Vacuos zečubiksēs sabārti seipuli

Vacuos zečubiksēs sabārti seipuli

Sagataveja: Ilze Sperga i portals lakuga.lv

Par itim dzejūlim Valentins Lukaševičs soka tai: “Ir na tikai četri vierzīni, bet ari pīci i seši – var īt na viņ iz prīšku, bet ari atpakaļ, pasagrīzt pa labi voi pa kreisi. Vēļ ir vertikalī vierzīni – krist iz zamašku i ceļtīs iz augšu.” Puorskaiteišonai vēļ napublicātī Valentina Lukaševiča dzejūli, bet sarunu ar autoru skaitit ITE.

***

Vacuos zečubiksēs sabārti seipuli.
Karinej taišni pi plitys.
Izberu uorā iz greidys,
Verūs, kaidi tī burti!
Labi. Nui, lai tai…
Eu, a itū volūdu
Nudi es naprūtu.
Baba vēļ zynuoja.
Smiļtīs ar zareņu raksteja.

***

Daudzim latgalīšu gruomotys
ir kai garbuzi iz palūdzis.

***

A nikas nav juodora.
Juopaīt molā i juoapsastuoj.
Leidz bezdibeņam 10 sūļu.
Nav jāgys ni runuot, ni pat klīgt.
Vīni īt smīdamīs i skali dzīduodami,
Ūtri skaļruņus ausīs sabuozuši.

***

Jis auški pacēle breiveibys karūgu.
Tikai navā vieja, kas tū plandynoj.

***

Es kai vacais vepss,
Kai ižors, kai sudets
Turpynoju gruzdēt.
Kvāpuot. Siļdeit
Gaisu pūra vydā.
Saknis zamyn syunys.
Lānai izlaidynoju
plasmasys butelku,
Kuru te pamete
Pyrma divsymts godu.

***

Garuokys par romanim
Ir tikai tautysdzīsmis.
Kur upe ītak jiurā.
Kur saule lāc reitūs.

***

Maņ napatyka nikas nu tuo.
Tuo beja cīši par daudz.
Vīnā kuļcīnī naizdzert.
Ar vīnu pyutīni nanūpyust.
Ar vīnu vuordu napasaceit.

***

Ka maņ byus solts,
Voi tu īteisi
Mani sovā sagā?
Pologu navajag.
Pītiks ar krāslu.
Ar sleipu mugureni.
Kod vajag, es varu
Sasaraut i mozuoks par kači.

***

Ar pīri atsaspīžu
pret prīdi.
Sveči daleipst pi motu.
Bārzs nu aiz mugorys saprūt –
Es runoju ar muoti.

***

Es runoju ar tāvu.
Viejs apsastuoj. Klausuos.
Jis nagrib zynuot kas tī.
Jis grib zynuot kas ite.

***

Leits tikpat troks kai i es.
Naguļ vysu nakti.
Nu reita obi aizīmam gulēt.
Vīnā gultā grūzomēs.
Ar alkiuni ībokstam
pa mīgam.

***

Navā spāka jai pīraksteit.
Navaru atrast eistūs vuordus.
Tod saprotu, ka taidu i navā.
Ka tī, kur mes byusim,
Navā gruomotu. I volūdys.
Ni škeivu. Ni cymdu. Bet…
Meiluo… Maņ pošam baiss.
Pīdūd, ka vari. Lyudzu.

Print Friendly, PDF & Email

Kalenders

May
25
Sai
19:00 Grupys “Raxtu Raxti” i “Sinfonie... @ koncertzāle "Lielais Dzintars"
Grupys “Raxtu Raxti” i “Sinfonie... @ koncertzāle "Lielais Dzintars"
May 25 @ 19:00 – 21:00
Līpuojis koncertzālis pavasara sezonys nūslāgumā iz leluos skotivis varēs pīdzeivuot eipašu mageju, kū veiduos mejīdarbeiba tautys i akademiskuos muzykys vydā – grupa “Raxtu Raxti” i kamerorkestris “Sinfonietta Rīga” dirigenta Normunda Šnē vadeibā. Kūpeigajā koncertprogramā skanēs[...]
19:00 Leluo Latgolys zaļumballe @ Lūznovys muiža
Leluo Latgolys zaļumballe @ Lūznovys muiža
May 25 @ 19:00 – 23:00
Zaļumballi īskandynuos grupa “TRIO Rāzna +”, bet vokora ūtrajā daļā apmaklātuojus energiski i skaneigi izklaidēs grupa “Stradivari”.   Īīšonys moksa 4,00 eiro.   Biletis “Biļešu paradīzes” kasēs i Lūznovys muižā.