Rokstu sagataveja: portals lakuga.lv

Latvejis Muzykys informacejis centrs izveiduojs albumu, kurā ir 18 džeza kompozicejis, tymā skaitā ari Latgolys džeza trio “Trio Lipskis/Justs/Arbidāns” skaņdorbs “Oki, Nalej, Leiteņ”. Albums “Jazz in Latvia 2021” eipaši radeits Vuocejis džeza festivalam “jazzahead!”

“Trio Lipskis/Justs/Arbidāns” sastuovā ir treis Latgolys jaunīši – Jurģis Lipskis, Kristians Justs i Ralfs Arbidāns, kuri pārnejuo goda decembrī izlaide sovu pyrmū albumu “Taids džezs”. Tys ir pyrmais džeza albums Latgolā.

Trio dalinīks Jurģis Lipskis par albumu stuosta tai: “Tys beja myusu pyrmais abums, leidz ar tū mes puorbaudejom gon poši sevi, gon sovstarpejū sadarbeibu, gon tehniskuos zynuošonys, kas vajadzeigys albuma izveidei no “a” leidz “z”.”

Albumā “Taids džezs” apkūpuoti pīci jauni aranžejumi, kuru pamatā ir latgalīšu tautysdzīšmu melodejis. Skaņdorbs “Oki, Nalej, Leiteņ” īkļauts ari albumā “Jazz in Latvia 2021”. Trio stuosta, ka albuma tapšona beja izaicynuojums, kas praseja daudz laika i energejis. Jurģis doluos: “Rezultats, munupruot, ir jauks, tok vēļ lobuoks nūviertiejums ir myusu skaņdorba īkļaušona Latvejis džeza vizitkartē aba albumā “Jazz in Latvia 2021””.

Džeza trio pīsadaleja ari vīnā nu leluokūs Eiropys džeza konferenču – “Jazzahead!”. Jurģis skaidroj: “Mes skaņdrobu īrakstejom video formatā Latvejis digitalajam stendam konferencē, jau dreizumā tys byus daīmams klauseituojim.”

Trio “Lipskis/Justs/Arbidāns” albumu “Taids džezs” var nūsaklauseit vairuokuos muzykys straumiešonys platformuos, tymā skaitā, “Spotify”, “ITunes” i “YouTube”.