Rokstu sagataveja: portals lakuga.lv

Raidīrokstu aba aplāžu aba podkāstu klauseišonūs niu drūsai var saukt par 21. godu symta vīnu nu popularuokūs breivuo laika nūdarbu. Ruodīs, ka sevkurs var atrast sev atbylstūšu podkāstu par temu, kas interesej i aizraun. Ari latgaliskajā kulturtelpā ir pa kaidam podkāstam, kurā var izzynuot kū vaira par iedīņa gatavuošonu, literaturu i sabīdreibai aktualom temom.

Puslopys

Raidīroksts “Puslopys” tūp Latvejis Radejis Latgolys studejā Rēzeknē i īpazeistynoj ar myusdīnu latgalīšu literatim, autorim, tūs kasdīnu, volūdu, raksteišonu. “Puslopuos” var dzierdēt na tikai sarunu ar autorim par dzeivi, bet ari autordorbu fragmentus i kaidu jaunu dzīsmis skici ar konkretuo raidīroksta autora vuordim.

Ar literatim klauseituojus īpazeistynuoj muzikis i viesturnīks Arnis Slobožanins i latgalīšu volūdys entuziaste, kai ari marketinga specialiste Edeite Husare.

Niu ir daīmami deveni raidīroksti – kotrys par sovu autoru, jaunuokais – par Anitu Graudiņu aba Plōciņu Masi. ITE var nūsaklauseit vysus “Puslopu” raidīrokstus.

Ej šī! parunuosim? 

“Ej šī! Parunuosim?”, kai par tū stuosta raidīroksta radeituojis – Leila Rasima i Aija Mežale –, ir vīta breivai, vīnkuoršai sarunai ar “parostajim miersteigajim” par temom, kuruos parosti ļauts runuot tikai “namiersteigim”.

Septeņuos epizodēs ir runuots gon par Marsa parku, Jaunuo goda apsajimšonom, gon par depreseju, kai ari jaunuokuo raidīroksta temu – demokrateju. Vaira par “Ej šī! Parunuosim?” var skaiteit ITE.

Latgalīšu kukne

Škārsteiklā jau ir seši raidīroksta “Latgalīšu kukne” raidejumi, kurūs dzejneica Ingrida Tārauda, kurei niu dzeivoj Īrejā, apvīnoj sarunys ar vysaidim cylvākim par vysaidom tradicejom ar iedīņa gataveišonys meistarklasem. Jaunuokais “Latgalīšu kukne” raidīroksts ir kūpā ar kanepu audzietuoju i “Obelisk Farm” eipašnīku Andri Višnevski i sabīdryskū aktivisti Jolantu Smani.

Pyrmajuoņu raidejumā Andris ar Jolantu gataveja kanepu pīnu i salatus ar kanepu sāklom, jūs eļļu. Vaira par raidīrokstu “Latgalīšu kukne” var izzynuot ITE.