Kulturys īsacejumi nedeļai: īpazeisti Viļānus!

Kulturys īsacejumi nedeļai: īpazeisti Viļānus!

Sagataveja: portals lakuga.lv

Itymā nedeļā pīdzeivuošonys pīturys punktus īsoka Daiga Laizāne aba DJ Deila, ar kuru īsapazeit i puorskaiteit interveju lakuga.lv varēja aizvadeitajā nedeļā (ka napuorskaiteji, tod tū var izdareit ITE). Daiga, kurys dzymtuo puse ir Viļāni, itūnedeļ aicynoj iz tīni, sokūt: “Īpazeisti Viļānu golvonū ūļneicu ar velosipedu, pagiun leidza Viļānu kebabu i ej tū apēst iz piļsātys mistiskū azaru!”

1. Reigys i Breiveibys ūļneicys

Ka tev pateik skrīt garuokys distaņcis ci braukt ar velo, tod laidīs iz Viļānim! Piļsātys golvonuos ūļneicys – Reigys i Breiveibys ūļneicys – ir lobīkuortuotys, kab tī var izbraukt ar velosipedu ci natraucātai izskrīt garuoku distaņci. Īlys garumā redzēsi dažaidus piļsātai svareigus objektus, par pīmāru, Viļānu deļžaceļa tyltu, Viļānu Rūmys katuoļu bazneicu ar lelū duorzu, Kulturys noma laukumu, koč kur aiz pakša byus radzama ari Viļānu vydsškola, piļsātys būdis i stadions. Ka itys pūsmys ruodeisīs par eisu, tod pi Viļānu stadiona īsagrīz Raiņa īlā, kas teve nūvess da Laksteigolu solys, tuoļuok gar Viļānu muzykys i muokslys školu, vacū muižys sātu  Viļānu HES.

Karteņa: Viļānu golvonuo ūļneica, nu lakuga.lv arhiva

2. Kebabs iz skrytulim

Piec kuorteiga sporta, ak jau, sasagribēs nazkuo aizēst. Jau kaidu šaļti dorbadīnu vokorūs i breivdīnys ēst grybātuoju ailis stīpās pi Viļānu piļsātys stadiona, kur ir nūsabāzejs kebabs iz skrytulim (kaids tuo nūsaukums, vys vēļ nazynu), bet garšoj dyžan labi!

Karteņa: Viļānu kebabs, nu Daigys Laizānis personeiguo arhiva

3. Laipa mistiskajā azarā

Vysu lobuok kebabu nūbaudeit kaidā mīreigā vītā, deļtuo īsoku nūīt iz Viļānu mistiskū azaru, kur pyrma kaidys šaļts tyka lobīkuortuota apleicīne, kab tys byutu pīmāruots piknikim. Maņ kai bārnam, kurs sātā nav pīradynuots ēst pi golda… i asu izbejušais “divanā āduojs”, vysu ārtuok ruodīs tū dareit iz maunūšuos laipys. Cyta storpā, runoj, ka azara dybynā ir nūgrymuse bazneica, kurys tūrni reizi pa reizei pasaruodūt. Tū maņ stuosteja bierneibā, bet, voi tai eistyn ir… aicynoju puorbaudeit!

Karteņa: Viļānu azara laipa, nu Daigys Laizānis personeiguo arhiva
Print Friendly, PDF & Email

Kalenders

Jul
16
Ūtr
17:00 Rezidejūšūs muokslinīku publisku... @ Rotko muzejs
Rezidejūšūs muokslinīku publisku... @ Rotko muzejs
Jul 16 @ 17:00 – 18:30
16. julī 17.00 stuņdēs Rotko muzejā sevkuram byus vareiba īpasazeit tyvuok ar ostonim storptautyskim muokslinīkim publiskajuos prezentacejuos, kurymuos jī īpazeistynuos ar sevi i sovu dailradi.   Nedelis garumā, nu 12. da 19. juļa Eiropys Savīneibys[...]