Rokstu sagataveja: portals lakuga.lv

Informativajā kampaņā “Atrastā Latvija” aicynoj izpieteit vysaidus kulturys i dobys montuojuma objektus 40 vaļsts pošvaļdeibuos. Objekti sadaleiti septeņūs ceļūs, diveji nu jūs – Muorys i Daugovys ceļš – īt cauri Latgolai.

Nu 2018. goda veikti atjaunuošonys i byuvnīceibys dorbi, kurūs rezultatā 40 Latvejis pošvaļdeibuos ir atjaunuoti i izbyuvēti 60 vysaidi kulturys i dobys montuojuma objekti. Latvejis muižys, piļs, bazneicys, parki, muzeji, dobys stygys i vēļ kas cyts sakuortuots septeņūs kulturys i dobys montuojuma ceļūs – Baltejis, Breiveibys, Gaismys, Daugovys, Jākuba, Līvu i Muorys ceļūs. Caur Latgolu īt diveji – Daugovys i Muorys ceļš.

Īmūt pa Daugovys ceļu, kas suocās Ūgris nūvodā i beidzās Kruoslovā, varēs apsavērt gon Ūgris bejušū sanatoreju, Kūknesis piļsdrupys, Krustpiļs pili, gon ari lauku sātu “Slutiški 2” i redzēt Kruoslovys piļs atjaunuotū kompleksu.

Sovutīs Muorys ceļš vad cauri Preilim, Ludzai i Daugovpilei. Sekojūt Muorys ceļam, var apsavērt Ludzys vydslaiku piļsdrupys, Preiļu muižys kompleksu i parku, kai ari Daugovpiļs cītūkšņa Inžinerarsenalu i bastiona eskarpa sīnu.

“Atrastā Latvija” atkluošonys pasuokumā geografs i pūra puorguojīnu vadeituojs, kai ari bloga dodiesdaba.lv autors Kristaps Kiziks stuosteja par īspaidim, kas giuti, izīmūt gon Daugovys, gon ari Muorys ceļu.

Kristaps aicynuoja apmeklēt Slutišku vacticeibnīku sātu, piec tuos – ari vysu Latgolu. “Tī ir sasaglobuojuši gon vacī kūka grīzumi, var īpazeit vacuos paražys. Kas ir svareigi – ite redzīs, ka laiks ir apsastuojs voi kustīs daudz lānuok. Juopasasteidz [Slutišku sādžu] apmeklēt, ari vysu Latgolu, cikom 21. godu symts ite nav atguojs.”

Sevkurs sātyslopā atrastalatvija.lv var vaira izzynuot par vysaidim kulturys i dobys montuojuma objektim, dabuot informaceju par objektu apmekliešonu, kai ari pīsadaleit Latvejis atrasšonys spēlē.

Spēlē “Atrastā Latvija” varēs nūvērtēt vysaidus objektus, atbiļdēt iz vaicuojumim, i tikt pi vierteigom bolvom, pīmāram, nakšņuošonys i iedīņreizis Šlokenbekys muižā.

Vaira par “Atrastā Latvija” var skaiteit ITE.