Rokstu sagataveja: portals lakuga.lv

Latgalīšu Kulturys bīdreiba izsludynuojuse dasasaceišonu pusaudžu (10–14 godi) dīnnakts nūmetnei “Sūpluok saimē 2021”, kas nūtiks nu 2. da 7. augusta Rēzeknis nūvoda Rogovkā.  Dasasacejumus juosyuta da 19. juļa, viestej nūmetnis “Facebook” konts.

Kab pretendēt iz daleibu nūmetnē, bārnus aicynoj atsyuteit dorbu breivā tehnikā par temu “Muna saime”. Tys var byut zeimiejums, plakats, dzymtys kūks, literars teksts, video i tml. iz e-posta adresi supluok@gmail.com, nūruodūt vuordu, uzvuordu, telefona numeri, e-posta adresi.

Nūmetnis dorba grupa ir Evika Muizniece, Ilga Šuplinska, Ingars Gusāns, Māris Justs, Ēriks Zeps, Sandra Juste, Inga Vigule, vadeituoja Lolita Kivleniece-Kuzņecova. Projektu realizej Latgalīšu kulturys bīdreiba sadarbeibā ar Rēzeknis nūvoda Nautrānu pogosta puorvaļdi. Pasuokumu finansiali atbolsta Sabīdreibys integracejis fonds nu Latvejis vaļsts budžeta leidzeklim.

Nūmetnis vadeituoja Lolita Kivleniece-Kuzņecova par ituogods “Sūpluok saimē” nūmetni: “Myusu dīnuos pusaudžim ir svareigi na tik izaraut nu komunikacejis tryukuma i sūpluok pavadeit laiku dažaiduos aktivitatēs (byus sarunys, spēlis, taps fotosesejis, eiskinys, podkāsti, struoduosim ar sova īškejuo i uorejuo tāla veiduošonu, sasatiksim ar aizrauteigim nūvoda cylvākim), bet ari apdūmuot, cik svareigys latgaliskuos vierteibys ir maņ, munai saimei, munai i Latgolys nuokūtnei. Tys (i vēļ daudz kas nanūsauktais: nakts orientiešonuos i dažaidi pīdzeivuojumi) byus spylgts tovys vosorys nūtykums, atrūnams ci nu jauna īpazeistams nūmetnē “Sūpluok saimē”!

Tradiceju i kulturys montuojuma saglobuošonā pamatā tok ir tys, cik labi i interesanti prassim tū skaidruot jaunajai paaudzei,  audzynojūt jūs par Latgolys kulturys i saimis vierteibu kūpiejim nuokūtnē.”

Pyrmuo radūšuo, muokslinīcyskuo i latgaliskuo nūmetne bārnim i pusaudžim “Sūpluok” nūtyka 2018. godā nu 6. da 17. augusta Rēzeknē, puļcejūt 32 dalinīkus, nu kurūs vairums beja nu Rēzeknis i Rēzeknis nūvoda. Nūmetnei nūsaukumā dūtais vuords “sūpluok” latvīšu literarajā volūdā nūzeimoj ‘blakus’, ‘līdzās’.