Teik reikuota aptauja par treju pogostu nūsaukumu maiņu Viļakys nūvodā

Teik reikuota aptauja par treju pogostu nūsaukumu maiņu Viļakys nūvodā

Roksta autore: Sandra Ūdre, portals lakuga.lv

Viļakys nūvoda dūme da ituo gods 13. maja organizej īdzeivuotuoju aptauju Medņovys, Škilbānu i Vacumu pogostūs, kab noskaidruotu īdzeivuotuoju vīdūkli par pogostu nūsaukumu maiņu, viestej informaceja Viļakys nūvoda sātyslopā.

Aptaujis daleibnīki (tuoļuok – īdzeivuotuoji) ir Viļakys nūvoda Medņovys, Škilbānu i Vacumu pogosta īdzeivuotuoji, kuri 2021. gods 12. aprelī ir sasnāguši 18 godu vacumu i deklariejuši dzeivisvītu vīnā nu itūs Viļakys nūvoda pogostu. Aptauja teik organizāta, kotram itūs pogostu īdzeivuotuojam pīguodojūt apzeimūguotu aptaujis anketu, kuru īdzeivuotuojs aizpylda, īlīk kluot dalyktajā apzeimūguotajā aplūksnē, aizleimej, personeigi nūguodoj i īlīk aizplombātā aptaujis kastē.

Aptaujis vaicuojums aizdūts latvīšu literarajā volūdā:

  • Vai piekrītat ka Medņevas pagasta nosaukums tiek mainīts uz nosaukumu Medņovas pagasts?
  • Vai piekrītat ka Šķilbēnu pagasta nosaukums tiek mainīts uz nosaukumu Šķilbanu pagasts?
  • Vai piekrītat ka Vecumu pagasta nosaukums tiek mainīts uz nosaukumu Vacumu pagasts?

Pīkreitūt pogostu nūsaukumu maiņai, īdzeivuotuoji tyvynuos sova pogosta nūsaukumu, kas ir oficials vītvuords i kura raksteibu latvīšu literarajā volūdā i lītuojumu nūsoka normativī akti, iz vītys runuotajai formai. Vītvuordu atveide latvīšu literarajā volūdā paredz maksimali saglobuot vītejū formu. Vyspuoreigais princips ir Latgolys vītvuordūs vuorda calmu (vuords bez golūtnis) atstuot namaineitu, pīmāruot latvīšu literaruos volūdys sistemai viņ vuorda golūtni. Tok pošvaļdeibu ziņā ir pījimt lāmumus par vītvuordu formu.

Latgaliski raksteitī pogostu nūsaukumi nav oficiali vītvuordi. Rokstūt pogostu nūsaukumus latgaliski, vodomēs piec Latvīšu volūdys ekspertu komisejis Latgalīšu rokstu volūdys apakškomisejis 2019. goda 27. majā   apstyprynuotuo saroksta “Latgolys administrativais īdalejums: Latgolys piļsātys, nūvodi, pogosti”.

Juodasoka, ka itim trejim pogostim nūsaukumu davušuos vītys nav pogostu centri. Vītvuordu datubāzē par Medņovys vītvuordu atrūnama informaceja, ka jau 1922.–1940. gods kartēs latvyski raksteits napareizais “Medņeva”. Dūmojams, tys, kai daudzūs leidzeigys formys Latgolys vītvuordūs, varēja īsavīst, na nūskaidrojūt vītejū formu, a tulkojūt nu krīvu volūdys “Мѣднева”, kur “e” varēja byut suokūtnejais “ë”.

Vītvuordu datubāzē ari par Vacumu vītvuordu atrūnama informaceja, ka jau 1922.–1940. gods kartēs atrūnams apzeimuojumi “St. Vecumi”, “Vecumi”. Apsaverūt škārsteiklā 19. g. s. krīvu kartis, tamā vītā atrūnami apzeimuojumi “Ст. и Нов. Вятшне”, kas, dūmojams, breivvaļsts suokuos iztulkuoti latvyski par Vecumiem.

Ekranšuovini nu 1866. goda Šuberta militari topografiskuos kartis

Pasaverūt LNB digitalizātuos periodikys resursus, juopīzeist, ka 20. g. s. suokuos Reigys avīzis Škilbānu vuordu latvyski roksta “Sķilbāni”, pīmāram, “”Dzimtenes Wehstnesis” roksta: “Rekova ir ferma Šķilbānu novadā, Baltinovas pagastā.” Pīmynāts ari “Šķilbānu zemkopju pulciņš, Šķilbānu pārtikas beedrība”. (1910, nr. 256) Sovutīs 20.–30. godūs jaunizveiduotū pogostu sauc “Šķilbēnu pagasts”, a muižys nūsaukumu roksta “Šķilbanu muiža”, kartēs atzeimuotī “Skilbani” vysdreizuok ir muižys vīta. Garuma zeimem tūlaik pīgrīž moz viereibys, presē var skaiteit interesantus tekstus, kur izreiz radzami vīna vītvuorda vairuoki varianti, pīmāram, par kaidu zemis gobolu dokumentā “Galīgi piešķirtās zemes”: Jaunlatgales apr. Škilbenu pag. Škilbanu m[uižas] 58362 Škilbēnu pag. sab-ba (pamatskolai) I. gr. 2F 4,40a).” (Zemes Ierīcības Vēstnesis, 1931, nr. 435) Napareizais “Šķilbēni” tyka lītuots padūmu laikā i ari šudiņ.

Nūbolsoj par sova pogosta latgaliskuoku nūsaukumu! Ar tū mes dreizuok sakuortuosim vysys Latgolys vītvuordus.

Karteņa: Škilbanu nūsaukumu izmainis. Publicitatis materials
Print Friendly, PDF & Email

Kalenders

May
21
Ūtr
15:00 Izstuodis “Juoņs nu Dzeņagola” a... @ Latgolys Kulturviesturis muzejs
Izstuodis “Juoņs nu Dzeņagola” a... @ Latgolys Kulturviesturis muzejs
May 21 @ 15:00 – 16:30
Izstuode byus veļteita muokslinīkam i literatam Juoņam Trūpam (1924-1989), pīmynūt jū symtgadē. Koč i sovys dzeivis leluokū daļu J. Trūps ir pavadejs trymdā, dzeivuodams ASV natuoli nu golvyspiļsātys Vašingtonys, vystik vysu sovu rodūšū darbeibu, breivū[...]
22:05 Annele Slišāne. Tuoraga stuosti.... @ Latvejis Radio 1
Annele Slišāne. Tuoraga stuosti.... @ Latvejis Radio 1
May 21 @ 22:05 – 23:00
Annele Slišāne. Tuoraga stuosti. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]
May
22
Tre
22:05 Egita Kancāne. Syltuo mola. Rade... @ Latvejis Radio 1
Egita Kancāne. Syltuo mola. Rade... @ Latvejis Radio 1
May 22 @ 22:05 – 23:00
Egita Kancāne. Syltuo mola. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]
May
23
Cat
22:05 Valentins Lukaševičs. Casnāgu ma... @ Latvejis Radio 1
Valentins Lukaševičs. Casnāgu ma... @ Latvejis Radio 1
May 23 @ 22:05 – 23:00
Valentins Lukaševičs. Casnāgu maizeitis. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]