Atkluots pīmineklis profesorei Irēnai Silinevičai

Atkluots pīmineklis profesorei Irēnai Silinevičai

Rokstu sagataveja: portals lakuga.lv

21. julī Kruoslovys (bejušais Dagdys) nūvoda Ezernīku pogosta Bukmuižys kopūs tyka atkluots pīmineklis Rēzeknis Augstškolys, niu Rēzeknis Tehnologeju akademejis (RTA), dybynuotuojai profesorei Irēnai Silinevičai, informej RTA Sabīdryskūs attīceibu nūdaļa.

Irēna Silineviča (25.04.1943.–26.02.2020.) dzymuse Kruoslovā, beja inžinerzynuotņu doktore, kai ari Latgolys i Latvejis patriote. Profesore piec augstškolys dybynuošonys 10 godus beja ari tuos rektore, apbolvuota ar vairuokim atzineibys rokstim nu Izgleiteibys i zynuotnis ministrejis, akademejis. 1998. jai daškierts ari Treju Zvaigžņu ordiņs, nu 2008. goda – Rēzeknis Gūda pylsūnis tituls, 2013. godā jei sajāme Rēzeknis Augstškolys Gūda profesoris nūsaukumu.

Pīminekļa tieļneica Svetlana Skačkova-Marčenko nūruoda, ka pīmineklis ir viestejums nuokamajom paaudzem. “Veidojūt pīminekli profesorei Irēnai Silinevičai, aizdavums nabeja vīgls. Vīnā dorbā atainuot dyžona cylvāka padareitū, paruodeit tū īguļdejumu, kas izdareits i atstuots, nav vīglai. Deļtam pīminekļam izvālāta stilizāta gruomotys forma, tū rūtoj Latgolys karūga siluets i atveiduots Treju Zvaigžņu ordiņs, kurs profesorei daškierts par īguļdejumu izgleiteibys jūmā. Kai viestejums ir īkļauts teksts latgalīšu volūdā,” stuosta muokslineica.

RTA rektore profesore Iveta Mietule pastreipoj: “Irēnys Silinevičys davums Rēzeknei, Latgolai i Latvejai kūpumā ir nanūviertejami lels. Tuos ir symtim izveiduotu dorbavītu, tyukstūšom sagataveitu absolventu, izstruoduoti zynuotniskī dorbi. Myusim sevkuram, kurs ir struoduojs kūpā ar profesori, ir bejs lels gūds, vareiba vuiceitīs i augt. Jai pīmyta vīdums i elegance.” Iz profesorei veļteituo pīminekļa pīraksteiti vuordi, nu kurūs sevkurs var pasasmeļt dzeivis gudreibys:

Cylvāk! Veidoj sevi audzynojūt!
Tovi lelī sasnāgumi ir Tovā prōtā,
jo kermiņs ir laiceigs un dūts gora izpausmei.
Verīs dzeives spīgelī ar teiru sirdsapziņu,
sovas tautas gaismas ceļam, sovas dzymtas spākam,
pēcnōcējim esi vadzvaigzne.
Audzynoj sevi, tai Tu atrassi patīseibu!
Esi gūdeigs sovas dvēseles prīškā,
jo tei ir durovas uz augstōkū varēšonu.
Apgaismoj sovu prōtu ar jaunom zynōšonom,
jo tī, kas zyna, nakļyust par upurim cytu līkuleibai.
Cylvāk! Izgleiteiba ir Tovs ceļš uz breiveibu!

Print Friendly, PDF & Email

Nūtikšonu kalendars

Jan
26
Tre
vysu dīnu Nūvodpietnīceibys lasejumi prāve... @ Bolvu Nūvoda muzejs, tīšsaiste
Nūvodpietnīceibys lasejumi prāve... @ Bolvu Nūvoda muzejs, tīšsaiste
Jan 26 vysu dīnu
Nūvodpietnīceibys lasejumi prāvesta Alberta Budžis pīmiņai @ Bolvu Nūvoda muzejs, tīšsaiste
Gūdynojūt prāvesta Alberta Budžis (1930–1957–2017) atceri, Bolvu Centraluo biblioteka aicynoj pietnīkus pīsadaleit “Novadpētniecības lasījumos prāvesta Alberta Budžes piemiņai”. Tēmu lūks nav īrūbežuots, jis ītvar sevkuru pietnīku interesejūšu jūmu, kurys izpietis teritoreja ir Bolvu nūvods. Lasejumu[...]
Jan
28
Pīk
19:00 Gruomotys “Mīlas kastings” muzyk... @ Babeitis Kulturizgleiteibys centrs
Gruomotys “Mīlas kastings” muzyk... @ Babeitis Kulturizgleiteibys centrs
Jan 28 @ 19:00 – 21:00
Gruomotys "Mīlas kastings" muzykaluo prezentaceja @ Babeitis Kulturizgleiteibys centrs
28. janvarī 19.00 Babeitis Kulturizgleiteibys centra lelajā zalē, Piņkūs, nūtiks rakstneicys Ilzis Aizsilys gruomotys “Mīlas kastings” muzykaluo prezentaceja.   Par latgalisku nūskaņu pasaryupēs: rakstneica Ilze Aizsila i improvizators Viesturs Vizulis; muzykys grupa “Dabasu Durovys”; videjuos[...]