20. atkluotuos vaļsts olimpiadis latgalīšu rokstu volūdā rezultati
Roksta autore: Veronika Dundure, LVLKŠA vadeituoja
Šūgod 20. atkluotuo vaļsts olimpiade latgalīšu rokstu volūdā nūtyka tīšsaistē, partū aizdavumu beja mozuok – vysa tik treis kuortys i maksimalais dabojamūs punktu skaits – 60.
1. kuortā jaunīši ruodeja latgalīšu raksteibys pamatu zynuošonu, reizē aktualizejūt Latgolys kulturys dzeivis nūtykumus 2020. godā. Vajadzēja puorceļt latgaliski O. Kūkuoja dzejūļu kruojumu nūsaukumus, saraksteit tyvuokūs radinīkus, īvārojamuokūs Latgolys dobys objektu nūsaukumus i tml. Vuorda “upe” lūceišona izaruodeja saregžeita, mulsynuojs i vaicuojums par vītu vuordim. Volūdys aizdavumus i šūgod beja sagatavejuse LU profesore Lideja Leikuma. Ar 1. kuortys aizdavumim var īsapazeit ITE.
2. kuortā školāni piļdeja aizdavumus par V. Kairiša filmu “Piļsāta pi upis”, kurūs kai kasgods beja sagatavejuse RTA profesore Ilga Šuplinska, šūbreid Latvejis Izgleiteibys i zynuotnis ministre. Olimpiadis nūtikšonu analizē I. Šuplinska izsaceja gondarejumu, ka filmys golvonuos idejis ir saprostys, koč viesturis fakti školānim zynomi navīnaidā mārā. Datryucs filmā lītuotūs muokslinīciskūs pajiemīņu dziļuokys izpratnis i detalizacejis viertiejuma nūtykumu seceibā. Ar 2. kuortys aizdavumim var īsapazeit ITE.
3. kuorta otkon beja tradicionala, beja juopylda tests par kulturys dzeivi Latgolā 2020. goda gaitā i jaunuokajim izdavumim literaturā, muzykā. Ospruoteigus vaicuojumus otkon beja sagatavejuse rakstneica i žurnaliste Sandra Ūdre. Izaruodeja, ka “Boņuka 2020” laureatu Voldemaru Vogulu školāni lobuok pazeist kai keramiku, a na dzejnīku. Ari na vysi jaunuokī izdavumi par Latgolu bejuši rūkuos turāti, koč tys ir tikai lykumsakareigi. 3. kuortys testu portals lakuga.lv pīduovoj izpiļdeit tīšsaistē i puorbaudeit sovys zynuošonys Latgolys kulturys nūtikšonuos. Tests ITE.
Olimpiadis nūtykumu gaitys viertiejumā izskanēja vīna vīneiga vīnuota gribiešona — iz cyta gods sasatikt kluotīnē! Lai izadūd!
Rezultati:
1. vīta – Nautrānu vydsškola: Laima Grišule, Viktorija Krišāne, Anna Kristijana Logina, Saiva Karmena Magiča i Viktorija Lukšane, školuotuoja Veronika Dundure;
2. vīta – Rēzeknis Vaļsts 1. gimnazeja: Samanta Kristiāna Augustova, Elīna Batare, Ralfs Bilinskis, Ramona Daukste-Saleniece, Ilva Lontone, školuotuoja Irēna Prikule;
3. vīta – Ludzys piļsātys gimnazeja: Marika Audijāne, Sanda Augustova, Amanda Daukste, Jana Matvejeva, Maija Rancāne, školuotuoja Laila Budreviča.
