēs 2021.–2027. godam?

Kas par latgalīšu volūdu saceits Vaļsts volūdys politikys pamatnūstuodnēs 2021.–2027. godam?

Roksta autors: Vineta Vilcāne, portals lakuga.lv

Vaļsts sekretaru sanuoksmē oktobra suokumā izslodynuotys Vaļsts volūdys politikys pamatnūstuodnis 2021. – 2027. godam. Tymuos teik runuots ari par latgalīšu volūdu i pīmynāti darbeibys vierzīni i napīcīšamais finansiejums. Latgalīšu rokstu volūdys atteisteibai i nūstyprynuošonai īcarāts atvēlēt vaira kai vīnu miļjonu eiro.

Atbaļsteis latgalīšu rokstu volūdys atteisteibu

Pamatnūstuodņu projektu “Valsts valodas politikas pamatnostādnes 2021.–2027.gadam” izstruoduojuse Izgleiteibys i zynuotnis ministreja. Vaļsts sekretaru sanuoksmē projekts izsludynuots 8. oktobrī, vāluok tys juoskota ari Ministru kabinetam. Ar dokumentu var īsapazeit ITE.

Izgleiteibys i zynuotnis ministrejā portalam lakuga.lv nūruoda, ka pamatnūstuodņu projekta izstruodē i apsprīšonā īsasaisteja volūdnīki i ari aktivi latgalīšu kūpīnys puorstuovji, kuri izsaceja sovu vīdūkli. Tys tics jimts vārā dokumenta izstruodē.

Kai Vaļsts volūdys politikys viersmierkis 2021.–2027. godam ir nūsaceits nūdrūsynuot latvīšu volūdys ilgtspieju, tuos lītuojumu vysuos sabīdreibys jūmuos, sekmejūt volūdys izpieti i volūdys resursu atteisteibu i digitalizaceju, styprynuot sabīdreibys leidzdaleibu i individualū atbiļdeibu vaļsts volūdys politikys eistynuošonā, i atbaļsteit latgalīšu rokstu volūdys atteisteibu i lībīšu volūdys saglobuošonu.

Dokumentā identificāti Latvejis volūdys politikys puorvaļdeibai byutiskuokī nuokamajūs septeņūs godūs risynomī vaicuojumi, tūs storpā ari naregularais i nasistematiskais atbolsts latgalīšu rokstu volūdys izpietei i atteisteibai.

Latgalīšu kulturys bīdreibys vadeituojs Jurs Viļums nūruoda: “Cīši labi, ka dokumentā ir tics konstatāts, ka latgalīšu volūdai da šam ir tryucs regulara i sistematiska atbolsta. Ka tys ir nūruodeits vaļsts dokumentā, rokstūt projektu dasacejumus, prosūt nu vaļsts finansiejumu, varim atsasaukt iz itū dokumentu.”

Dokumentā ari atzeimuots, ka latgalīšu rokstu volūda ir byutiska latgalīšu identitatis apzinis daļa i naatjamama Latvejis kulturys vierteiba. Kai ari nuokamajūs septeņūs godūs veicami daudzveideigi atbolsta pasuokumi latgalīšu rokstu volūdys atteisteibai, izpietei i vuiceišonai vyspuorejā izgleiteibā i diasporā – latgalīšu volūda īkļaunama nūvodvuiceibā, vuiceibu programu paraugu i vuiceibu materialu izstruodē vysaida vacuma grupom, pasuokumi latgalīšu rokstu volūdys populariziešonai, školuotuoju izgleituošonai, vosorys nūmetnem.

Latgalīšu volūdai īcarāts atvēlēt vaira kai vīnu miļjonu eiro

Izstruoduotajā dokumentā īkļauts Vaļsts volūdys politikys reiceibys plans, t. sk., punkts 1.3. ar aizdavumu atteisteit i nūstyprynuot latgalīšu rokstu volūdu. Ituo punkta eistynuošonai nūsaceiti četri pasuokumi – latgalīšu rokstu volūdys izpiete; latgalīšu rokstu volūdys pareizraksteibys reika lingvistiskuos dalis izstruode; myusdīnu latgalīšu rokstu volūdys korpusa (MuLa) atteisteiba i digitalais reiks latgalīšu rokstu volūdys apgivei; atbolsta pasuokumi latgalīšu rokstu volūdys apgivei vyspuorejā izgleiteibā i diasporā.

Kai atbiļdeiguos institucejis pamatnūstuodņu projektā, nūsaceitys Izgleiteibys i zynuotnis ministreja i Tīslītu ministreja, sovukuort kai leidzatbiļdeiguos – Vaļsts volūdys centrs, Latvejis Universitatis Latvīšu volūdys instituts, Latvejis Universitatis Matematikys i informatikys instituts i Rēzeknis Tehnologeju akademeja. Pamatnūstuodņu aizdavumu eistynuošonā plānuota ari latgalīšu navaļstiskūs organizaceju īsaiste.

Nu pamatnūstuodņu projekta radzams, ka cikom nav konkreta finansiejuma mynātūs četru pasuokumu eistynuošonai, bet ir nūruodeits napīcīšamais finansiejums – 2021. godam 166 tyukstūšys eiro,  2022. godam 168 tyukstūšys eiro, periodam nu 2023. leidz 2027. godam kotru godu paradzātys 172 tyukstūšys eiro.

Kūpumā septeņu godu periodā latgalīšu rokstu volūdys atteisteibai i nūstyprynuošonai īcarāts atvēlēt vaira kai vīnu miljonu eiro.

Leidzekļus paradzāts īgiut videjuo termiņa budžeta lykuma ītvorūs, leidz ar tū itūšaļt navar apgolvuot, ka ministrejis īcarātais finansiejums latgalīšu volūdys situacejis uzlobuošonai pylnā apmārā tiks daškierts. Tys byus atkareigs nu vaļsts budžeta finansialajom īspiejom.

Pamatnūstuodņu projektā nav pīmynāts, cik lels finansiejums vajadzeigs kotra ar latgalīšu volūdu saisteituo pasuokuma eistynuošonai. Detalizaceja par pasuokumim i tim vajadzeigais finansiejums byus daīmams pamatnūstuodņu eistynuošonys plānā laika periodam nu 2021. leidz 2023. godam, portalam lakuga.lv nūruoda Izgleiteibys i zynuotnis ministrejā. Tū plānuots izstruoduot i īsnēgt apstyprynuošonai Ministru kabinetā da nuokušuo gods 30. apreļa.

Latgalīšu volūdai leluoka viereiba kai īprīkšejuos nūstuodnēs

Ka saleidzynoj 2021.–2027. gods Vaļsts volūdys politikys pamatnūstuodnis ar īprīkšejuo perioda pamatnūstuodnem, tod nuokušuo perioda pamatnūstuodēs latgalīšu volūdai pīvārsta daudz leluoka viereiba.

Pamatnūstuodnēs 2015.–2020. godam latgalīšu rokstu volūda ir pīmynāta viņ treis reizis, cikom pamatnūstuodnēs 2021.–2027. godam 17 rezis. Īprīkšejuo perioda dokumenta pasuokumu plānā pīmynāta viņ skatuvis runys konkursa “Vuolyudzāni” i latgalīšu literaturys, volūdys i kulturviesturis olimpiažu organiziešona, cikom nuokušuo perioda dokumenta reiceibys planā nūruodeiti četri pasuokumi ar daudz leluoku finaniejuma apjūmu, kuru eistynuošona nanūlīdzami uzlobuos latgalīšu volūdys situaceju.

Medeju atbolsta fonda īguļdejums nu Latvejis vaļsts budžeta leidzekļu. Par roksta saturu atbiļd portals lakuga.lv.

Print Friendly, PDF & Email

Nūtikšonu kalendars

May
24
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
May 24 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
May
25
Tre
16:00 Maja dzīduojumi pi krysta ar etn... @ Vabalis krysts
Maja dzīduojumi pi krysta ar etn... @ Vabalis krysts
May 25 @ 16:00 – 17:30
Majs katuoļu bazneicys kalendarā ir Svātuos Jaunovys Marijis mieness – laiks, kod Vabalē teik izpuškuoti ceļa molys krysti i nūteik maja dzīduojumi. Ari itūgod, saglobojūt vīnu nu namaterialuo kulturys montuojuma tradiceju, pogosta ļauds teik aicynuoti[...]
May
26
Cat
19:00 Daņču vokors ar folklorys kūpu “... @ Augšdaugovys nūvoda kulturys centrs "Vārpa"
Daņču vokors ar folklorys kūpu “... @ Augšdaugovys nūvoda kulturys centrs "Vārpa"
May 26 @ 19:00 – 21:00
Daņču vokors ar folklorys kūpu "Dyrbyni" @ Augšdaugovys nūvoda kulturys centrs "Vārpa"
Leidza: ārtys mainis kurpis doncuošonai, dzeramais iudiņs. Daleiba breiva.
May
27
Pīk
15:00 Diskuseja par Latgolys parka att... @ Reiga
Diskuseja par Latgolys parka att... @ Reiga
May 27 @ 15:00 – 17:30
Diskuseja par Latgolys parka atteisteibu @ Reiga
Reigys dūme piec latgalīšu navaļstiskūs organizaceju rūsynuojuma lāmuse Moskovys duorzu Reigā puorsaukt par Latgolys parku. Kab dūmuotu, kai reizē ar itom puormaiņom parku padareit par pīviļceiguoku teritoreju i īspieju reidzuonim car tū vaira izzynuot par[...]
20:00 Jura Ostrovska koncerts @ Tiļžys kulturys i viesturis noms
Jura Ostrovska koncerts @ Tiļžys kulturys i viesturis noms
May 27 @ 20:00 – 22:00
Jura Ostrovska koncerts @ Tiļžys kulturys i viesturis noms