Raiņa muzeja “Jasmuiža” duorzā apsaverama foto izstuode
Rokstu sagataveja: portals lakuga.lv
Nu 5. maja da 31. oktobra Raiņa muzeja “Jasmuiža” breivdobys teritorejā, Preiļu nūvoda Aizkaļnē, apsaverama foto izstuode “Raiņa dzejolis fotogrāfijā”. Jei izveiduota projekta “Rainis un fotogrāfija” aktivitatēs, informej Memorialūs muzeju apvīneibys sabīdryskūs attīceibu specialiste Zane Grudule.
Bīdreiba “Tautas fotostudija “Ezerzeme – F”” 2020. godā aicynuoja fotografus nu vysys Latvejis īsasaisteit fotokonkursā “Raiņa dzejolis fotogrāfijā”. Konkursam tyka atsyuteiti vairuok kai 30 autoru dorbi, nu kurūs 23 tyka nūdrukuoti iz iudiņa iztureigom foto planšetem, pīvīnojūt attīceigys Raiņa dzejūļa ryndys. Projektā pīsadaleja fotografi nu Līpuojis, Ventspiļs, Reigys, Jelgovys, Jiurmolys, Daugovpiļs, Īlyukstis, Naujinis, Viļakys i Ūgris.
Projekta autore Ilze Onzule cer, ka itū fotomaterialu varēs izmontuot ari tuoļuok, organizejūt pasuokumus i īšktelpuos, i uortelpuos, partū ka foto planšetis ir iudiņa iztureigys, vīgli eksponejamys i puorvītuojamys.
2020. godā fotografejis beja apsaveramys Raiņa sātā Berkenelē, i ari itūvosor dažys nu fotografeju apsaveramys Raiņa bierneibys sātā. Tok leluokuo daļa nu fotoizstuodis niu aizceļuojuse iz Raiņa jaunu dīnu zemi – “Jasmuižu”.
Projektu “Rainis un fotogrāfija” finansiali atbaļsteja Latgolys regiona atteisteibys agentura, Vaļsts kulturkapitala fonds i A/S “Latvijas valsts meži”.
