Kai pareizi – pliesšona voi plēšona, sūliešona voi sūleišona?
Roksta autore: Sandra Ūdre, portals lakuga.lv
Izskaņa -šona/-šonuos ir tipiska darbeibys ci procesu nūsaukumu izskaņa, lītvuordus ar jū darynoj nu darbeibys vuordu nanūteiksmis. Problemys ar latgalīšu pareizraksteibu rūnās nazynuošonā, kaids patskaņs voi divskaņs rokstoms izskanis -šona/-šonuos prīškā.
-eišona, -ēšona voi -iešona?
Atvasynuojumūs nu -uot darbeibys vuordu parosti klaidu nav, pīmāram, runuotīs → runuošonuos, dzīduot → dzīduošona, sovutīs cytūs gadejumūs viņ runuotuos volūdys zynuošona napaleidz, rūnās vaicuojumi, pīmāram, – gaideišona, gaidēšona voi gaidiešona? Patīseibā nav sarežgeitai.
Ka darbeibys vuords beidzās ar izskaņu -eit, kam latvīšu literarajā volūdā atbylst -īt, tod ei palīk ari lītvuordā pyrms izskanis -šona/-šonuos, pīmāram:
gaideit (gaidīt) → gaideišona gaidiešona gaidēšona
vuiceitīs (vuicīties, mācīties) → vuiceišonuos vuiciešonuos vuicēšonuos
Ka darbeibys vuords beidzās ar izskaņu -ēt, kam latvīšu literarajā volūdā atbylst ari -ēt, tod ē pyrms lītvuorda izskanis -šona/-šonuos palīk par ie, pīmāram:
aizagavēt (aizgavēties) → aizagaviešona aizagaveišona aizagavēšona
kavētīs (kavēties) → kaviešonuos kaveišonuos kavēšonuos
Pīzeime: rokstūt piec t. s. Stroda ortografejis, divskani ie nikur nalītoj i tod gon vysur roksta ē – aizagavēšona, kavēšonōs.
Leidzskaņa zudums voi atstuošona?
Lela daļa latvīšu volūdys darbeibys vuordu ir bez pīdiekļu – I konjugacejis verbi. Latvīšu literararuos volūdys pareizraksteibys lykums vuica – I konjugacejis verbim, kam sakne nanūteiksmē beidzās ar ss voi -z, leidzskaņs lītvuordā pyrms -šona/-šonuos zyud. Sovutīs latgalīšu rokstu volūdā preteji – leidzskaņs teik saglobuots, pīmari obejuos literarajuos volūduos:
vest → vešana vesšana
vest → vešona vesšona
kristies → krišanās krisšanās
kristīs → krišonuos krisšonuos
sanest → sanešana sanesšana
sanest → sanešona sanesšona
lauzties → laušanās lauzšanās
lauztīs → laušonuos lauzšonuos
Kod I konjugacejis darbeibys vuorda nanūteiksmis saknē ē
Darbeibys vuorda nanūteiksmis saknis ē atvasynuotajā lītvuordā puorsamej par ie, pīmāram:
sēt → siešona sēšona
plēstīs → pliesšonuos plēšonuos plēsšonuos pliešonuos
