Taida tei caurveja

Taida tei caurveja

Sagataveja: Ilze Sperga i portals lakuga.lv

Itys ir Ingridys Tāraudys dzejis kuortejais publiciejums portalā lakuga.lv Par itim dzejūlim poša autore soka: “Izjam kuru ryndu nu kura panta i dalīc kluot cytai ryndai nu cyta panta – vyss tai organiski sasaliks jaunā pantā. Taida tei caurveja ryndom i vuordim kai zača pūgom.” Sarunu ar dzejneicu skaitit ITE.


***

Satikšu sasatikšu nūsatikšu
Dūmuošu padūmuošu aizadūmuošu
Zynuošu izzynuošu apsazynuošu
Kai taida caurveja
Kotrai puļsa kusteibai


***

Taids tys vokors taida
Tei dzīsme iz munys i
Tovys dzeivis smylguos
Savārtys pļovys zemneicys
Kai kleitys pūgys tovūs
Pierstūs uovejās
Reitdīnys nazyn i kas


***

raibumi sasamisiejuši tauryna
spuornūs spylgti izgaismuots
bezsusātivu laiks pīpiļdeits pusi
nu saprast/na-
caurspeideigys caurulis tovs
smailais papīds roda
īpleisumu vysur tai navajag
nazini tu kai
pareizi aizīt cylvāki


***

Konturom īzeimuot
Myusu pīkrasti kurelpys plyuda
Viļnim gluosteigums pādys smiļktīs
Ni aizskrīt ni palikt ni
Malns markers kārmynā
Pabeigts vyss


***

partū ka tod kod
narokstu īrostim
pierstu vejumim tovus
plaksteņus gluostu i aiz lūga
tymst bezgaleibā sadag
putekļūs sabyrst puorsoku
tūrni
zīmcīteigys lyupys
ni skanis


***

tymsa ustoba kai
varāts tai dareits nu
pa lejom spraucās soltums
dalnuos ar tovu atguodynuojumu
vairs zalti nabyrzuļuos iz


***

juļa leitam cytaida
garša i smaržoj lilejis
Īrejis pi sātys duorzūs
navaicuot otkonuma
nūbādzynuot telefona
lai ir kai naz’kod –
satikt ar nūjausmi


***

vuordi kai začapūgys* voi
pyupoli puori lyupom
i aizripoj ripoj voi voi


***

atlīk saskaiteit divi
plus divi dreiži pasaceļ
lidmašinys bāgumi paisumi
okeans ar jiuru sasatykdami
rokstus zeimoj lai saprostu
aizlīku dalnu acim


***

vosorys aizačeršona pļovuos
smolkom maņ pučeitem kleita i
bolts krakl’s tev vacais
mopeds kas apleicīnē
modnuokais
divi mes i putekli
aiz

* Matainais uobuleņš (Trifolium arvense).

Print Friendly, PDF & Email

Kalenders

Dec
9
Sai
11:00 Adventa skaitejumi @ Rēzeknis Centraluo biblioteka
Adventa skaitejumi @ Rēzeknis Centraluo biblioteka
Dec 9 @ 11:00 – 13:00
Iz tradicionalajim Adventa skaitejumim aicynuots sevkurs dzejis raksteituojs i cīneituojs, kurs, īsaklausūt dzejis ailēs, grib rast pyrma svātku mīru i jutūni. Pasuokuma gosti – literatu kūpa “Latgales ūdensroze”.
13:00 Siedeibys Izvoltā @ Izvolta biblioteka
Siedeibys Izvoltā @ Izvolta biblioteka
Dec 9 @ 13:00 – 15:00
Siedeibys Izvoltā @ Izvolta biblioteka
16:00 Koncertizvadums “Ar Latgali dzie... @ Bolūžu kulturys noms
Koncertizvadums “Ar Latgali dzie... @ Bolūžu kulturys noms
Dec 9 @ 16:00 – 18:00
Latgolā dzymušuos dzīsmēs i sirsneibā Latgolai veļteituos melodejuos vokalā duetā apsavīnuojuši solisti Dainis Skutelis i Andris Baltacis. Obeji dzymuši, auguši i vys vēļ dzeivoj i struodoj Latgolā, i kurs gon vēļ lobuok var viesteit latgaliskū,[...]